مامىردان باستاپ جەدەل جاردەمنىڭ جۇمىس ءتارتىبى وزگەرەدى
استانا. KAZINFORM - دەنساۋلىق ساقتاۋ مينيسترلىگى 1-مامىردان باستاپ موبيلدىك بريگادالاردىڭ جۇمىس ءتارتىبى وزگەرەتىنىن حابارلادى. دەسە دە جەدەل جاردەم قالىپتى رەجيمدە جۇمىس جاساي بەرەتىنى ايتىلدى.
ۆەدومستۆونىڭ مالىمەتىنشە، مۇنداي وزگەرىستەر جەدەل جاردەمنىڭ كەلۋىن ۇزاق كۇتۋ بويىنشا شاعىمدارعا بايلانىستى جۇزەگە اسىرىلماق. ءارى شۇعىل قىزمەت جۇمىسىنىڭ تيىمدىلىگىن ارتتىرۋ ماقساتىندا ەمحانالار جانىنداعى جەدەلدىلىكتىڭ 4-ساناتىنداعى شاقىرتۋلارعا قىزمەت كورسەتەتىن موبيلدىك بريگادالار جۇمىسىنىڭ قاعيدالارىنا وزگەرىستەر ەنگىزىپ وتىر.
- بۇل وزگەرىستەر اعىمداعى جىلدىڭ 1-مامىرىنان باستاپ كۇشىنە ەنەدى جانە ازاماتتاردىڭ 103 ءنومىرى بويىنشا شۇعىل كومەككە شاقىرتۋ قۇقىعىن شەكتەمەيدى، - دەلىنگەن حابارلامادا.
جەدەلدىلىكتىڭ 4-ساناتىنداعى شاقىرتۋلار پاتسيەنتتىڭ ءومىرى مەن دەنساۋلىعىنا تىكەلەي جانە ىقتيمال ءقاۋىپ جوق، پاتسيەنتتىڭ ومىرىنە قاۋىپ توندىرمەيتىن، ءبىراق مەديتسينالىق ارالاسۋدى قاجەت ەتەتىن جاعدايلارعا قاتىستى.
سونىمەن، 1-مامىردان باستاپ نە وزگەرەدى:
● ەمحانالاردىڭ جانىنداعى موبيلدىك بريگادالار جۇمىس ۋاقىتىندا - 8:00-دەن 20:00-گە دەيىن جۇمىس ىستەيتىن بولادى؛
● ومىرگە قاۋىپ توندىرمەيتىن جەدەلدىكتىڭ 4-ساناتىنداعى شاقىرتۋلار (مىسالى، جوعارى قىسىم، تەمپەراتۋرا، جەڭىل جاراقاتتار) ەمحانالاردىڭ جۇمىس ۋاقىتىندا م س ا ك موبيلدىك بريگادالارىنا قايتا باعىتتالاتىن بولادى؛
● 20: 00-دەن كەيىن جانە دەمالىس كۇندەرى بارلىق شاقىرتۋلارعا، سونىڭ ىشىندە 4-ساناتقا، بۇرىنعىداي، جەدەل جاردەم بريگادالارى قىزمەت كورسەتەدى.
ستاتيستيكا كورسەتكەندەي، جەدەل جاردەم شاقىرتۋلارىنىڭ %50 دان استامى جەدەلدىلىكتىڭ 4-ساناتىنا جاتادى جانە سوزىلمالى اۋرۋلاردىڭ ورشۋىنە بايلانىستى.
- مۇنداي شاقىرتۋلار رەسۋرستاردىڭ جەدەل كومەككە مۇقتاج، ومىرىنە قاۋىپ توندىرەتىن جاعدايلارى بار پاتسيەنتتەرگە بارا الماي قالاتىنىن مويىنداۋ كەرەك. وزگەرىستەر جۇكتەمەنى وڭتايلاندىرۋعا، كۇتۋ ۋاقىتىن قىسقارتۋعا جانە بۇكىل ج م ج جۇيەسىنىڭ تيىمدىلىگىن ارتتىرۋعا مۇمكىندىك بەرەدى، - دەپ حابارلادى ۆەدومسۆودان.
ەندى مەديتسينالىق-سانيتاريالىق العاشقى كومەكتىڭ موبيلدىك بريگادالارى شاقىرتۋلارعا شىعىپ، پاتسيەنتتەردىڭ ۇيىنە جوسپارلى تۇردە بارۋدى جۇزەگە اسىراتىن بولادى. بۇل ازاماتتاردىڭ دەنساۋلىق جاعدايىن ۋاقتىلى باقىلاۋدى قامتاماسىز ەتۋگە، اسىرەسە سوزىلمالى اۋرۋلارى بار پاتسيەنتتەردىڭ جاعدايىنىڭ ناشارلاۋىنا جەدەل دەن قويۋعا مۇمكىندىك بەرەدى.
