ماسكەۋدەگى سيرك فەستيۆالىندە قازاقستاندىق بالالار كۇمىس جۇلدە جەڭدى
الماتى. قازاقپارات - 12-15-قىركۇيەك ارالىعىندا ماسكەۋ سيركىندە يۋ. نيكۋليننىڭ سۆەتنوي بۋلۆارىندا وتكەن «ارتيست» II حالىقارالىق تسيرك فەستيۆالىندە «امانات» اۋە بەلبەۋىنىڭ دۋەتى دانات جانە دانالي دوسباتىروۆتار «يۋنيور» كۇمىس جۇلدەسىن جەڭىپ الدى. ولاردىڭ جەتەكشىسى - «قۇرمەت» وردەنىنىڭ يەگەرى داۋلەت دوسباتىروۆ.
قازاقستاندىق ونەرپازدار فەستيۆالدىڭ ەڭ جاس قاتىسۋشىلارى بولدى، دانات 10، ال دانالي 8 جاستا. سونداي- اق، جاس ارتىستەر ءتورت ارنايى سىيلىققا يە بولدى. ولار: حالىقارالىق سيرك ونەرى فەستيۆالىنىڭ پرەزيدەنتى جەنيس ماتابوشتان (جيرونا ق. يسپانيا)، باكۋ مەملەكەتتىك تسيركىنىڭ ديرەكتسياسىنان (ءازىربايجان)، «Sky Angels» توبىنان (وزبەكستان) جانە رەجيسسەر، رەسەيدىڭ ەڭبەك سىڭىرگەن ونەر قايراتكەرى الەكساندر گريمايلودان ارنايى سىيلىق.
«ارتيست» سيرك ونەرى فەستيۆالىنە الەمنىڭ 17 ەلىنەن 87 ارتيست قاتىستى. فەستيۆالدىڭ جۇلدەلەرى ءۇشىن تاجىريبەلى ارتىستەر دە، بالالار دا باق سىناستى.
«ەكى كونكۋرستىق كۇندە جانە گالا-شوۋدا حالىقارالىق قازىلار القاسى مەن كورەرمەندەر «امانات» نومىرىنە قوشەمەت كورسەتتى، بۇل ۇلكەن قۋانىش پەن ماقتانىش. ءبىزدىڭ ءنومىرىمىزدى كاسىبي ارتىستەر، فەستيۆالدىڭ رەجيسسەرلىك ساحنالاۋ توبى ەرەكشە اتاپ ءوتتى. رەسەيدەگى ەڭ كونە سيركتەردىڭ بىرىندە، اڭىزعا اينالعا ارتىستەر جۇمىس ىستەگەن مانەجدە ونەر كورسەتۋ ءبىز ءۇشىن ۇلكەن مارتەبە»، - دەدى «امانات» ءنومىرىنىڭ قويۋشى- رەجيسسەرى داۋلەت دوسباتىروۆ.
