مارادونانى ولەر الدىندا ەمدەگەن دارىگەرلەر 25 جىلعا دەيىن سوتتالۋى مۇمكىن

استانا. KAZINFORM - ارگەنتينانىڭ اتى اڭىزعا اينالعان فۋتبولشىسى ديەگو مارادونانىڭ ولەر الدىندا قامقورشىسى بولعان 8 مەديتسينا قىزمەتكەرىنىڭ جەتەۋىنىڭ ءىسى سەيسەنبى كۇنى سوتتا قارالادى.

ولارعا ءوز ىسىنە نەمقۇرايدى قارادى، سونىڭ سالدارىنان ايگىلى فۋتبولشى كوز جۇمدى دەگەن ايىپ تاعىلىپ وتىر. ياعني ولاردىڭ ءىسى بايقاۋسىزدا كىسى ءولتىرۋ بابى بويىنشا قارالادى، دەپ حابارلايدى قازاقپارات BBC اگەنتتىگىنە سىلتەمە جاساپ.

مارادونا 2020 -جىلى 25-قاراشادا 60 جاسىندا قايتىس بولدى. بۇعان دەيىن وعان ميىنداعى قان ۇيىعىن الىپ تاستاۋ ءۇشىن وتا جاسالعان. ونىڭ ىشىمدىك پەن ناشاقورلىقتان ەمدەلگەنى دە بەلگىلى بولدى.

پروكۋراتۋرا فۋتبولشى قايتىس بولعاننان كەيىن كوپ ۇزاماي دارىگەرلەر مەن مەدبيكەلەرگە قاتىستى تەرگەۋ امالدارىن باستادى. 2021 -جىلى مارادونا ءولىمىنىڭ ءمان-جايىن زەرتتەگەن 20 ساراپشىدان تۇراتىن كوميسسيا مەديتسينالىق توپتىڭ ارەكەتىن «ورىنسىز، جەتكىلىكسىز جانە جاۋاپسىز» دەپ تاپتى.

ساراپشىلار (سوت اتاپ وتكەندەي) اڭىزعا اينالعان فۋتبولشى ءتيىستى مەديتسينالىق مەكەمەدە دۇرىس ەمدەلگەندە (مارادونا ۇيىندە قايتىس بولدى - BBC) ونىڭ «ءتىرى قالۋ مۇمكىندىگى بار ەدى»، دەگەن قورىتىندىعا كەلدى.

ايىپتالعانداردىڭ اراسىندا مارادونانىڭ نەيروحيرۋرگى لەوپولدو لۋكە (ونىڭ جەكە دارىگەرى بولعان)، پسيحياتر جانە مەدبيكەلەر بار. ولاردىڭ بارلىعى فۋتبولشىنىڭ ولىمىنە كىنالى ەكەنىن جوققا شىعارىپ وتىر.

ايىپتالۋشىلار ولىمگە اكەلەتىنىن بىلە تۇرا، ابايسىزدا ادام ولتىرگەنى ءۇشىن كىنالى دەپ تانىلسا، ولار سەگىز جىلدان 25 جىلعا دەيىن باس بوستاندىعىنان ايىرىلۋى مۇمكىن.

ديەگو مارادونا فۋتبول تاريحىنداعى ەڭ ۇلى ويىنشىلاردىڭ ءبىرى بولىپ سانالادى. فيفا رەسمي سايتىنداعى داۋىس بەرۋ قورىتىندىسى بويىنشا ول ⅩⅩ عاسىردىڭ ۇزدىك فۋتبولشىسى تانىلدى.

وسىعان دەيىن ارگەنتينانىڭ باعىنا تۋعان داڭقتى سپورتشى ديەگو مارادونانىڭ مۇراگەرلەرى 1986-جىلعى الەم چەمپيوناتىندا فۋتبولشىعا بەرىلگەن «التىن دوپتىڭ» اۋكسيونعا قويىلۋىنا قارسى شىعىپ، سوتقا شاعىمدانعانى تۋرالى جازدىق.

اۆتور

زارينا تۋعانبايەۆا