ماۋلەن اشىمبايەۆ قازاقستاندا بوچچانى دامىتۋدىڭ باسىم باعىتتارىن بەلگىلەپ بەردى
استانا. KAZINFORM - پارلامەنت سەناتىنىڭ ءتوراعاسى، قازاقستان بوچچا فەدەراتسياسىنىڭ پرەزيدەنتى ماۋلەن اشىمبايەۆ ەلىمىزدە پاراليمپيادالىق بوچچانى ودان ءارى دامىتۋعا ارنالعان وتىرىسقا قاتىستى.
ءىس-شارادا رەسپۋبليكالىق فەدەراتسيا مەن وڭىرلىك وكىلدىكتەردىڭ بىرلەسكەن جۇمىسىن ءارى قاراي جانداندىرۋ ماسەلەلەرى جانە جاڭا جوبالار تالقىلاندى.
ءوز سوزىندە ماۋلەن اشىمبايەۆ مەملەكەت باسشىسى قاسىم-جومارت توقايەۆتىڭ تاپسىرماسى بويىنشا ەلىمىزدە ينكليۋزيۆتى، كەدەرگىسىز ورتا جانە ازاماتتارعا تەڭ مۇمكىندىكتەر قالىپتاستىرۋ باعىتىندا كەشەندى شارالار قابىلدانىپ جاتقانىن اتاپ ءوتتى. وڭىرلەردە بوچچا فەدەراتسيالارىنىڭ اشىلۋى جانە ولاردىڭ اتالعان سپورت ءتۇرىن دارىپتەۋگە بەلسەندى قاتىسۋى وسىنداي جۇيەلى ءارى ناقتى جۇمىستىڭ ناتيجەسى ەكەنى انىق.
«وڭىرلەردە جۇمىستى ودان ءارى جانداندىرۋ پاراسپورتشىلارىمىزعا كورسەتىلەتىن قولداۋدىڭ اياسىن كەڭەيتەدى جانە بوچچادان ۇلتتىق قۇراماعا ىرىكتەۋ جۇرگىزۋگە وڭ ىقپالىن تيگىزەدى. بىلتىر ەلىمىزدىڭ حالىقارالىق بوچچا فەدەراتسياسىنا قوسىلۋى ارقىلى الدىمىزعا قويعان ماقسات-مىندەتتەرىمىز ايقىندالا ءتۇستى. بۇل -ءبىزدىڭ ورتاق جۇمىسىمىزدىڭ ناتيجەسى. فەدەراتسيا مەن وڭىرلىك وكىلدىكتەردى دامىتۋدىڭ الداعى ءتورت جىلعا ارنالعان ءبىرىڭعاي ستراتەگياسى ءبىزدىڭ بوچچاشىلارىمىزعا 2028 -جىلى لوس-اندجەلەستە وتەتىن پاراليمپيادا ويىندارىنا جولداما الۋعا مۇمكىندىك بەرەدى»، - دەدى قازاقستان بوچچا فەدەراتسياسىنىڭ پرەزيدەنتى.
ماۋلەن اشىمبايەۆ اتاپ وتكەندەي، الدا بوچچانىڭ مارتەبەسىن ودان ءارى ارتتىرۋعا جانە سپورتشىلاردى دايارلاۋعا قاتىستى اۋقىمدى مىندەتتەر تۇر. وسىعان وراي رەسپۋبليكالىق بوچچا فەدەراتسياسىنىڭ باسشىسى قازاقستاندا اتالعان سپورت ءتۇرىن دامىتۋدىڭ ءۇش باسىم باعىتىن بەلگىلەپ بەردى.
«الدىمەن، پاراسپورتشىلارىمىزدىڭ الەۋەتىن ارتتىرىپ، ولاردىڭ جارىستا جوعارى ناتيجەلەرگە قول جەتكىزۋىنە جانە حالىقارالىق رەكوردتار ورناتۋىنا قاجەتتى جاعداي جاساۋ قاجەت. ترەنينگتەر مەن حالىقارالىق تاجىريبەنى زەردەلەۋ ارقىلى جاتتىقتىرۋشىلار قۇرامىنىڭ بىلىكتىلىگىن ارتتىرۋ دا اسا ماڭىزدى. ەكىنشى باعىت - «بارشاعا ارنالعان بوچچا». بۇل - مۇگەدەكتىگى بار ازاماتتاردى ورتاعا بەيىمدەۋگە ىقپال ەتەتىن ماڭىزدى قادام. سونداي- اق سپورتتاعى ينكليۋزيۆتى جانە ينتەگراتسيالانعان ءتاسىلدىڭ جارقىن كورىنىسى. وسىلايشا بوچچانىڭ ءارتۇرلى توپتاعى ادامدار ءۇشىن قولجەتىمدى ەكەنىن دارىپتەيمىز. ۇشىنشىدەن، وڭىرلەردە بوچچانى دامىتۋدىڭ ماڭىزى زور. وسى باعىتتا وڭىرلىك فەدەراتسيالار ۇلكەن ءرول اتقارادى دەپ سەنەمىن»،- دەدى ماۋلەن اشىمبايەۆ.
سونىمەن قاتار وتىرىسقا قاتىسۋشىلار بوچچانى ودان ءارى دامىتۋعا قاتىستى وزەكتى ماسەلەلەردى تالقىلادى. اتاپ ايتقاندا، فەدەراتسيالاردى اككرەديتتەۋ، قارجىلاندىرۋ، ينفراقۇرىلىمدى جاقسارتۋ جانە اقپاراتتىق- اعارتۋ جۇمىستارىن كۇشەيتۋ جونىندەگى جۇمىستار ءسوز بولدى.
وتىرىس بارىسىندا قازاقستان بوچچا فەدەراتسياسىنىڭ باس حاتشىسى نۇرگۇل ولجەكوۆا وڭىرلىك فەدەراتسيالاردىڭ قىزمەتى مەن جوسپارلارى تۋرالى بايانداما جاسادى.
ايتا كەتەيىك، قازىرگى تاڭدا بوچچادان ۇلتتىق قۇراما ساپىندا ەلىمىزدىڭ 11 وڭىرىنەن (استانا، الماتى، شىمكەنت قالالارى جانە قاراعاندى، پاۆلودار، جەتىسۋ، جامبىل، ماڭعىستاۋ، اباي، اقتوبە، اتىراۋ وبلىستارى) 41 سپورتشى بار.
