ماكرون ارميانى نىعايتۋ ءۇشىن جاس ەرىكتىلەردى تارتپاقشى

استانا. KAZINFORM - فرانسيا پرەزيدەنتى ەممانۋەل ماكرون ارميانى نىعايتۋعا ەرىكتى تۇردە كوبىرەك جاستاردى «جۇمىلدىرۋ» جوسپارىن ايتتى.

قارۋلى كۇشتەرگە ارناعان ءداستۇرلى جاڭاجىلدىق جولداۋىندا فرانسيا پرەزيدەنتى ەلدىڭ جاڭا قاۋىپ-قاتەرلەرگە بەيىمدەلۋگە ءماجبۇر ەكەنىن باسا ايتتى. اتاپ ايتقاندا، ول الەمنىڭ كەيبىر ەلدەرىندە جاڭا، «قاتەر توندىرەتىن» يادرولىق دوكترينانىڭ قابىلدانعانىن اتاپ ءوتتى، دەپ حابارلايدى Radio France.

فرانسۋز كوشباسشىسىنىڭ ايتۋىنشا، ەۋروپاعا «ستراتەگيالىق ويانۋ» جانە قورعانىس سالاسىندا ا ق ش- تان كوبىرەك تاۋەلسىزدىك قاجەت. دونالد ترامپ تۇسىندا ا ق ش- تىڭ ەۋروپالىق وداقتاستارىنان الشاقتاۋ قاۋپى ايتارلىقتاي ارتادى.

ماكرون سونىمەن قاتار ۇلتتىق ستراتەگيالىق شولۋدى مامىر ايىنا دەيىن جاڭارتۋعا شاقىردى. بۇل قۇجات ۇلتتىق جانە حالىقارالىق قورعانىس جانە قاۋىپسىزدىك سەكتورىنا شولۋ جاسايدى جانە فرانسيانىڭ تاياۋ جىلدارداعى ستراتەگيالىق جانە وپەراتسيالىق قيىندىقتارىن انىقتايدى.

وسى تۇرعىدا پرەزيدەنت فرانسۋز قارۋلى كۇشتەرىن جاڭا جاس ەرىكتىلەرمەن نىعايتۋعا نيەتتى ەكەنىن مالىمدەدى. ول ۇكىمەت پەن باس شتابتان مامىر ايىنا دەيىن «ەرىكتى جاستاردىڭ قارۋلى كۇشتەر قاتارىندا جاتتىعىپ، قاتارلارىن نىعايتۋعا مۇمكىندىك بەرۋ» تۋرالى ۇسىنىستار ەنگىزۋدى تالاپ ەتتى.

- فرانسيادا مىندەتتى اسكەري قىزمەتتى قايتارۋ جوق. ءبىز ەرىكتىلەردى جاقسىراق انىقتاۋىمىز كەرەك»، «ولاردى وقىتىپ، قاجەت بولسا، «فرانسيا استاناسىندا جانە باسقا جەرلەردە» قارۋلى كۇشتەردى نىعايتۋ ءۇشىن جۇمىلدىرا ءبىلۋىمىز كەرەك، - دەپ ءتۇسىندىردى پرەزيدەنت.

ونىڭ ايتۋىنشا، اڭگىمە كاسىبي ارمياعا «كومەك كورسەتۋ ءۇشىن» قۇرىلعان رەزەرۆ تۋرالى بولىپ وتىر. مەملەكەت باسشىسى «اسكەري جوسپارلاۋ تۋرالى» زاڭدا 2035 -جىلعا قاراي قىزمەتتەگى ءاربىر ەكى اسكەري قىزمەتكەرگە ءبىر رەزەرۆيست دايارلاۋ، ياعني 100 مىڭ ادامدىق ارميا رەزەرۆىن قۇرۋ كوزدەلگەنىن ەسكە سالدى.

ەسكە سالا كەتەيىك، بۇعان دەيىن فرانسيا جاڭا ۇكىمەتىنىڭ قۇرامى بەلگىلى بولعانىن جازعان بولاتىنبىز.