ماس كۇيىندە كولىك ايداعان ايەل جازادان قۇتىلۋ ءۇشىن جالعان انىقتاما جاساتقان

ورال. KAZINFORM - باتىس قازاقستان وبلىسىندا ماس كۇيىندە كولىك ايداعان ايەل جازادان قۇتىلۋ ءۇشىن جالعان انىقتاما جاساتقان.

ب ق و پروكۋراتۋراسىنىڭ باسپا ءسوز قىزمەتىنەن ءمالىم ەتكەنىندەي، ءبورلى اۋداندىق پوليتسيا ءبولىمى ر. دەگەن ايەلگە قاتىستى ق ر اكىمشىلىك قۇقىقبۇزۋشىلىق كودەكسىنىڭ 608-بابى 6-بولىگىنە (الكوگولدىك ماساڭ كۇيدە كولىك قۇرالىن جۇرگىزۋ) سايكەس حاتتاما تولتىرعان.

قاماۋعا الۋ تۇرىندەگى اكىمشىلىك جاۋاپكەرشىلىكتەن جالتارۋ ماقساتىندا ايەل ءبورلى اۋداندىق ورتالىق اۋرۋحاناسىندا فەلدشەر بولىپ جۇمىس ىستەيتىن ب. دەگەن دوسىنان ءوزىنىڭ جۇكتىلىگى تۋرالى جالعان انىقتاما بەرۋىن سۇراعان. ءوتىنىشتى جەردە قالدىرماعان فەلدشەر جالعان انىقتاما بەرىپ، ول كەيىن سوتقا ۇسىنىلعان.

«اتالعان دەرەكتەر بويىنشا ءبورلى اۋدانى پروكۋراتۋراسى تەكسەرۋ جۇرگىزىپ، سونىڭ قورىتىندىسى بويىنشا جالعان انىقتامانى دايىنداعان فەلدشەرگە قاتىستى ق ر ق ك 385-بابى 1-بولىگىنە، ال قۇقىق بۇزۋشى ايەلگە قاتىستى 385-بابى 3-بولىگىنە سايكەس قىلمىستىق ءىس قوزعادى. ءبورلى اۋداندىق سوتىنىڭ ۇكىمىمەن ر. جالعان قۇجاتتى پايدالانعانى ءۇشىن 20 ا ە ك مولشەرىندە ايىپپۇل تولەۋگە سوتتالدى. وعان قوسا ايەل ءبورلى اۋداندىق سوتىنىڭ قاۋلىسىمەن اكىمشىلىك قۇقىقبۇزۋشىلىق كودەكسىنىڭ 608-بابى 6-بولىگىمەن كىنالى دەپ تانىلىپ، وعان 20 تاۋلىك كولەمىندە اكىمشىلىك قاماققا الۋ جازاسى تاعايىندالدى. ال فەلدشەرگە جالعان قۇجات جاساعانى ءۇشىن 50 ا ە ك كولەمىندە ايىپپۇل كەسىلدى»، دەپ حابارلادى ۆەدومستۆودان.