مايقايىڭ التىن كەنىشىندەگى اپات: قۇتقارۋشىلار اۆتوبۋستىڭ دوڭگەلەگىنە جەتتى
پاۆلودار. KAZINFORM - مايقايىڭ التىن كەنىشىندەگى ويىق ءتۇبىن قازىپ جاتقان قۇتقارۋشىلار اۆتوبۋستىڭ دوڭگەلەگىنە جەتتى. بۇل تۋرالى پاۆلودار وبلىسىنىڭ اكىمى اسايىن بايحانوۆ تەلەگرامداعى كانالىندا حابارلادى.
«4-قاڭتاردان باستاپ «مايقايىڭ- التىن» ا ق كەنىش اۋماعىنداعى وپىرىلعان جەردە ىزدەستىرۋ جۇمىستارى توقتاۋسىز جالعاسىپ جاتىر. شۇڭقىردىڭ تۇبىندەگى شاعىن ەكسكوۆاتورمەن قاتار گيدراۆليكالىق بالعاسى بار ەكىنشى قوسىمشا ەكسكاۆاتور جۇمىس ىستەۋدە. ونىڭ كومەگىمەن ۇلكەن تاستار ۇساقتالۋدا. مەن قازىر وقيعا ورنىندامىن. بۇگىنگى جۇمىس بارىسىندا قۇتقارۋشىلار اۆتوبۋستىڭ دوڭگەلەگىنە جەتتى. قازىرگى ۋاقىتتا بۇل شۇڭقىرعا قۇلاعان اۆتوبۋستىڭ ەڭ ۇلكەن بولىگى. ىزدەستىرۋ جۇمىستارى جالعاسۋدا» دەپ جازدى وبلىس باسشىسى.
ەسكە سالا كەتەيىك، بۇعان دەيىن گيدراۆليكالىق بالعاسى بار ەكسكاۆاتور شاعىن كولەمدى تاستى ۇساقتاپ جاتقانى تۋرالى جازعان ەدىك.
