مال شارۋاشىلىعىن جۇرگىزبەگەن كاسىپكەرلەردەن جەر قايتارىپ الىنادى - ۇكىمەت باسشىسى
استانا. KAZINFORM - كەيبىر ءىرى جەر يەلەنۋشىلەر ماۋسىمدىق كەزەڭدە عانا جۇمىس ىستەپ، قالعان ۋاقىتتا اۋىلدا جۇمىسسىزدىق بەلەڭ الادى. بۇل تۋرالى مەملەكەت باسشىسى قاسىم-جومارت توقايەۆتىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا پرەمەر- مينيستر ولجاس بەكتەنوۆ ايتتى.
- اگروونەركاسىپ كەشەنىندە سالانىڭ كورسەتكىشتەرىنە عانا ەمەس، سونىمەن قاتار اۋىلداعى ءومىر ساپاسىنا دا اسەر ەتىپ وتىرعان ءبىرقاتار شەشىمىن كۇتكەن ماسەلەلەر بار. كولەمدى ينۆەستيتسيالار مەن ۇزدىك اگروتەحنولوگيالار ەگىنشىلىك سالاسىندا ونىمدىلىكتى ارتتىرۋعا مۇمكىندىك بەرسە، مال شارۋاشىلىعى بۇل جاعىنان ەداۋىر ارتتا قالىپ قويدى. اتالعان سالادا ءوسىم 2-3 پايىزدان اسپايدى. بۇل ارينە، ءوزىن- ءوزى قامتاماسىز ەتۋ، وڭدەۋدى دامىتۋ، ەكسپورت كولەمىن ارتتىرۋ سياقتى ماسەلەلەردى شەشۋگە مۇمكىندىك بەرمەيدى. ۆەتەريناريا، مال شارۋاشىلىعىن عىلىمي جانە كادرلىق قامتاماسىز ەتۋ باعىتىندا دا ماسەلەلەر جەتكىلىكتى، - دەدى ۇكىمەت باسشىسى.
ونىڭ مالىمەتىنشە، كەيبىر ءىرى جەر يەلەنۋشىلەر ماۋسىمدىق كەزەڭدە عانا جۇمىس ىستەپ، قالعان ۋاقىتتا اۋىلدا جۇمىسسىزدىق بەلەڭ الادى. سوندىقتان 10 مىڭ گەكتاردان استام جەردى پايدالانىپ وتىرعان كاسىپكەرلەرگە مىندەتتى تۇردە مال شارۋاشىلىعىن جۇرگىزۋ تالاپتارى قويىلدى. ورىنداماعان جاعدايدا، ءتيىستى شارالار قابىلدانادى، ونىڭ ىشىندە جەردى قايتارىپ الۋ تەتىكتەرى دە بار.
- مال شارۋاشىلىعىن دامىتۋ بويىنشا كەشەندى جوسپاردا اسىل تۇقىمدى مال باسىن ساتىپ الۋعا جەڭىلدەتىلگەن نەسيە بەرۋ، مالشىلاردىڭ بالالارىنا ءبىلىم گرانتتارىن ۇسىنۋ، جاساندى ۇرىقتاندىرۋدىڭ زاماناۋي تەحنولوگيالارىن ەنگىزۋ جانە جايىلىمدىق مال شارۋاشىلىعىن دامىتۋ شارالارى كوزدەلگەن، - دەدى ولجاس بەكتەنوۆ.
بۇعان دەيىن پرەمەر- مينيستر وڭدەۋ ونەركاسىبىنىڭ قازىرگى ءوسۋ قارقىنى ەكونوميكانى تولىققاندى ءارتاراپتاندىرۋ ءۇشىن جەتكىلىكسىز ەكەنىن ايتقان ەدى.
