ماسكەۋدە اباي ينستيتۋتىن قۇرۋ ۇسىنىلدى
قازاقستاننىڭ رەسەيدەگى ەلشىسى داۋرەن ابايەۆ ماسكەۋدە قازاق مادەنيەتىنىڭ قوعامدىق بىرلەستىكتەرىنىڭ وكىلدەرىمەن كەزدەستى، دەپ حابارلايدى kazinform.
داۋرەن ابايەۆ قازاقستان باسشىلىعى شەتەلدە تۇراتىن وتانداستاردى قولداۋعا ەرەكشە كوڭىل بولەتىنىن اتاپ ءوتتى. ول ماسكەۋدەگى قازاق دياسپوراسىن قازاقستان مەن رەسەيدىڭ رۋحاني-مادەني جاقىنداسۋىنىڭ جاسامپاز ساياساتىنىڭ نەگىزگى بۋىنى جانە جۇرگىزۋشىسى دەپ اتادى.
ءوز كەزەگىندە قوناقتار تۋعان جەردەن جىراقتا جۇرگەندە وزدەرىنىڭ تاريحي وتانىمەن اجىراماس بايلانىستى سەزىنەتىنىن، قازاقستاندا بولىپ جاتقان بارلىق وقيعالاردان حاباردار ەكەنىن جانە وسكەلەڭ ۇرپاقتىڭ انا ءتىلىن، مادەنيەتى مەن سالت-ءداستۇرىن ۇيرەنۋىنە بەلسەندى تۇردە ىقپال ەتەتىنىن اتاپ ءوتتى. ولار كورسەتىلگەن ءىلتيپات پەن قولداۋ ءۇشىن العىستارىن ءبىلدىرىپ، ءوزارا قارىم-قاتىناس بويىنشا ۇسىنىستارىن ءبىلدىردى.
اتاپ ايتقاندا، قازاقتىڭ ەتنيكالىق مادەنيەتىن ساقتاۋ جانە دامىتۋ جونىندەگى كوممەرتسيالىق ەمەس ۇيىمدار وداعى كەڭەسىنىڭ جاۋاپتى حاتشىسى پولات دجامالوۆ ماسكەۋدە گەتە مەن سەرۆانتەس ينستيتۋتتارىنا ۇقساس اباي ينستيتۋتىن قۇرۋ تۋرالى باستاما كوتەردى. سونداي-اق ول رەسپۋبليكادا ءار جىلدارى ءومىر ءسۇرىپ، ەڭبەك ەتكەن جانە وسى كەزەڭنىڭ جىلى ەستەلىكتەرىن ساقتاعان رەسەيلىكتەر اراسىنان قازاقستاننىڭ دوستارى قاۋىمداستىعىن قايتا جاڭعىرتۋدى ۇسىندى.
ال «ەۋرازيا ايەلدەر فورۋمى» وڭىرلىك قوعامدىق ۇيىمىنىڭ ۇيلەستىرۋ كەڭەسىنىڭ ءتوراعاسى راۋشان قاناپيانوۆا قاراشا ايىنىڭ سوڭىندا ماسكەۋدە وتەتىن «ەتنو-ەراتو» ۇلتتىق كيىمدەرىنىڭ XXII ەۋرازيالىق جوعارى ءسان بايقاۋىنا شاقىردى.
كەزدەسۋگە سونداي-اق «استانا» حالىقتار دوستىعى مەن ۇلتتىق مادەنيەتتەردى ناسيحاتتاۋ قورىنىڭ پرەزيدەنتى جارقىن وتەشوۆا، «پاميات» كوممەرتسيالىق ەمەس ۇيىمىنىڭ باسقارما ءتورايىمى گۇلزيفا سميرنوۆا جانە باسقالار قاتىستى.
