ماكرون: حاماستى جازالاۋ كەرەك، ءبىراق بەيبىت تۇرعىندار كىنالى ەمەس
فرانسيا پرەزيدەنتى ەممانيۋەل ماكرون قازاقستانعا رەسمي ساپارى اياسىندا Maqsut Narikbayev University ستۋدەنتتەرىنە ءدارىس وقىپ، ساۋالدارىنا جاۋاپ بەرىپ جاتىر.
تاياۋ شىعىس جانە يزرايل مەن پالەستينا قاقتىعىسى تۋرالى دا پىكىر ءبىلدىردى، دەپ حابارلايدى Kazinform.
ايتۋىنشا، فرانسيادا يزرايلدى دە، پالەستينانى دا قولدايتىندار بار.
«مەنىڭ كوشباسى رەتىندە پوزيتسيام قانداي؟ بۇل جاي عانا ءبىر جەردە وقي سالاتىن ماسەلە ەمەس. ءبىز يزرايلگە جاسالعان تەرروريستىك شابۋىلداردىڭ بارلىعى دۇرىس ەمەس دەپ ەسەپتەيمىز. ءبىز وسى مەملەكەتتى قولدايمىز. ەشكىم ءوز مەملەكەتىندە بىرەۋدىڭ ولتىرىلگەنىن، مىڭداعان ادامنىڭ ءومىرى قيىلعانىن قالاماس ەدى. بۇل تەررورلىق شابۋىلداردى ايىپتاۋىمىز كەرەك»، - دەپ اتاپ ءوتتى فرانسيا باسشىسى.
ەكىنشىدەن ماكرون حالىقارالىق قۇقىقتى ساقتاۋ كەرەكتىگىن ايتتى.
«تەررورلىق حاماستى جازالاۋ كەرەك، ءبىراق سول جەردە ءومىر سۇرەتىن بەيبىت تۇرعىندار كىنالى ەمەس، ولاردى قورعاۋ كەرەك. سول سەبەپتى، گازاداعى تۇرعىنداردى قورعاۋ ءۇشىن، قۇتقارۋ ءۇشىن گۋمانيتارلىق كومەك جىبەرۋدى سۇرادىق، ەشقانداي تەررورلىق شابۋىلعا قاتىسى جوق ادامداردى قورعاۋ كەرەك دەپ ەسەپتەيمىز.
مەنىڭ كوڭىلىمە تولمايتىن نارسە - ادامداردىڭ ءومىرىن الالايتىندار بار. پالەستينالىقتاردىڭ ءومىرى نەمەسە يزرايلدىكتەردىڭ ءومىرى ماڭىزدىراق دەگەن اقىلعا قونبايتىن پىكىرتالاس بار. مەنىڭ ويىمشا، بۇل جەردە جالپى ادامنىڭ ءومىرى تۋرالى، ادامنىڭ قۇندىلىقتارى ەرەكشە دەگەن تۇسىنىكتەر ايتىلۋى كەرەك. بۇل ب ۇ ۇ- دا نەگىزدەلگەن. سونىمەن ءبىزدىڭ ويىمىز - بىرىنشىدەن، تەرروريزممەن كۇرەسۋ، ەكىنشىدەن - حالىقتى قورعاۋ، ءۇشىنشى - ساياسي ديالوگ قۇرۋ كەرەك»، - دەدى ەممانيۋەل ماكرون.
ەسكە سالايىق، فرانسيا پرەزيدەنتى ەممانيۋەل ماكرون رەسمي ساپارمەن قازاقستانعا كەلدى. قاسىم-جومارت توقايەۆ اقوردادا فرانسيا پرەزيدەنتى ەممانيۋەل ماكروندى قارسى الدى.
