ماليدە قارۋلى توپتار جاپپاي شابۋىل باستادى

استانا. KAZINFORM - ماليدە قارۋلى توپتار ەلدىڭ بىرنەشە وڭىرىندە ءبىر مەزگىلدە ۇيلەستىرىلگەن شابۋىلدار ۇيىمداستىردى، دەپ حابارلايدى BBC.

ەل استاناسى باماكودا جارىلىستار مەن اتىس داۋىستارى ەستىلگەن. اسكەري بيلىك قاقتىعىستاردىڭ جالعاسىپ جاتقانىن راستادى.

- قورعانىس جانە قاۋىپسىزدىك كۇشتەرى قازىرگى ۋاقىتتا شابۋىلدىڭ بەتىن قايتارۋ جۇمىستارىن جۇرگىزىپ جاتىر، - دەلىنگەن رەسمي مالىمدەمەدە.

كۋاگەرلەر Reuters اگەنتتىگىنە كاتي اسكەري بازاسى ماڭىندا جارىلىستار بولعانىن جانە اتىس جۇرگەنىن ايتقان. اسكەريلەر بۇل ايماقتا جولداردى جاۋىپ تاستاعان.

سونداي-اق ەلدىڭ سولتۇستىگىندەگى گاو مەن كيدال قالالارىندا، ورتالىقتاعى سيەۆارە اۋدانىندا دا قاقتىعىستار تىركەلگەن. ساراپشىلار بۇل سوڭعى جىلدارداعى ەڭ ءىرى شابۋىلداردىڭ ءبىرى بولۋى مۇمكىن ەكەنىن ايتادى.

ا ق ش ەلشىلىگى ازاماتتارىنا ۇيلەرىنەن شىقپاۋعا كەڭەس بەردى. مالىمەتتەرگە سايكەس، باماكوداعى موديبو كەيتا حالىقارالىق اۋەجايى ماڭىندا دا جارىلىستار مەن اتىس بولعان.

مالي اسكەرى جاعداي باقىلاۋدا ەكەنىن مالىمدەگەنىمەن، الەۋمەتتىك جەلىلەردە تاراعان ۆيدەولار شابۋىلدارعا دجاماات- نۋسرات ال- يسلام ۆال- مۋسليمين (JNIM) توبى مەن ازاۆادتى ازات ەتۋ فرونتى (FLA) قاتىسى بولۋى مۇمكىن ەكەنىن كورسەتەدى.

FLA وكىلى موحامەد ەلماۋلۋد رامادان كيدال قالاسى كوتەرىلىسشىلەردىڭ باقىلاۋىنا وتكەنىن جانە ولاردىڭ ىقپالى كەڭەيىپ جاتقانىن مالىمدەدى. الايدا بۇل اقپارات تاۋەلسىز تۇردە راستالعان جوق.

ايتا كەتەيىك، ماليدە 2020 -جىلعى توڭكەرىستەن كەيىن بيلىككە كەلگەن گەنەرال اسسيمي گويتا باستاعان اسكەري ۇكىمەت ەلدەگى قاۋىپسىزدىكتى تۇراقتاندىرۋعا ۋادە بەرگەن بولاتىن. سوعان قاراماستان، ەلدىڭ سولتۇستىگى مەن شىعىسىندا جاعداي ءالى دە تۇراقسىز كۇيىندە قالىپ وتىر.

بۇعان دەيىن مەكسيكادا تۋريستەرگە شابۋىل جاسالعانى ءمالىم بولدى.