ماۋلەن اشىمبايەۆ قاسيەتتى تاقتىڭ قازاقستانداعى اپوستولدىق نۋنتسيىمەن كەزدەستى
استانا. KAZINFORM - پارلامەنت سەناتىنىڭ ءتوراعاسى ماۋلەن اشىمبايەۆ قاسيەتتى تاقتىڭ قازاقستانداعى اپوستولدىق نۋنتسيى دجوردج دجوردج پانامتۋنديلمەن كەزدەستى.
وندا تاراپتار ەكى ەل اراسىنداعى ىنتىماقتاستىقتى نىعايتۋ جانە ءدىنارالىق ديالوگتى ىلگەرىلەتۋ اياسىندا سەرىكتەستىكتى ودان ءارى كەڭەيتۋ ماسەلەلەرىن تالقىلادى. بۇل تۋرالى ق ر پارلامەنتىنىڭ سەناتى باسپا ءسوز قىزمەتى ءمالىم ەتتى.
ماۋلەن اشىمبايەۆ دجوردج پانامتۋنديلدى ەلىمىزدەگى ميسسياسىنىڭ باستالۋىمەن قۇتتىقتاپ، قازاقستان مەن قاسيەتتى تاق اراسىندا كەلىسىمگە جانە ءوزارا سىيلاستىققا نەگىزدەلگەن ۇزاق مەرزىمدى سەرىكتەستىك قارىم- قاتىناس قالىپتاسقانىن اتاپ ءوتتى. ەكى مەملەكەت اراسىنداعى دوستىق بايلانىستى نىعايتۋعا جوعارى دەڭگەيدەگى بەلسەندى جانە سەنىمدى ديالوگ ىقپال ەتىپ كەلە جاتقانىن ايتتى.
«قازاقستان پرەزيدەنتى قاسىم-جومارت كەمەل ۇلى توقايەۆتىڭ جاقىندا ۆاتيكانعا جاساعان رەسمي ساپارى جانە ريم پاپاسى فرانتسيسكپەن كەزدەسۋى ەكىجاقتى ىنتىماقتاستىقتى ودان ءارى دامىتۋعا تىڭ سەرپىن بەردى. ءبىز كونفەسسياارالىق جانە وركەنيەتارالىق ديالوگتى دامىتۋ جولىندا قاسيەتتى تاقتىڭ ديكاستەرياسىمەن تىعىز جانە ناتيجەلى ىنتىماقتاستىقتى ءارى قاراي نىعايتۋعا مۇددەلىمىز. بىلتىر قازاقستان مەن ۆاتيكان اراسىنداعى قوسىمشا كەلىسىمدى راتيفيكاتسيالاۋ ءۇشىن ارنايى زاڭ قابىلداندى. قۇجات قازاقستان رەسپۋبليكاسى مەن قاسيەتتى تاق اراسىنداعى ديپلوماتيالىق قاتىناستاردى نىعايتۋعا، سونداي-اق، مادەنيەتارالىق جانە ءدىنارالىق ديالوگتى ودان ءارى دامىتۋعا ىقپال ەتەدى»، - دەدى پالاتا سپيكەرى.
كەزدەسۋ بارىسىندا سەنات ءتوراعاسى الەمدىك جانە ءداستۇرلى دىندەر ليدەرلەرى سەزى بىرلەسكەن كۇش- جىگەردىڭ ارقاسىندا دىندەر اراسىنداعى ءوزارا تۇسىنىستىك پەن سىيلاستىقتى نىعايتۋعا ارنالعان الاڭعا اينالعانىن ايتىپ، وسى باعىتتاعى جۇمىسقا جان-جاقتى جانە دايەكتى قولداۋ كورسەتكەنى ءۇشىن ۆاتيكان تاراپىنا ريزاشىلىق ءبىلدىردى.
سونىمەن قاتار ول رۋحاني ديپلوماتيانى دامىتۋدىڭ ماڭىزدى ەكەنىنە توقتالىپ، قازاقستاننىڭ كونفەسسياارالىق كەلىسىم جانە جاھاندىق ءدىنارالىق ديالوگتى ىلگەرىلەتۋ سالاسىنداعى باستامالارى تۋرالى ايتتى.
«بىلتىرعى قازان ايىندا ءبىز الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXI وتىرىسىن وتكىزدىك. سونىڭ ناتيجەسىندە سەزدى دامىتۋ تۇجىرىمداماسى قابىلداندى. قۇجاتتا قازاقستاندىق فورۋمدى دامىتۋدىڭ الداعى ون جىلعا ارنالعان جاڭارتىلعان باعىت-باعدارى ايقىندالدى. بۇل رەتتە رۋحاني ديپلوماتيانىڭ الەۋەتى زور ەكەنىن اتاپ وتكەن ءجون. وسىعان بايلانىستى سەزدىڭ قىزمەتى تەرروريزم، ەكسترەميزم، تەڭسىزدىك، كەدەيلىك، كليماتتىڭ وزگەرۋى سياقتى قازىرگى جاھاندىق پروبلەمالاردى شەشۋگە ىقپال ەتۋ ماقساتىمەن ءدىن كوشباسشىلارى، ساياساتكەرلەر مەن حالىقارالىق ۇيىمدار اراسىنداعى ىنتىماقتاستىقتى نىعايتۋعا باعىتتالادى»، - دەگەن ماۋلەن اشىمبايەۆ بىرلەسكەن جۇمىستىڭ باسىم باعىتتارىنا نازار اۋداردى.
كەزدەسۋ كەزىندە دجوردج پانامتۋنديل قاسيەتتى تاق قازاقستاننىڭ بەيبىتشىلىك يدەيالارىن، بارلىق دىندەردەگى ادامداردىڭ يگىلىگى ءۇشىن مادەنيەتتەر مەن دىندەر اراسىنداعى تۇراقتى ديالوگتى ىلگەرىلەتۋ جولىنداعى باستامالارىن قولدايتىنىن ايتتى. سونداي-اق ول قازاقستانمەن ءوزارا ءىس-قيمىلدى ودان ءارى نىعايتۋعا مۇددەلى ەكەنىن جەتكىزدى.
