ماۋلەن اشىمبايەۆ ءۇندىستاننىڭ سايلاۋ جونىندەگى كوميسسارىمەن كەزدەستى

استانا. KAZINFORM - پارلامەنت سەناتىنىڭ ءتوراعاسى ماۋلەن اشىمبايەۆ ءۇندىستان رەسپۋبليكاسىنىڭ سايلاۋ جونىندەگى باس كوميسسارى رادجيۆ كۋمارمەن كەزدەستى.

Мәжіліске Малайзия Сенаты басшысының міндетін атқарушы келді
Фото: Ж. Жұмабеков

ماۋلەن اشىمبايەۆ ءوز سوزىندە رادجيۆ كۋماردى ءۇندىستاندا جالپى سايلاۋدىڭ وتكىزىلۋىمەن قۇتتىقتاپ، اتالعان مەملەكەت قازاقستاننىڭ ازياداعى ماڭىزدى سەرىكتەسى ەكەنىن ايتتى. سوڭعى جىلداردا ىنتىماقتاستىقتىڭ بارلىق نەگىزگى باعىتتارى بويىنشا ماڭىزدى ۋاعدالاستىقتارعا قول جەتكىزىلدى. حالىقارالىق ۇيىمدار اياسىندا دا پارلامەنتارالىق قارىم-قاتىناستى دامىتۋ ماسەلەسىنە باسا ءمان بەرىلىپ كەلەدى.

«قازاقستان ۇندىستانمەن ەكونوميكالىق ىنتىماقتاستىقتى، مادەنيەتارالىق ديالوگتى، تۋريزمدى جانە ەكى تاراپ تا مۇددەلى باسقا سالالاردى دامىتۋدى، سونداي-اق، اۋقىمدى ماسەلەلەر بويىنشا ءوزارا قارىم- قاتىناستى ودان ءارى تەرەڭدەتۋدى كوزدەيدى. ءبىز پارلامەنتارالىق بايلانىستاردى دا نىعايتۋعا مۇددەلىمىز. وسىعان بايلانىستى ەكى ەلدىڭ پارلامەنتتەرىندە جۇمىس ىستەيتىن جانە ءوزارا قارىم-قاتىناسىمىزدىڭ نەگىزگى تەتىكتەرىنىڭ ءبىرى سانالاتىن دوستىق توپتارىنىڭ الەۋەتىن ءتيىمدى پايدالانۋدىڭ ماڭىزى زور»، - دەدى سەنات ءتوراعاسى.

كەزدەسۋ بارىسىندا ماۋلەن اشىمبايەۆ مەملەكەت باسشىسىنىڭ باستاماسىمەن ەلىمىزدە ىسكە اسىرىلىپ جاتقان رەفورمالارعا، ونىڭ ىشىندە قازاقستان كونستيتۋتسياسىنا ەنگىزىلگەن ماڭىزدى تۇزەتۋلەرگە دە توقتالىپ ءوتتى. سەنات سپيكەرى زاڭنامالىق وزگەرىستەر بيلىكتى ورتالىقسىزداندىرۋ، ساياسي جۇيەنىڭ تەجەمەلىگى مەن تەپە-تەڭدىگىن كۇشەيتۋ جانە ساياسي پارتيالار اراسىنداعى باسەكەلەستىكتى ارتتىرۋ باعىتىندا جۇرگىزىلگەنىن تىلگە تيەك ەتتى.

ءوز كەزەگىندە رادجيۆ كۋمار قازاقستانداعى الەۋمەتتىك-ەكونوميكالىق جانە ساياسي وزگەرىستەردى، اتاپ ايتقاندا، ازاماتتاردىڭ قۇقىقتارى مەن مۇددەلەرىن قورعاۋعا ارنالعان باستامالاردى جوعارى باعالادى. سونداي-اق ەكى ەل اراسىنداعى پارلامەنتارالىق ىنتىماقتاستىقتى ودان ءارى نىعايتۋعا مۇددەلى ەكەنىن جەتكىزدى.

سەنات ءتوراعاسى ءۇندىستاننىڭ ءدىن قايراتكەرلەرى الەمدىك جانە ءداستۇرلى دىندەر كوشباسشىلارىنىڭ سەزىنە بەلسەندى قاتىسىپ كەلە جاتقانى ءۇشىن العىس ءبىلدىرىپ، قازاقستان رۋحاني ديپلوماتيانى دامىتۋعا باسا ءمان بەرىپ وتىرعانىن ايتتى. سۇحبات كەزىندە سەزد حاتشىلىعىنىڭ قىزمەتى مەن جۇمىس جوسپارى تۋرالى دا ءسوز بولدى.

سوڭعى جاڭالىقتار