م س ا ك موبيلدىك بريگادالارى 25 مىڭ تۇرعىنعا ءبىر بريگادا ەسەبىنەن قۇرىلادى. ولار پاتسيەنتتىڭ تۇرعىلىقتى جەرى نەمەسە بەكىتىلۋىنە قاراماستان ناقتى كەلگەن جەرى بويىنشا جۇمىس ىستەيدى.
- قاجەت بولعان جاعدايدا موبيلدىك بريگادالارمەن ارنايى باعىتتاعى ماماندار دا بىرگە بولادى، اتاپ ايتقاندا بالالارعا كومەك پەدياتردىڭ قاتىسۋىمەن، ەرەسەكتەرگە - پاتسيەنت جاعدايىنىڭ سيپاتى مەن اۋىرلىعىنا بايلانىستى ارنايى مامانداردى (كارديولوگتار، نيەۆروپاتولوگتار جانە باسقا دارىگەرلەر) تارتا وتىرىپ كورسەتىلەتىن بولادى. بۇل ءتاسىل جوعارى ساپالى اتاۋلى مەديتسينالىق كومەك كورسەتەدى، - دەلىنگەن حابارلامادا.
جەدەل جاردەمدى شاقىرتۋ مەحانيزمى وزگەرىسسىز قالادى - 103 ءنومىرىن تەرۋ ارقىلى ازاماتتار تاۋلىكتىڭ كەز كەلگەن ۋاقىتىندا شۇعىل مەديتسينالىق كومەككە قوڭىراۋ شالا الادى. پاتسيەنتتىڭ جاعدايى ومىرگە تىكەلەي ءقاۋىپ توندىرەتىن جاعدايلاردا جەدەل جاردەم بريگاداسى اپتانىڭ كۇنى مەن تاۋلىك ۋاقىتىنا قاراماستان كەلەدى.
م س ا ك موبيلدىك بريگاداسىنىڭ شاقىرتۋعا كەلۋ ۋاقىتى - 60 مينۋتقا دەيىن. بارىنشا شۇعىل ساناتتار ءۇشىن مىناداي نورماتيۆتەر: 10 مينۋت - ءبىرىنشى، 15 مينۋت - ەكىنشى جانە 30 مينۋت - ءۇشىنشى ساناتتاعى شاقىرتۋلار ءۇشىن كوزدەلگەن.
وسى جىلدىڭ ءبىرىنشى توقسانىندا قازاقستاندا جەدەل جاردەم قىزمەتى 2, 1 ميلليوننان استام شاقىرتۋعا قىزمەت كورسەتتى. ەڭ كوپ وتىنىشتەر جەدەلدىلىكتىڭ 4-ساناتى بويىنشا
تىركەلدى 763463 شاقىرتۋ، ونىڭ 518 مىڭنان استامىنا م س ا ك موبيلدىك بريگادالارى قىزمەت كورسەتتى. 1-سانات بويىنشا شاقىرتۋلاردىڭ سانى 104443، 2-سانات بويىنشا – 642312، 3-سانات بويىنشا - 574580 شاقىرتۋدى قۇرادى.
ەسەپتى كەزەڭدە ءساتتى رەانيماتسيا كورسەتكىشى %55,6 عا دەيىن ءوستى، بۇل شۇعىل كومەك كورسەتۋ رەتىندەگى وڭ ديناميكانى كورسەتەدى.
ق ر دەنساۋلىق ساقتاۋ مينيسترلىگى شۇعىل كومەككە مۇقتاج ءاربىر ادام ءۇشىن جەدەل مەديتسينالىق كومەككە شاقىرتۋ قولجەتىمدى بولىپ قالاتىنىن اتاپ ءوتتى. وزگەرىستەر جۇيەنىڭ تيىمدىلىگىن ارتتىرۋعا، كۇتۋ ۋاقىتىن قىسقارتۋعا جانە بارلىق دەڭگەيلەردە مەديتسينالىق كومەكتى جاقسارتۋعا باعىتتالعان.
ەسكە سالا كەتەيىك، بۇعان دەيىن جەدەل جاردەم قىزمەتى اكىمدىكتەردىڭ قۇزىرەتىنە بەرىلۋى مۇمكىن ەكەنىن جازعان ەدىك.
اۆتور
باقىتگۇل اباي قىزى
