مال ولەكسەسىن ورتەۋ ءۇشىن اقتوبە ءوڭىرى استانادان ينسينەراتور الدىرىپ جاتىر

اقتوبە. KAZINFORM - اقتوبەدە الدىن الا ەسەپ بويىنشا 10 مىڭنان استام مال قىرىلدى. قازىر ونى جويۋ جۇمىستارى ءجۇرىپ جاتىر.

اقتوبە وبلىسى بويىنشا سۋعا كەتكەن اۋداندارداعى اۋىلداردا مال شىعىنى ءالى ەسەپتەلىپ جاتىر. وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى قۇسايىن سارسەمبايدىڭ ايتۋىنشا، 10170 باس مال قىرىلعان.

- قازىرگى كەزدە ءبىز 3 مىڭنان استام مال باسىن انىقتاپ وتىرمىز. ءۇش ءتۇرلى ءتىزىم جاسالىپ جاتىر. ءبىرىنشىسى، قۇجاتتارى تۇگەل، تىزىمگە الىنعان، ولىمتىگى بار، كوزبەن كورىپ تۇرعان مال. ەكىنشىسى، ولىمتىگى بار، تىزىمدە بار، ءبىراق سىرعاسى جوق، ءتۇسىپ قالعان. ءۇشىنشىسى، سۋعا اعىپ كەتكەن مال. قالاي انىقتالىپ، قالاي قايتارىلاتىنى الداعى ۋاقىتتا شەشىلەدى. ال ولەكسەنى جيناۋ جۇمىستارىن ۆەتەرينار ماماندار اتقارىپ جاتىر. كەشە 1223 باس جيناپ، جويدى. بىزدە ينسينەراتور بار. سونىمەن ورتەيدى. ونىڭ قۋاتى ازداۋ بولعان سوڭ پرەمەر-ءمينيستردىڭ ورىنباسارى سەرىك ءجۇمانعاريننىڭ تاپسىرماسىمەن استانادان 3 توننالىق ينسينەراتور الدىرىپ جاتىرمىز. جەتكىزىلگەندە قالعان ولەكسەنى جيناپ، ورتەۋگە مۇمكىندىك بولادى، - دەدى وبلىستىق اۋىل شارۋاشىلىعى جانە جەر قاتىناستارى باسقارماسىنىڭ باسشىسى قۇسايىن سارسەمباي.

ونىڭ ايتۋىنشا، قازىر سۋ تاسقىنى بولعان بارلىق اۋداندا مال ولەكسەسى جينالىپ جاتىر. كەيبىر اۋىلدا جەر كەپپەي، بۇل جۇمىستاردى اتقارۋعا كەدەرگى كەلتىردى.

ايتا كەتەيىك، مال شىعىنى رەسپۋبليكالىق بيۋدجەت ەسەبىنەن وتەلۋى مۇمكىن. بولجام بويىنشا شىعىن كولەمى 2,2 ميلليارد تەڭگە بولادى. بۇل 1743 باس ءىرى قارا مال، 7018 باس ۇساق مال جانە 1409 باس جىلقى شىعىنىنا تەڭ.