ماۋلەن اشىمبايەۆ تۇركيا ۇلى ۇلتتىق ءماجىلىسىنىڭ توراعاسىمەن كەزدەستى

استانا. KAZINFORM - پارلامەنت سەناتىنىڭ سپيكەرى ماۋلەن اشىمبايەۆ تۇركيا ۇلى ۇلتتىق ءماجىلىسىنىڭ ءتوراعاسى نۋمان كۋرتۋلمۋشپەن كەزدەستى، دەپ حابارلايدى ق ر پارلامەنتى سەناتىنىڭ باسپا ءسوز قىزمەتى.

وندا تاراپتار پارلامەنتارالىق ىنتىماقتاستىقتى ودان ءارى نىعايتۋ جانە ەكى ەل اراسىنداعى ستراتەگيالىق سەرىكتەستىكتى كەڭەيتۋ ماسەلەلەرىن تالقىلادى.

ماۋلەن اشىمبايەۆ مەيمانعا ءىلتيپات تانىتىپ، بيىل قازاقستاندا بولعان الاپات سۋ تاسقىنى كەزىندە باۋىرلاس تۇركيا ەلىنىڭ گۋمانيتارلىق كومەك جىبەرىپ، قولداۋ كورسەتكەنى ءۇشىن العىس ءبىلدىردى.

سونىمەن قاتار سەنات ءتوراعاسى تۇركيا قازاقستاننىڭ اسا ماڭىزدى ستراتەگيالىق سەرىكتەسى ەكەنىن اتاپ ءوتتى. ەكى ەلدىڭ مەملەكەت باسشىلارى اراسىنداعى جوعارى دەڭگەيدەگى قارىم-قاتىناس قازاقستان مەن تۇركيا ىنتىماقتاستىعىن ودان ءارى نىعايتۋدا ماڭىزدى ءرول اتقارادى.

«ءبىزدىڭ ەلدەرىمىز اراسىندا بەرىك ساياسي ديالوگ ورنادى. ەكونوميكالىق جانە مادەني-گۋمانيتارلىق بايلانىستارىمىز دا جان-جاقتى دامىپ كەلەدى. ءبىز تۇركيانىڭ ۇلى ۇلتتىق ماجىلىسىمەن ىنتىماقتاستىقتى دامىتۋعا جانە زاڭنامالىق باعىتتا تاجىريبە الماسۋعا مۇددەلىمىز. پارلامەنتتەردىڭ قۇزىرەتىنە جاتاتىن وزەكتى ماسەلەلەردى شەشۋ جولىندا «قازاقستان-تۇركيا» پارلامەنتارالىق دوستىق توپتارىنىڭ الەۋەتىن ءتيىمدى پايدالانۋدىڭ ماڭىزى زور. ءسىزدىڭ ساپارىڭىز پارلامەنتارالىق ديالوگتى نىعايتۋعا جانە ەلدەرىمىز اراسىنداعى ستراتەگيالىق سەرىكتەستىكتى كەڭەيتۋگە تىڭ سەرپىن بەرەدى دەپ سەنەمىز»، - دەگەن ماۋلەن اشىمبايەۆ بۇگىنگى كەزدەسۋ قازاقستان مەن تۇركيا اراسىنداعى دوستىق جانە ىنتىماقتاستىق تۋرالى شارتتىڭ 30 جىلدىعىمەن قاتار كەلگەنىنە نازار اۋداردى.

كەزدەسۋ بارىسىندا پارلامەنتارالىق وداق، ە ق ى ۇ پ ا جانە تۇركپا اياسىنداعى ءوزارا بايلانىستىڭ پەرسپەكتيۆالارى دا تالقىلاندى. سونداي-اق سۇحباتتاسۋشىلار ءبىرقاتار بىرلەسكەن جوبا جونىندە پىكىر الماستى.

ناقتى ايتقاندا، ساۋدا-ەكونوميكالىق جانە ينۆەستيتسيالىق ىنتىماقتاستىقتى نىعايتۋ، كولىك-لوگيستيكا سالاسىن دامىتۋ جانە باسقا دا باعىتتاعى بىرلەسكەن ءىس-قيمىلدى ارتتىرۋ ماسەلەلەرى اڭگىمەگە ارقاۋ بولدى.

بۇدان بولەك، ماۋلەن اشىمبايەۆ پارلامەنتتىڭ قازاقستان پرەزيدەنتىنىڭ باستاماسىمەن ىسكە اسىرىلىپ جاتقان رەفورمالاردى زاڭنامالىق تۇرعىدان قامتاماسىز ەتۋ باعىتىنداعى جۇمىسىنا توقتالدى. كەزدەسۋدە الەمدىك جانە ءداستۇرلى دىندەر ليدەرلەرىنىڭ سەزىن دامىتۋدىڭ 2023-2033-جىلدارعا ارنالعان تۇجىرىمداماسى تۋرالى دا ايتىلدى.

ءوز كەزەگىندە نۋمان كۋرتۋلمۋش قازاقستاندا قولعا الىنعان رەفورمالاردىڭ ماڭىزدىلىعىن اتاپ ءوتتى. سونداي-اق ول پارلامەنتارالىق ىنتىماقتاستىقتى نىعايتۋ جولىندا اتقارىلىپ جاتقان جۇمىستارعا جانە رۋحاني ديپلوماتيانى دامىتۋ باعىتىندا سەزد حاتشىلىعى قابىلداعان شارالارعا ەرەكشە نازار اۋداردى.