مانچەستەر يۋنايتەد 100 مىڭ ادامدىق جاڭا ستاديون سالماقشى
استانا. KAZINFORM - انگليالىق «مانچەستەر يۋنايتەد» فۋتبول كلۋبى 100 مىڭ ورىندىق جاڭا ستاديون سالاتىنىن جاريالادى.
فۋتبول كلۋبىنىڭ الەۋمەتتىك جەلىدەگى رەسمي پاراقشاسىندا حابارلانعانداي، جوبا ۇكىمەتتىڭ ولد تراففورد ايماعىن قالپىنا كەلتىرۋ جانە دامىتۋ جوسپارلارىنا قولداۋ كورسەتۋ ءۇشىن جۇزەگە اسىرىلماق.
سونىمەن قاتار، ستاديون قۇرىلىسى مەن رەگەنەراتسيا جوباسى ۇلى بريتانيا ەكونوميكاسىنا جىلىنا قوسىمشا 7,3 ميلليارد فۋنت ستەرلينگ تابىس اكەلۋگە جانە 92000 جاڭا جۇمىس ورىنىنىڭ اشىلۋىنا سەپ بولادى دەپ جوسپارلانعان. جوبا اياسىندا، «ولد تراففورد» ايماعىندا 17 مىڭنان استام جاڭا پاتەر پايدالانۋعا بەرىلمەك. جىلىنا 1,8 ميلليون تۋريست قابىلداۋ جوسپارلانىپ وتىر.
«مانچەستەر يۋنايتەد» فۋتبول كلۋبى ءوز الاڭى «ولد تراففورد» ستاديونىندا 115 جىل ويناپ كەلە جاتىر. جاڭا ستاديوندى تانىمال بريتاندىق ساۋلەتشى جانە ديزاينەر نورمان فوستەردىڭ قۇرىلىس كومپانياسى جوبالاعان.
ايتا كەتەيىك، ساۋلەتشىنىڭ توبى استاناداعى «بەيبىتشىلىك جانە كەلىسىم سارايى»، «حان شاتىر» ساۋدا ورتالىعى، «ابۋ دابي پلازا» سياقتى عيماراتتار جوباسىن جاساقتاعان.
وسىعان دەيىن حابارلاعانىمىزداي، قازاقستان فۋتبولى كۇنىنە وراي الەم جانە قازاقستان فۋتبولىنىڭ اڭىز ويىنشىلارى استانادا باس قوسادى.
اۆتور مۇحتار قاليموللا ۇلى
