مارات احمەتجانوۆ استانا ىرگەسىندەگى اۋىلداردا جارىق نەگە ءجيى وشەتىنىن ايتتى

  استانا ىرگەسىندەگى اۋىلداردىڭ ەلەكتر قۋاتىمەن بايلانىستى پروبلەمالارى ۇكىمەتتىڭ ارنايى قاۋلىسى نەگىزىندە شەشىمىن تابادى.

اقمولا وبلىسىنىڭ اكىمى مارات احمەتجانوۆ ورتالىق كوممۋنيكاتسيالار قىزمەتىندە وتكەن بريفينگىدە وسىنداي مالىمەت ايتتى، دەپ حابارلايدى Kazinform.

«استانا ىرگەسىندەگى قوياندى، قاراوتكەل، جىبەك جولى سەكىلدى اۋىلدار مەن قوسشى قالاسى ءالى كۇنگە دەيىن كومىر جاعىپ وتىر. گاز قاشان تارتىلادى؟» - دەپ سۇرادى جۋرناليست.

اكىمنىڭ سوزىنشە، اتالعان ەلدى مەكەندەرگە گاز تارتۋ باعىتىندا جوبالاۋ- سمەتالىق قۇجاتتار ازىرلەنگەن. 2024 -جىلى بىرنەشە ەلدى مەكەندە جۇمىس باستالماق.

«جالپى ارشالى اۋدانىنا گاز جەتتى. 16 ەلدى مەكەن گازداندىرىلدى. ەندى وسى جوبا اياسىندا جىبەك جولى اۋىلى 17 ەلدى مەكەن بوپ كىرگەلى وتىر. بۇل جەردە وبەكتيۆتى دە، سۋبەكتيۆتى دە جاعدايلار بار. رەسمي ساناق بويىنشا الساق، سول جىبەك جولىندا 10 مىڭ ادام عانا تۇرادى. ال نەگىزگى حالىق سانى 30 مىڭنان اسىپ تۇر.

2024 -جىلعا دەگەن جوسپار بار. جوبالاۋ- سمەتالىق قۇجاتتار دايىن. گاز ىرگەگە جەتسە بولدى، جۇمىستار باستالادى. ناقتى ايتساق، جىبەك جولىنان بولەك قوياندى، قاراوتكەل، تالاپكەر، تايتوبە اۋىلدارى مەن قوسشى قالاسى بار»، - دەدى اكىم.

سونداي- اق، ول استانا ىرگەسىندەگى اۋىلداردا ەلەكتر جارىعى نەگە ءجيى وشەتىنىن ايتتى.

«بۇل ماسەلەنىڭ ءوز تاريحى بار. ۇكىمەت قاۋلىسىن دايىنداپ جاتىرمىز. ونداعى جەكە تۇرعىن ۇيلەردىڭ كوبى ساتىپ الىنعان تەلىمدە بوي كوتەرگەن. ونىڭ تاريحىن ءوزىڭىز دە بىلەتىن شىعارسىز. جەكە ادامدار قوسالقى ستانسا قويىپ، حالىققا ەلەكتر قۋاتىن تاراتقان. ارينە، وسىنداي قوسالقى ستانسانىڭ كەيبىر يەلەرى زاڭدى تۇلعا رەتىندە مەملەكەتتەن قوسىمشا قارجى تالاپ ەتىپ وتىر. قازىرگى تاڭدا ەلەكتر ەنەرگياسى سالاسىنداعى بۇكىل قۇجاتتاردى مەملەكەتتىك ەتۋ جوسپاردا بار. جوبالاۋ- سمەتالىق قۇجاتتارى دايىن. سونىڭ ءبارى زامان تالابىنا ساي ەتىپ سالىنادى. ءبارى كوممۋنالدىق مەنشىككە الىنىپ، تۇرعىندار جەكە تۇلعا رەتىندە ورتاق تاريف بويىنشا تولەيتىن بولادى. ونى ءبىز قازىر زاڭداستىرۋ ماسەلەسىمەن اينالىسىپ جاتىرمىز. كەيبىرىن كەلىسىمشارت ارقىلى مەملەكەت بالانسىنا الامىز نە بولماسا جاڭادان ستانسا ورناتامىز. ونداي ماسەلە قوسشىدا دا بار. قولدان جاسالعان جۇيەلەر بار. قاتى جەل وقسا، ءسونىپ قالادى. ونى دا بىلەمىز. سوندىقتان قازىر وسىنداي جوسپارمەن ماسەلەنى تەحنولوگيا تالاپتارىنا ساي شەشەمىز. استانا اگلومەراتسياسىن دامىتۋ تۋرالى ۇكىمەت قاۋلىسى قابىلدانعان سوڭ كىرىسەمىز. وبلىس بيۋدجەتىنەن دە قاراجات بار. ءبىراق ول جەتكىلىكسىز. سوندىقتان ۇكىمەت قاۋلىسى اياسىندا رەسپۋبليكا بيۋدجەتىنەن اقشا بولىنەدى. وبلىستا تۇراقسىز كوشى- قوننىڭ قارقىنىن دا وسى ماسەلەمەن بايلانىستىرۋعا بولادى. سوندىقتان ونى تۇبەگەيلى شەشۋگە مۇددەلىمىز»، - دەدى وبلىس اكىمى.