ماسكەۋدە ساعادات نۇرماعامبەتوۆتىڭ 100 جىلدىعى اتالىپ ءوتتى
استانا. KAZINFORM - ماسكەۋدە قازاقستاننىڭ ءبىرىنشى قورعانىس ءمينيسترى، ارميا گەنەرالى، كەڭەس وداعىنىڭ باتىرى، حالىق قاھارمانى ساعادات نۇرماعامبەتوۆتىڭ 100 جىلدىق مەرەيتويىنا وراي سالتاناتتى ءىس- شارا ءوتتى.
100 جىلدىق مەرەيتوي، 25-مامىردا جەڭىس الاڭىندا ماڭگىلىك الاۋدىڭ جانىنا گۇل شوقتارىن قويۋدان باستالدى.
قازاقستاننىڭ رەسەيدەگى ەلشىلىگى، اسكەري اتتاشە اپپاراتىنىڭ قىزمەتكەرلەرى، ماسكەۋدەگى جوعارى وقۋ ورىندارىندا وقيتىن ق ر قورعانىس مينيسترلىگىنىڭ اسكەري قىزمەتشىلەرى مەن كۋرسانتتارى وتان ءۇشىن قازا تاپقان جانداردى ەسكە الدى.
سودان سوڭ قوناقتار جەڭىس مۇراجايىندا ارميا گەنەرالى ساعادات نۇرماعامبەتوۆتىڭ «جەڭىس ادامدارى» جالپى حالىقتىق تاريحي دەپوزيتارييىنىڭ بازاسىنا دەربەس دەرەكتەردى سالتاناتتى تۇردە ەنگىزۋ راسىمىنە قاتىستى. بۇل 150 ميلليوننان استام تاعدىردى ساقتاۋعا ارنالعان جانە ناتسيزمدى جەڭگەن ۇرپاقتىڭ ماڭگىلىك ءىزىن قالدىرۋعا ارنالعان «حالىقتىق ەكسپوزيتسيا».
«جەڭىس مۇراجايىندا قازاق حالقى ۇلىنىڭ مەرەيتويىن اتاپ ءوتۋ ءبىز ءۇشىن ۇلكەن مارتەبە. ونىڭ وتانعا جانقيارلىقپەن قىزمەت ەتۋى وسكەلەڭ ۇرپاققا ۇلگى. بۇگىنگى ءىس- شاراعا ماسكەۋ اسكەري وقۋ ورىندارى جاس كۋرسانتتارىنىڭ قاتىسقانى وتە ماڭىزدى»، - دەپ اتاپ ءوتتى قازاقستاننىڭ رەسەيدەگى ەلشىسى داۋرەن ابايەۆ.
ديپلوماتيالىق وكىلدىكتىڭ باسشىسى ساعادات نۇرماعامبەتوۆتىڭ تاۋەلسىز قازاقستان تاريحىندا ءبىرىنشى بولىپ «حالىق قاھارمانى» اتاعىن العانىن ەسكە سالدى. بۇگىندە ونىڭ ءومىر جولى، دۇنيەتانىمى جانە اسكەري قولباسشى رەتىندەگى ءبىلىمى كوپتەگەن زامانداسىنا ۇلگى.
جەڭىس ساياباعىنا بارعان ءىس- شارا قاتىسۋشىلارى «سكورب» (قايعى) مۇسىنىنە گۇل شوقتارىن قويىپ، «بەرلينگە شابۋىل» ديوراماسىمەن تانىستى، سونداي- اق، ارميا گەنەرالى ساعادات نۇرماعامبەتوۆتىڭ قۇرمەتىنە ارنالعان ەكسپوزيتسيانى تاماشالادى. وندا وتباسىلىق مۇراعاتتان الىنعان ءومىرباياندىق مالىمەتتەر مەن فوتوسۋرەتتەر جانە باتىردىڭ قولا ءبيۋستى ۇسىنىلدى.
جەڭىس مۇراجايىنىڭ باس ديرەكتورى الەكساندر شكولنيك اتالعان ءىس- شارا مۇراجاي ءۇشىن ماڭىزدى وقيعا ەكەنىن ايتا كەلە، كەڭەس وداعىنىڭ باتىرى ساعادات نۇرماعامبەتوۆتىڭ تاعدىرىنان باستاپ جوبانىڭ جاڭا بەتىن، ياعني جەڭىسكە ۇلەس قوسقانداردىڭ بارلىعىن ەسكە الۋ ءۇشىن قۇرىلعان «جەڭىس جۇزدەرى» جوباسىنىڭ اشىلعانىن ايتتى.
«ءبىز مۇندا وتباسىلىق تاريحتى، سوعىس جىلدارىنداعى بارلىق ۇرپاق وكىلدەرىنىڭ فوتوسۋرەتتەرى بار اڭىزداردى جينايمىز. ءبىز ءۇشىن قازاقستاننىڭ بۇل جوباعا قوسىلۋى وتە ماڭىزدى جانە ءبىز قازاقستاننىڭ بارلىق ازاماتى باتىر اتا- باباسىن ەسكە الىپ، جەڭىس مۇراجايىنا فوتوسۋرەتتەردى، تاريح پەن وتباسىلىق اڭىزدى جىبەرەدى دەگەن ۇمىتتەمىز. سودان سوڭ جەڭىس مۇراجايىنا كەلىپ، ءوز باتىرىن «جەڭىس جۇزدەرى» دەگەن اتپەن كورە الادى»، - دەيدى الەكساندر شكولنيك.
