ماۋلەن اشىمبايەۆ شۆەيتساريانىڭ قازاقستانداعى ەلشىسىمەن كەزدەستى
پارلامەنت سەناتىنىڭ ءتوراعاسى ماۋلەن اشىمبايەۆ شۆەيتساريا كونفەدەراتسياسىنىڭ قازاقستانداعى توتەنشە جانە وكىلەتتى ەلشىسى سالمان بالمەن كەزدەستى.
سۇحبات بارىسىندا تاراپتار ەكى ەل اراسىنداعى ىنتىماقتاستىقتى ودان ءارى نىعايتۋ ماسەلەلەرىن تالقىلادى، دەپ حابارلايدى Kazinform سەناتتىڭ باسپا ءسوز قىزمەتىنە سىلتەمە جاساپ.
سەنات سپيكەرى ەلشى سالمان بالدى قازاقستانداعى قىزمەتىنىڭ باستالۋىمەن قۇتتىقتاپ، شۆەيتساريا كونفەدەراتسياسى ەلىمىزدىڭ ەۋروپاداعى ماڭىزدى ساياسي جانە ەكونوميكالىق سەرىكتەستەرىنىڭ ءبىرى ەكەنىن اتاپ ءوتتى. وسىعان وراي ول حالىقارالىق ۇيىمدار اياسىندا ەكى ەلدىڭ پارلامەنتارالىق بايلانىسىن جانداندىرۋدىڭ ماڭىزدىلىعىنا نازار اۋداردى.
«قازاقستان پارلامەنتى شۆەيتساريامەن پارلامەنتارالىق ىنتىماقتاستىقتى دامىتۋعا مۇددەلى. مۇنداي بايلانىس ەكىجاقتى قارىم-قاتىناستىڭ ماڭىزدى بولىگى ەكەنى انىق. ءبىزدىڭ پارلامەنتتىڭ ەكى پالاتاسىندا دا شۆەيتساريا پارلامەنتىمەن دوستىق توپتارى جۇمىس ىستەيدى. ولاردىڭ الەۋەتىن بەلسەندى پايدالانۋىمىز كەرەك. وسى ورايدا پارلامەنت دەلەگاتسيالارىنىڭ ءوزارا ساپارلارىن ۇيىمداستىرۋعا، سونداي-اق، ەۋروپاداعى قاۋىپسىزدىك جانە ىنتىماقتاستىق ۇيىمىنىڭ پارلامەنتتىك اسسامبلەياسى، پارلامەنتارالىق وداق سياقتى حالىقارالىق ۇيىمدار شەڭبەرىندە شۆەيتساريا دەپۋتاتتارىمەن ىنتىماقتاستىقتى دامىتۋعا مول مۇمكىندىك بار»، - دەدى ماۋلەن اشىمبايەۆ.
كەزدەسۋ بارىسىندا پالاتا ءتوراعاسى قازاقستان مەن شۆەيتساريا اراسىنداعى ديپلوماتيالىق قاتىناستاردىڭ ورناعانىنا 30 جىل تولعانىن، وسى ۋاقىت ىشىندە ەكىجاقتى ىنتىماقتاستىق نىعايىپ، ءتۇرلى سالالاردا بىرلەسكەن جوبالار مەن باعدارلامالار تابىستى ىسكە اسىرىلعانىن اتاپ ءوتتى.
سونىمەن قاتار ماۋلەن اشىمبايەۆ قازاقستان پرەزيدەنتى قاسىم-جومارت توقايەۆتىڭ باستاماسىمەن ەلىمىزدە ىسكە اسىرىلىپ جاتقان اۋقىمدى ساياسي جاڭعىرتۋ باعدارلاماسىنىڭ ناتيجەلەرىنە نازار اۋداردى.
سەنات ءتوراعاسى رۋحاني ديپلوماتيانى دامىتۋ ماسەلەسىنە دە باسا ءمان بەردى. وسى ورايدا ول شۆەيتسارياعا الەمدىك جانە ءداستۇرلى دىندەر ليدەرلەرى سەزىنە بەلسەندى قولداۋ كورسەتىپ، فورۋم ماقساتتارىنا قول جەتكىزۋگە ەلەۋلى ۇلەسى قوسقانى ءۇشىن ريزاشىلىعىن ءبىلدىردى.
ءوز كەزەگىندە ەلشى قازاقستاندا جۇرگىزىلىپ جاتقان قوعامدىق-ساياسي وزگەرىستەردى جوعارى باعالاپ، ەكى ەل اراسىنداعى ىنتىماقتاستىقتى ودان ءارى نىعايتۋعا مۇددەلى ەكەنىن ءبىلدىردى.
