مارافوندا ەكى ادامنىڭ قازاسىنا قاتىستى قىلمىستىق ءىس قوزعالدى ما – ءى ءى م جاۋابى

استانا. KAZINFORM - الماتىدا وتكەن جارتىلاي مارافون كەزىندە ەكى قاتىسۋشىنىڭ قازاسىنا قاتىستى قىلمىستىق ءىس قوزعالدى ما؟ بۇل سۇراققا ىشكى ىستەر ءمينيسترىنىڭ ورىنباسارى سانجار ءادىلوۆ جاۋاپ بەردى.

- ءتيىستى تەكسەرۋ بولدى. ەكى ادامنىڭ ءولىمى بويىنشا كريمينالدىق ءمان-جاي انىقتالمادى. بىزدە قىلمىستىق ءىس تەك قىلمىس قۇرامى بولعاندا عانا قوزعالادى. اتالعان وقيعادا قىلمىستىق ءىس قوزعالمادى. تەكسەرىس ناتيجەسىندە زورلىق-زومبىلىق بەلگىلەرى انىقتالمادى. بۇل تۇرعىدا سوت-مەديتسينالىق ساراپتاما ورتالىعىنىڭ ءتيىستى اكتىلەرى بار، - دەدى س. ءادىلوۆ پارلامەنت ماجىلىسىندەگى ۇكىمەت ساعاتىنان كەيىن تىلشىلەر سۇراعىنا جاۋاپ بەرە وتىرىپ.

ەسكە سالساق، جاقىندا الماتىدا جارتىلاي مارافونعا قاتىسقان ەكى ادام قايتىس بولدى.

مارافون ۇيىمداستىرۋشىلارى ءمالىم ەتكەندەي، جۇگىرۋ كەزىندە ەكى قاتىسۋشى كوز جۇمدى. ونىڭ ءبىرى - 84 جاستاعى اققويان رساليەۆ بولسا، ەكىنشىسى 21 جاستاعى نۇربول احمادي.

تۋريزم جانە سپورت مينيسترىلىگى مارافونداعى قايعىلى جاعدايدان سوڭ مۇنداي شارالارعا تالاپتى كۇشەيتپەك.