مايقايىڭ التىن كەنىشىندە قوس قۇتقارۋشىنى ىزدەۋ جۇمىستارى قايتا جانداندى
پاۆلودار. KAZINFORM - «مايقايىڭ التىن» ا ق جەر استىنا اۆتوبۋسپەن بىرگە ءتۇسىپ كەتكەن ازاماتتاردى ىزدەۋ جۇمىستارىن قايتا جالعاستىردى. كاسىپورىننىڭ جاڭا باسشىلىعى ويىق استىندا جاتقان قوس قۇتقارۋشىنى قايتسە دە ىزدەپ تابۋعا بەل بايلاعان ءتارىزدى.
اتالعان كومپانيا بيىلعى اقپان ايىنىڭ سوڭىندا كەنىشتەگى قۇردىمعا قۇلاعان اۆتوبۋس پەن ونىڭ ىشىندەگى ەكى ازاماتتى ىزدەۋ جۇمىستارىن توقتاتىپ تاستاعانى تۋرالى حابارلاعان ەدىك.
«مايقايىڭ التىن» ا ق- نىڭ جاڭادان تاعايىندالعان ديرەكتورى قايروللا جۇرسىنبايەۆ 13-مامىردان باستاپ قوس قۇتقارۋشىنى ىزدەۋ جۇمىستارىن قايتا جانداندىرۋ تۋرالى شەشىم قابىلداعان. بۇل تۋرالى قۇتقارۋشى ايدوس شايمەردەننىڭ جارى نۇرسۇلۋ شايمەردەن حابارلادى.
ايتا كەتەيىك، ا. شايمەردەن - ويىق استىندا جاتقان ەكى ازاماتتىڭ ءبىرى. ول كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىندا جەدەل الدىن الۋ جۇمىستارى جونىندەگى ۆزۆود كومانديرىنىڭ ورىنباسارى بولىپ قىزمەت اتقارعان. ال ەكىنشىسى - جەدەل اۆتوكولىك جۇرگىزۋشىسى ايىپ تىلەۋبەرگەنوۆ.
«13-مامىردان باستاپ ايدوس پەن ونىڭ ارىپتەسىن ىزدەۋ جۇمىستارى قايتا باستالدى. ءبىزدىڭ وتباسىمىز بۇل كۇندى ۇزاق ۋاقىتتان بەرى تاعاتسىزدانا كۇتكەن ەدىك. قۇتقارۋشىلار جاقىن ادامدارىمىزدى تاۋىپ الاتىنىنا سەنىمدىمىز. كاسىپورىن باسشىلىعى ايتقانداي، ەڭ اۋەلى ويىق ماڭىندا كەن جىنىستارىن قازۋ جۇمىستارى جۇرگىزىلەدى. سودان سوڭ كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىنىڭ قۇتقارۋشىلارى ىسكە كىرىسەدى. قازىرگى ۋاقىتتا جۇمىستار تاۋلىك بويى جۇرگىزىلىپ جاتىر. باس ديرەكتور قايروللا جۇرسىنبايەۆ جەر استىندا جاتقان قوس ازاماتتى تاۋىپ العان سوڭ عانا شاحتا ىسكە قوسىلاتىنىن جەتكىزدى»، - دەدى نۇرسۇلۋ شايمەردەن Kazinform اگەنتتىنىنىڭ تىلشىسىنە بەرگەن سۇحباتىندا.
«مايقايىڭ التىن» ا ق- نىڭ جاڭا باسشىلىعى ىزدەۋ-قۇتقارۋ جۇمىستارى تۋرالى اقپارات بەرۋدەن باس تارتىپ وتىر.
تاۋ-كەن مەتاللۋرگيالىق ونەركاسىبىنىڭ سالالىق پورتالى metalmininginfo.kz حابارلاعانداي، «مايقايىڭ التىن» ا ق ينۆەستورلارى التىن كەنىشىندەگى ونەركاسىپتىك قاۋىپسىزدىكتى باعالاۋ، سونداي-اق ىزدەستىرۋ-قۇتقارۋ شارالارى مەن كەن ءوندىرۋ جۇمىستارىن جالعاستىرۋ ءۇشىن «التىن الماس ا ك» ا ق كومپانياسىن تارتقان. سوعان وراي 26-ساۋىردە جاڭا ديرەكتور تاعايىندالعان. جاڭا باسشىلىقتىڭ الدىندا تەز ارادا قوس قۇتقارۋشىنى تاۋىپ، ءوندىرىستى تولىققاندى ىسكە قوسۋ مىندەتتەرى تۇر.
ەسكە سالا كەتەيىك، نۇرسۇلۋ شايمەردەن بۇعان دەيىن كۇيەۋىنىڭ ءتىرى ەكەنىنە ەشقانداي ءۇمىتى جوق ەكەنىن، قۇتقارۋشىلار مۇردەسىن قازىپ بەرسە، ارۋلاپ جەر قوينىنا تاپسىرۋ سوڭعى تىلەگى ەكەنىن ايتقان ەدى.
