ماكرون مەن شولتس ەۋروپا ءۇشىن جاڭا باعىت قۇرۋدى جوسپارلاپ وتىر
استانا. KAZINFORM - فرانسيا پرەزيدەنتى مەن گ ف ر كانسلەرى ا ق ش پرەزيدەنتىنىڭ ەۋرووداق تاۋارلارىنا باج سالىعىن ەنگىزۋ قوقان - لوققىلارى تۇسىندا ەۋروپانى كۇشتى جانە تۇراقتى ەتۋ قاجەتتىگىن مالىمدەدى، دەپ حابارلايدى Euronews.
ەممانيۋەل ماكرون ءسوزىن ەۋروپاعا باعىتتاپ، بىرلىكتى نىعايتۋعا، كوبىرەك امبيتسيا مەن باتىلدىق تانىتىپ، تاۋەلسىز بولۋعا شاقىردى. بۇل مالىمدەمە پاريجدەگى ەليسەي سارايىندا گەرمانيا كانسلەرى ولاف شولتسپەن كەزدەسۋىندە جاسالدى.
ەكى كوشباسشى ا ق ش- تىڭ جاڭا پرەزيدەنتى دونالد ترامپتىڭ ەو يمپورتىنا باج سالىعىن ەنگىزۋ قاۋپى جاعدايىندا ەۋروپانى كۇشتى جانە تۇراقتى ەتۋ قاجەتتىلىگى تۋرالى ايتتى.
-ءبىزدىڭ ۇستانىمىمىز انىق: ەۋروپا - شامامەن 450 ميلليون ادام تۇراتىن ۇلكەن ەكونوميكالىق كەڭىستىك. ءبىز كۇشتىمىز جانە ءبىرتۇتاسپىز. ەۋروپا تايسالماي، جاسىرىنبايدى، كەرىسىنشە، سىندارلى جانە وزىنە سەنىمدى سەرىكتەس بولادى. وسى نەگىزدە ءبىز ا ق ش- پەن جانە امەريكانىڭ جاڭا پرەزيدەنتىمەن تابىستى ىنتىماقتاساتىن بولامىز، - دەپ مالىمدەدى ولاف شولتس.
ماكروننىڭ پىكىرىنشە، پاريج مەن بەرلين ترانساتلانتيكالىق بايلانىستاردى ساقتاي وتىرىپ، ءوز مۇددەسىن قورعاۋعا قابىلەتتى كۇشتى ەۋروپانى قۇرۋدا جەتەكشى ءرول اتقارۋى كەرەك.
ماكرون فرانسۋز- گەرمان سەرىكتەستىگى ەۋروپالىق كۇش پەن تۇراقتىلىقتىڭ ەڭ ماڭىزدى شارتى بولىپ قالا بەرەتىنىن اتاپ ءوتتى.
ەسكە سالا كەتەيىك، بۇعان دەيىن ماكرون ارميانى نىعايتۋ ءۇشىن جاس ەرىكتىلەردى تارتۋعا نيەتتى ەكەنىن جازعان بولاتىنبىز.
