مارافونشى سارسەنباي قوتىراشوۆ قازاقستاننان قىتايعا جاياۋ ساياحاتقا اتتانادى
استانا. KAZINFORM - بۇگىن ەلوردادا سارسەنباي قوتىراشوۆتىڭ كەزەكتى جاياۋ ارالاۋعا شىعاتىن ساياحاتىنا دايىندىق بارىسىن تالقىلاۋ ماقساتىندا كەزدەسۋ ءوتتى. تانىمال ساياحاتشىنىڭ بۇل باستاماسىن قولداۋ شاراسى «QazaqGeography» رەسپۋبليكالىق قوعامدىق بىرلەستىگى مەن 5-دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكسياسىمەن بىرلەسە ۇيىمداستىرىلدى.
كەزدەسۋ بارىسىندا «QazaqGeography» ر ق ب باسقارما ءتوراعاسىنىڭ ورىنباسارى ۆالەنتينا الياسوۆا مادەني جانە گەوگرافيالىق زەرتتەۋلەردىڭ ماڭىزدىلىعىن اتاپ ءوتىپ، سارسەنباي قوتىراشوۆتىڭ ورتالىق ازيا تۋرالى ءبىلىمدى ناسيحاتتاۋداعى ءرولىن ەرەكشە تىلگە تيەك ەتتى. ول ۇيىم اتىنان ساياحاتشىعا قولداۋ ءبىلدىرىپ، الداعى ساياحاتىندا ساتتىلىك تىلەدى.
سونداي-اق، 5-دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكتسياسى باسشىسىنىڭ كەڭەسشىسى ءمادي ماناتبەك تە ءوز تىلەگىن جەتكىزىپ، سارسەنباي وسپان ۇلىنىڭ ميسسياسىن ءساتتى ورىنداپ، ەلگە امان-ەسەن ورالۋىن تىلەدى.
«سارسەنباي وسپان ۇلىن ساياحاتشى دەپ تانىساق، بۇگىن ول كىسىنىڭ كوشپەلى جۇرتتىڭ ءومىر-سالتىن تەرەڭ زەرتتەگەن تاريحشى-عالىم ەكەنىنە كوزىمىز جەتتى. كوشپەندىلەر وتانى - قازاق ەلى ەكەنىن ساپار جاساعان جەرىنىڭ بارلىعىندا ايتىپ، تاريحي تىزبەگىن جالعاستىرىپ كەلە جاتقانىنا ءتانتى بولدىق. ەندى مىنە رەسەي، موڭعوليا، قىتاي ەلدەرىنە جاسايتىن ساپارىندا استانادا وتەتىن 5-دۇنيەجۇزىلىك كوشپەندىلەر ويىنىندارىن بارىنشا ناسيحاتتايمىن دەپ وتىر. سارسەنباي اقساقالدىڭ ساپارى ءساتتى بولسىن دەيمىز!»، - دەدى ول.
تانىمال ساياحاتشى جانە مارافونشى سارسەنباي قوتىراشوۆ شامامەن 3000 شاقىرىمدى قۇرايتىن ۇلكەن جاياۋ ساپارعا اتتانادى. ول 2-تامىز كۇنى وسكەمەن قالاسىنان شىعىپ، كۇنىنە ورتاشا ەسەپپەن 40 شاقىرىم ءجۇرۋدى جوسپارلاپ وتىر. ساياحاتشى ءوزىنىڭ ءۇش ايعا سوزىلاتىن ساپارىن 5-دۇنيەجۇزىلىك كوشپەندىلەر ويىندارىنا ارنايتىنىن جەتكىزدى.
«مەن ءوزىمنىڭ جاياۋ ساياحاتىمدى الداعى 5- دۇنيەجۇزىلىك كوشپەندىلەر ويىندارىنا ارنايمىن. ءبىز كوشپەندىلەردىڭ ۇرپاعىمىز جانە ولاردىڭ باي مادەنيەتى مەن مۇرالارىن الەمگە تانىتقىم كەلەدى. مەن التاي جانە موڭعوليا ارقىلى قىتايعا دەيىن جەتۋدى جوسپارلاپ وتىرمىن»، - دەدى قوتىراشوۆ ساپارعا اتتانار الدىندا.
ساپارى بارىسىندا سارسەنباي وسپان ۇلى كوشپەندى حالىقتاردىڭ مادەنيەتى مەن داستۇرلەرىمەن تانىسىپ، ءوز اسەرلەرىمەن جانە جاڭالىقتارىمەن الەۋمەتتىك جەلىلەر مەن مەديا ارقىلى كوپشىلىكپەن ءبولىسۋدى جوسپارلاپ وتىر. ونىڭ ەكسپەديتسياسى ورتالىق ازيا كوشپەندى حالىقتارىنىڭ باي تاريحى مەن مادەني مۇراسىن ناسيحاتتاۋعا باعىتتالعان.
سارسەنباي قوتىراشوۆ - مارافونشى، ساياحاتشى، شابىتتاندىرۋشى تۇلعا. 2022 -جىلى ول 72 جاسىندا ەلىمىزدىڭ 17 وبلىسىن 6 ايدا 8000 ك م جولدى جاياۋ ءجۇرىپ وتكەنى ءۇشىن قازاقستاندا تانىمال بولا باستادى. 2023 -جىلى اتىراۋ (قازاقستان) قالاسىنان ىستامبۇل (تۇركيا) قالاسىنا دەيىن جاياۋ 3000 ك م قاشىقتىقتى باعىندىردى.
اۆتور
باقىتگۇل اباي قىزى
