مايكروسوفت ينتەرنەتتەن وقشاۋ، قۇپيا قۇجاتتارمەن جۇمىس ىستەيتىن جاساندى ينتەللەكت جاسادى

ЖИ
فوتو sotni.ru سايتىنان الىندى

استانا. KAZINFORM - مايكروسوفت ينتەرنەتتەن وقشاۋ تىڭشىلار (شپيون) ءۇشىن ارنايى ج ي-دى سىناقتان وتكىزۋدە. ول بۇلتتى ورتادا «اۋا ارالىعىنىڭ» كومەگىمەن ينتەرنەت قولدانۋشىلاردان جاسىرىلعان.

ا ق ش ۇكىمەتى ينتەرنەتتە ءىز قالدىرمايتىن ج ي-دى قولدانادى.

ا ق ش بارلاۋ اگەنتتىكتەرى قۇپيا جۇمىستاردى وڭدەۋ ءۇشىن Microsoft كورپوراتسياسىنىڭ ينتەرنەتتەن وقشاۋلانعان جاساندى ينتەللەكت جۇيەسىن پايدالانا باستاعانىن Quartz سايتى جاريالادى. Aikyn.kz مۇنداي تەحنولوگيانىڭ جۇمىس ىستەۋ قاعيدالارىن امەريكالىق دەرەككوزگە سۇيەنىپ تالدايدى.

Microsoft كورپوراتسياسى ا ق ش-تىڭ بارلاۋ اگەنتتىكتەرى ءۇشىن قۇپيا اقپاراتتاردى تالدايتىن جاساندى ينتەللەكت ۇلگىسىن جاسادى.

بەيسەنبىدە (9-مامىر) Bloomberg Microsoft كورپوراتسياسى ا ق ش-تىڭ بارلاۋ اگەنتتىكتەرىنە وتە قۇپيا اقپاراتتاردى تالدايتىن جاساندى ينتەللەكتىڭ گەنەراتيۆتى ۇلگىسىن ەنگىزگەنىن حابارلادى. Microsoft سەيسەنبىدە (7-مامىر) ۆاشينگتوندا وتكەن SCSP AI Expo for National Competitiveness 2024 كورمەسىندە جاساندى ينتەللەكتىڭ وسى نۇسقاسىمەن تانىستىردى. GPT-4 نەگىزىندەگى مودەل ينتەرنەتتەن تولىعىمەن بولەك جانە قۇپيا دەرەكتەردى قاۋىپسىز وڭدەۋگە مۇمكىندىك بەرەتىندەي ەتىپ جاسالعان.

Microsoft كورپوراتسياسىنىڭ ستراتەگيالىق ماسەلەلەر جونىندەگى باس تەحنولوگيالىق ديرەكتورى ۋيليام چاپپەلل:

«بۇل بىزدە العاش رەت وقشاۋلانعان نۇسقا بولدى، مۇندا وقشاۋلاۋ ونىڭ ينتەرنەتكە قوسىلماعانىن بىلدىرەدى جانە ول ا ق ش ۇكىمەتىنە عانا قولجەتىمدى ارنايى جەلىدە جۇمىس ىستەيتىن تەحنولوگيا. قۇپيا قۇجاتتارمەن جۇمىس ىستەيتىن ج ي ءسىز قويعان سۇراقتاردان ۇيرەنبەيدى، وزىنە ەنگىزىلگەن اقپاراتتى باسقالارمەن بولىسپەيدى»، - دەپ حابارلادى Bloomberg.

жи
فوتو Reuters سايتىنان الىندى. اۆتورلىعى: Larry Downing

ورتالىق بارلاۋ اگەنتتىگى (CIA) ينتەرنەتتەگى اقپاراتتى تالداۋ ءۇشىن ChatGPT ستيلىندەگى جەكە جاساندى ينتەللەكت قۇرالىن قولدانادى.

بارلاۋ قاۋىمداستىعى ChatGPT سياقتى ونىممەن جۇمىس ىستەۋگە وتە مۇقتاج بولدى، ءبىراق تىڭشىلاردىڭ گەنەراتيۆتى ج ي ونىمدەرىنە جۇكتەيتىن دەرەكتەرى وتە قۇپيا بولعاندىقتان قاۋىپسىزدىك تاۋەكەلدەرى تىم جوعارى بولدى. چاپپەلل Bloomberg-كە وتكەن اپتادا شىعارىلعان مودەل ونى ينتەرنەتتەن وقشاۋلايتىن «اۋاسى بار» ەكەنى، بۇنداي «اۋا» ونى بۇلتتى ورتادا قاۋىپسىز ەتەتىنىن ايتقان.

كوپتەگەن ج ي ۇلگىلەرى ولارعا بەرىلەتىن فايلداردان ۇيرەنەتىنى بەلگىلى، ال جاڭا قۇپيا رەجيمدەگى GPT-4-تىڭ تىڭشىلارعا ارنالعان (شپيوندىق) ۇلگىسى ولاي ەتپەيدى. وسىلايشا ۇكىمەت مودەلدى تازا ۇستاي الادى جانە قۇپيا اقپاراتتىڭ باسقا پلاتفورمالارعا اعىپ كەتۋىنە جول بەرمەيدى.

