گۋمانيتارلىق كومەك كۇتكەن جۇزدەگەن پالەستينالىق قازا تاپتى
استانا. KAZINFORM - كەشە، 29-اقپاندا گازانىڭ وڭتۇستىك- باتىسىندا ازىق-تۇلىك كومەگىن كۇتىپ تۇرعان جۇزدەن استام پالەستينالىق يزرايل شابۋىلىنان قازا تاپتى. بۇل تۋرالى Al Jazeera جەرگىلىكتى دەنساۋلىق ساقتاۋ ۇيىمدارىنا سىلتەمە جاساپ حابارلادى.
گازا دەنساۋلىق ساقتاۋ مينيسترلىگىنىڭ مالىمەتى بويىنشا، ەرەۋىلدەر سالدارىنان كەمىندە 112 ادام قازا تاۋىپ، 750 دەن استام ادام جاراقات العان.
ۇن تاسيتىن كولىكتەر ءجۇرىپ جاتىر، دەگەن حابار ەسىتكەن ادامدار ءال-راشيد كوشەسىنە جينالعان.
«ءبىز ۇن الۋعا باردىق. يزرايل اسكەرى بىزگە قارسى وق اتتى»، - دەدى كۋاگەرلەردىڭ ءبىرى.
ولاردىڭ ايتۋىنشا، يزرايل شابۋىلدارى جارالىلار مەن قازا تاپقانداردى، سونداي-اق بەيبىت تۇرعىنداردى تاسىمالداعان مەديتسينالىق توپتاردى دا نىساناعا العان.
گازا دەنساۋلىق ساقتاۋ مينيسترلىگىنىڭ باسپا ءسوز حاتشىسى اشراف ءال-كۋدرانىڭ ايتۋىنشا، قازا تاپقاندار مەن جارالانعاندار گازا قالاسىنداعى اۋرۋحانالارعا جەتكىزىلگەن.
«رەسۋرستارى شەكتەۋلى مەديتسينالىق توپتار اۋىر جاراقات العانداردى ەمدەۋدى جالعاستىرۋدا»، - دەيدى ول.
ءوز كەزەگىندە گازا ۇكىمەتى يزرايلدىڭ گازا قالاسىنداعى بەيبىت تۇرعىندارعا جاساعان شابۋىلىن «ادەيى جانە الدىن الا ويلاستىرىلعان» دەپ ايىپتادى.
«باسقىنشى اسكەرلەر بۇل ادامداردىڭ ايماققا گۋمانيتارلىق كومەك ءۇشىن كەلگەنىن بىلگەن، ءبىراق ولاردى سالقىن قاندىلىقپەن ءولتىردى»، - دەلىنگەن حابارلامادا.
الايدا يزرايل تاراپى وقيعانىڭ باسقا نۇسقاسىن ۇسىنىپ وتىر.
يزرايل تاراپىنىڭ مالىمەتىنشە، گۋمانيتارلىق كومەكتى تاراتۋ كەزىندە بولعان قاقتىعىس سالدارىنان ونداعان گازالىق قازا تاپقان.
«تاڭەرتەڭ گۋمانيتارلىق جۇك كولىكتەرى گازا سەكتورىنىڭ سولتۇستىك بولىگىنە كىرگەن كەزدە تۇرعىندار جۇك كولىكتەرىن قورشاپ الىپ، جەتكىزىلگەن جۇكتەردى توناپ كەتكەن»، - دەلىنگەن ساحال رەسمي Telegram-كانالىندا جاريالانعان حابارلامادا.
سالدەن كەيىن ساحال وقيعانىڭ اۋەدەن تۇسىرىلگەن ۆيدەوسىن جاريالادى.
يزرايل پرەمەر-ءمينيسترى كەڭسەسىنىڭ باسپا ءسوز حاتشىسى اۆي حايمان جاعدايدى «قايعىلى وقيعا» دەپ اتادى. ول قاراپايىم تۇرعىنداردىڭ ولىمىنە جۇرتتىڭ اراسىنا كىرىپ كەتكەن جۇك كولىگى جۇرگىزۋشىلەرى جاۋاپتى دەپ مالىمدەدى.
«شامادان تىس جۇك تيەلگەن جانە جۇك كولىكتەرىن باسقاراتىن ادامدار - گازا سەكتورىنىڭ ازاماتتىق جۇرگىزۋشىلەرى - كوپشىلىكتىڭ اراسىنا كىرىپ باردى، ناتيجەدە ونداعان ادامدىڭ ولىمىنە سەبەپ بولدى»، - دەدى حايمان.
ونىڭ ايتۋىنشا، وقيعاعا قاتىستى تەرگەۋ امالدارى ءجۇرىپ جاتىر.
اقپارات ءۇشىن، يزرايل ارمياسى گازا سەكتورىنداعى شابۋىلدارىن 146 كۇن بويى جالعاستىرىپ جاتىر.
اۆتور
جاراسقان نۇرىبايەۆ
