ماكرون حالىققا جولداۋىندا نە ايتتى
استانا. KAZINFORM - فرانسيا پرەزيدەنتى 5-جەلتوقساندا رەسپۋبليكانىڭ 73 جاستاعى پرەمەر-ءمينيسترى ميشەل بارنەنىڭ وتستاۆكاسىن قابىلداعاننان كەيىن ەفيرگە شىعۋ تۋرالى شەشىم قابىلدادى.
فرانسيا ساياسي داعدارىس جاعدايىندا ءوز پرەزيدەنتىنىڭ ءسوزىن كۇتتى. 10 مينۋتتىق سوزىندە ەممانيۋەل ماكرون قازىرگى جاعدايعا ءوزىنىڭ كوزقاراسىن بەلگىلەدى. «Le Figaro» باسىلىمى فرانسيا پرەزيدەنتى ءسوزىنىڭ كەلەسى نەگىزگى اسپەكتىلەرىنە توقتالدى.
1. ەممانيۋەل ماكرون ۇلتتىق اسسامبلەيانى جازدا تاراتۋ تۋرالى شەشىمىن «تۇسىنبەگەنىن» مويىندادى. التى ايدان كەيىن رەسپۋبليكا پرەزيدەنتى «بۇل ءسوزسىز» شارا بولعانىمەن، ونىڭ شەشىمى «تۇسىنىلمەگەنىن» مويىندادى.
«بۇل مەنىڭ جاۋاپكەرشىلىگىم»، - دەدى ماكرون. زاڭ شىعارۋشى ورگاندارعا جاڭا سايلاۋدى تاعايىنداۋ تۋرالى ءوز تاڭداۋىن اقتاۋ ءۇشىن ول سول كەزدە ەكسترەمالدى كۇشتەردىڭ الدا تۇرعانىن جانە وسى كۇزدە سەنىمسىزدىك ۆوتۋمىن جاريالاعانىن اتاپ ءوتتى.
2. پرەزيدەنت رەسپۋبليكاعا قارسى مايدانداعى اسىرەوڭشىلدار مەن سولشىلداردىڭ «وداقتاسۋىن» ايىپتادى. Associated Press پىكىرىنشە، فرانسۋز كوشباسشىسىنىڭ ءسوز سويلەۋى ءبىرشاما اگرەسسيۆتى بولىپ، ەل بيلىگىنىڭ كۇيرەۋى ءۇشىن بارلىق كىنانى «ۇلتتىق بىرلەستىكتەگى» قارسىلاستارى مەن اسىرەسولشىلدارعا جۇكتەگەن. ول اسىرەوڭشىلداردى ەرەكشە اتاپ ءوتىپ، «ولار تارتىپسىزدىكتى تاڭداعانىن» مالىمدەدى.
3. بەيسەنبىدە سويلەگەن سوزىندە ەممانيۋەل ماكرون پرەزيدەنت رەتىندە قالۋعا نيەتتى ەكەنىنە ەش كۇمان قالدىرعان جوق.
«سىزدەر ماعان بەرگەن ماندات 5 جىلعا ەسەپتەلگەن، مەن ونى سوڭىنا دەيىن ورىندايمىن»، - دەدى ول. فرانسۋز كوشباسشىسى رەسپۋبليكا ساياساتكەرلەرىنىڭ ونى وتستاۆكاعا كەتۋگە شاقىرعان مالىمدەمەسىنە وسىلايشا جاۋاپ بەردى.
4. ماكرون وزىنە سەنىمسىزدىك ۆوتۋمىنا ۇشىراتپاۋعا مىندەتتەنەتىن «بارلىق ساياسي كۇشتەردى بىلدىرەتىن ورتاق مۇددەلەر ۇكىمەتىن» قۇرۋ تۋرالى حابارلايدى. الايدا فرانسيا باسشىسى جاڭا پرەمەر-مينيستر لاۋازىمىنا كانديداتتى ءالى اتاعان جوق.
سونىمەن قاتار، پرەزيدەنت ميشەل بارنەگە ەڭبەگى مەن ادالدىعى ءۇشىن العىس ءبىلدىردى. ۇلتتىق اسسامبلەيانىڭ الەۋمەتتىك قامسىزداندىرۋدى قارجىلاندىرۋ تۋرالى زاڭ جوباسىن قابىلداماۋى سەبەبىمەن 2025-جىلعا ارنالعان بيۋجەتتىڭ بولاشاعى بەلگىسىز بولىپ قالىپ وتىرعاندىقتان، ەممانيۋەل ماكرون جەلتوقساننىڭ ورتاسىنا دەيىن پارلامەنتكە ارنايى زاڭ ەنگىزىلەتىنىن حابارلادى.
«ۋاقىتشا زاڭ كونستيتۋتسيامىزدا كوزدەلگەندەي مەملەكەتتىك قىزمەت پەن ەل ءومىرىن ۇزدىكسىز قامتاماسىز ەتۋگە مۇمكىندىك بەرەدى»، - دەپ قوستى ول.