جاڭا ج ي جۇيەسى قۇپيا دەرەكتەرمەن جۇمىس ىستەۋگە ارنايى جاسالعان الەمدەگى العاشقى ج ي مودەلى، سونداي- اق ينتەرنەتتەن تولىعىمەن بولەك جۇمىس ىستەيتىن العاشقى نەگىزگى ءتىل ۇلگىسى. وتكەن جىلى ورتالىق بارلاۋ اگەنتتىگى كوپتەگەن قوعامدىق اقپاراتتى تالداۋ ءۇشىن ChatGPT ستيلىندەگى جەكە جاساندى ينتەللەكت قۇرالىن ەنگىزدى. ال Microsoft-تىڭ ج ي نۇسقاسى ەشقانداي قۇپيا قىزمەتتە پايدالانىلماعان.

ءبىراق مەملەكەتتىك ورگاندار، سونىڭ ىشىندە پەنسيلۆانيا اكىمشىلىك كەڭسەسى قۇپيا ەمەس دەرەكتەرمەن جۇمىس ىستەۋ ءۇشىن گەنەراتيۆتى جاساندى ينتەللەكتى پايدالانادى.

Microsoft سوڭعى 18 ايدى وسى GPT-4 شپيوندىق ۇلگىسىمەن اينالىستى، ول ايوۆا شتاتىندا ورنالاسقان ءوزىنىڭ جاساندى ينتەللەكت سۋپەركومپيۋتەرىن كۇردەلى جوندەۋدەن وتكىزدى. Bloomberg اگەنتتىگىنىڭ حابارلاۋىنشا، مودەل ءبىر اپتا بۇرىن عانا ىسكە قوسىلعان جانە ونى بارلاۋ قاۋىمداستىعى سىناپ، اككرەديتاتسيادان وتكىزەدى.

تومەندەگى فيلمنىڭ قىسقاشا مازمۇنداماسى ورتالىق بارلاۋ اگەنتتىگىنىڭ بۇرىنعى قىزمەتكەرى اتاقتى ەدۆارد سنوۋدەننىڭ قۇپيا قۇجاتتارى قالاي ۇرلاعانىن كورسەتەدى:

وتە قۇپيا جۇمىس جۇكتەمەلەرىنە ارنالعان جاساندى ينتەللەكت ۇلگىسىن ەنگىزۋ Microsoft كورپوراتسياسىنىڭ كيبەرقاۋىپسىزدىك بەدەلى ءۇشىن ماڭىزدى كەزەڭمەن تۇسپا- تۇس كەلدى.

جاقىندا ىشكى قاۋىپسىزدىك دەپارتامەنتى بۇلتتىق پروۆايدەردى جوعارى لاۋازىمدى شەنەۋنىكتەردىڭ ەلەكتروندىق پوشتالارىن اشكەرەلەدى دەپ ايىپتاپ، Microsoft كورپوراتسياسىنىڭ قاۋىپسىزدىك تاجىريبەسىن سىنعا الدى.

دەپارتامەنت ەسەبىندە Microsoft كورپوراتسياسىنىڭ قاۋىپسىزدىك مادەنيەتى «كۇردەلى جوندەۋدى قاجەت ەتەدى» دەلىنگەن. سودان كەيىن كومپانيانىڭ باس ديرەكتورى ساتيا نادەللانى «Microsoft كورپوراتسياسى ءۇشىن قاۋىپسىزدىك نەگىزگى باسىمدىق» دەپ مالىمدەمە جاساۋعا ءماجبۇر ەتتى. ەندى قۇپيا قۇجاتتارمەن جۇمىس ىستەيتىن ج ي ونىڭ ءسوزىن دالەلدەۋى قاجەت.

Microsoft مەملەكەتتىك ورگاندار ءۇشىن جاساندى ينتەللەكت قۇرالدارىن ازىرلەۋىن جالعاستىرماقشى. The Intercept جۋرنالىنىڭ ءساۋىر ايىنداعى ەسەبىندە Microsoft Azure DALL- E نۇسقاسى ا ق ش قورعانىس مينيسترلىگى ءۇشىن جاۋىنگەرلىك قۇرال رەتىندە ۇسىنىلعانى انىقتالدى. جاساندى ينتەللەكتى ەنگىزۋ جاڭا باعىت بولعانىمەن Microsoft اسكەري جانە مەملەكەتتىك ورگاندارمەن بۇرىننان ارىپتەستىك ورناتقان امەريكالىق كورپوراتسيا.

سوندىقتان دۇنيەجۇزىندەگى جۇزدەگەن ميلليون كومپيۋتەردەگى امەريكالىق كورپوراتسيانىڭ وپەراتسيالىق جۇيەسىنىڭ كومەگىمەن ا ق ش بارلاۋ اگەنتتىكتەرى بارلىق قولدانۋشىلاردى ءوزىنىڭ تورىمەن شىرماپ العانىن ماماندار جاقسى بىلەدى. ۇلتتىق قۇپيا اقپارات پەن دەرەكتەردىڭ قاۋىپسىزدىگى قازاق ۇكىمەتى ءۇشىن دە ماڭىزدى.

سوڭعى جاڭالىقتار