ماڭگىلىك دوسىم نەسىپبەك ايت ۇلىنىڭ قازاسى قابىرعاما قاتتى باتتى - ءجۇرسىن

اقىن، «قۇرمەت»، «وتان» وردەندەرىنىڭ يەگەرى ءجۇرسىن ەرمان «Qazaqstan» ۇلتتىق ارناسىنىڭ «تاڭشولپان» باعدارلاماسىنا سۇحبات بەردى.

اقىن ەرتەرەكتە جابىسقان كەسەلدەن ايىعا الماي كەلە جاتقانىن، استانا، الماتى قالالارىندا جانە شۆەيتساريادا ەمدەلگەنىن ايتتى. «قانت ديابەتى دەگەن كەسەل جابىسىپ، ەم- دومنان ناتيجە بولماي تۇر. جەتپىستىڭ ۇستىنە شىقتىم، ارنارسەنى ويلايسىڭ، ماڭگىلىك دوسىم نەسىپبەك ايت ۇلىنىڭ قازاسى قابىرعاما قاتتى باتتى. جۋىردا عانا كەلىپ مەنىڭ كوڭىلىمدى سۇراپ، ءحالىمدى ءبىلىپ كەتكەن، ءۇش كۇننەن سوڭ ينسۋلتتەن قۇلاپ، سودان وڭالمادى»، دەدى. ج. ەرمان ءتول بالاسىنداي قاناتىنىڭ استىنا الىپ قامقور بولىپ كەلە جاتقان ايتىسقا دەگەن ىڭكارلىگىن دە ءسوز ەتتى. جۋىردا استانا قالاسىندا وتەتىن «التىن دومبىرا» ايتىسىنا ءوزى باس قازى بولاتىنىن جەتكىزدى.

«ولەڭدەرىمدى مەنىڭ داۋسىممەن وقىپ عالامتورعا جىگىتتەر سالىپ ءجۇر، بىرەۋى كەلىپ رۇقسات سۇراعان ەمەس. وعان رەنجىمەيمىن دە، ءبىراق وكىنىشتىسى ءجۇرسىن ەرماننىڭ ولەڭى دەپ مەنىڭ اتىمنان بوتەن ولەڭدى دە جۇكتەپ جاتىر. سوعان قارنىم اشادى، ۇيات ەمەس پە؟ ! كوپ ولەڭدەرىمنىڭ الەۋمەتتىك جەلىدە تاراپ، باسپا ءسوز بەتتەرىندە دە جاريالانىپ جاتقانىن دا بىلەمىن، وعان شۇكىرشىلىك ەتەمىن»، دەگەن اقىن «قاسىمنىڭ ءۇيىن قيراتۋ» دەگەن ولەڭىن وقىدى.

الماتى قالاسىنداعى دوستىق داڭعىلى مەن قاراساي باتىر كوشەلەرىنىڭ قيىلىسىندا قازاق پوەزياسىندا ۇلى بەتبۇرىس جاساعان داۋىلپاز اقىن قاسىم امانجولوۆ تۇرعان ءۇيدى بەرتىندە كۇرەپ، ورنىنا بانك سالىنعانىن، سونىڭ جانىنداعى بوتەن ۇيگە «بۇل ۇيدە قاسىم امانجولوۆ تۇرعان» دەپ ەسكەرتكىش تاقتا ىلگەن كوزبوياۋشىلىققا كۇيىنگەننەن جازعان تۋىندىسى ەكەنىن ايتتى.

قۋانىش نۇردانبەك ۇلى

egemen.kz