ماجىلىستە قاراتاي تۇرىسوۆتىڭ 90 جىلدىعىنا ارنالعان جيىن ءوتتى

Мәжілістің баспасөз қызметі
Фото: Мәжілістің баспасөз қызметі

استانا. KAZINFORM - بۇگىن پارلامەنت ماجىلىسىندە كورنەكتى مەملەكەت جانە قوعام قايراتكەرى قاراتاي تۇرىسوۆتىڭ 90 جىلدىعىنا ارنالعان جيىن ءوتتى.

تاعىلىمدى كەزدەسۋگە ەلىمىزگە ەڭبەگى سىڭگەن قايراتكەر-تۇلعالار، قاراتاي تۇرىس ۇلىمەن ۇزەڭگىلەس، ارىپتەس بولعان ازاماتتار، اياۋلى جارى مەن جاقىندارى، سەنات پەن ءماجىلىس دەپۋتاتتارى جانە ۇكىمەت مۇشەلەرى قاتىستى.

ءماجىلىس سپيكەرىنىڭ ورىنباسارى دانيا ەسپايەۆا مەرەيتويعا وراي مەملەكەت باسشىسى قاسىم-جومارت توقايەۆتىڭ ارنايى جولداعان حاتىن وقىپ بەردى.

«قاراتاي تۇرىسوۆ تاۋەلسىزدىگىمىزدىڭ تۇعىرىن نىعايتىپ، ەگەمەن ەلدىڭ بيلىك ينستيتۋتتارىن قالىپتاستىرۋعا، قازاقستان پارلامەنتاريزمىنىڭ نەگىزىن قالاۋعا، كاسىپوداق قوزعالىسىن دامىتۋعا ەلەۋلى ۇلەس قوستى. ءار جىلداردا جوعارى دەڭگەيدەگى ءبىرقاتار جاۋاپتى قىزمەتتى ابىرويمەن اتقاردى. قاراتاي تۇرىسوۆ - قاراپايىمدىلىق پەن قايراتكەرلىكتىڭ، ادامگەرشىلىك پەن ادالدىقتىڭ، وتانشىلدىق پەن ۇلتجاندىلىقتىڭ وزىق ۇلگىسىن كورسەتكەن ءبىرتۋار ازامات»، - دەلىنگەن پرەزيدەنتتىڭ حاتىندا.

قاراتاي تۇرىسوۆ قازاق گەولوگياسىنىڭ دامۋىنا ولشەۋسىز ۇلەس قوستى. كوكتاسجال كەن ورنىن العاشقى اشقانداردىڭ ءبىرى. بۇكىلوداقتىق كاسىپوداقتاردىڭ ورتالىق كەڭەسىندە دە ابىرويلى قىزمەت اتقاردى.

1987-جىلى تۇڭعىش رەت كەڭەس وداعى دەپۋتاتتارى مەن ا ق ش كونگرەسمەندەرى اراسىندا تەلەكوپىرگە قاتىسىپ، نەگىزگى سپيكەرلەردىڭ قاتارىندا بولعانىن زامانداستارى ماقتانىشپەن ايتتى.

«قاراتاي تۇرىسوۆ تاۋەلسىزدىككە دەيىن ءپىسىپ-جەتىلگەن تارلان تۇلعا بولاتىن. كەڭەس زامانى تۇسىندا سوناۋ ماسكەۋدە بۇكىلوداقتىق كاسپوداقتاردىڭ ورتالىق كەڭەسىنىڭ حاتشىسى بولدى. قاراتاي اعامىز – ب ۇ ۇ باس اسسامبلەياسىنا قازاقستان دەلەگاتسياسىن باستاپ بارعان ءبىرىنشى قازاق جانە تولەگەن تاجىبايەۆتان كەيىن جوعارى مىنبەدەن سويلەگەن ەكىنشى قازاق»، - دەدى مەملەكەت جانە قوعام قايراتكەرى جاقسىبەك قۇلەكەيەۆ.

جيىنعا قاتىسۋشىلار قاراتاي تۇرىسوۆتىڭ قايراتكەرلىك قاسيەتتەرى مەن ادامي بولمىسىن ەسكە الدى. مەملەكەت جانە قوعام قايراتكەرى ورالباي ابدىكارىموۆ ونىڭ ءومىر جولى وسكەلەڭ ۇرپاققا ۇلگى-ونەگە ەكەنىن اتاپ ءوتتى.

«قاراتاي تۇرىسوۆ حالىقتىڭ سۇيىكتى پەرزەنتى بولدى. مەملەكەت باسشىسى قاسىم-جومارت توقايەۆتىڭ «ادال ازامات» دەگەن تۇجىرىمداماسى بار عوي. سول ۇلگى الاتىن ناعىز ادال ازاماتتىڭ ءبىرى - وسى ءبىزدىڭ قايرەكەڭ. مۇنداي تۇلعالاردىڭ ءومىرى مەن ەڭبەك جولىن جاستار اراسىندا ناسيحاتتاۋىمىز كەرەك»، - دەدى و. ابدىكارىموۆ.

قاراتاي تۇرىسوۆتىڭ قايراتكەرلىك بولمىسى ەگەمەندىك جىلدارى جارقىراي كورىندى. ول 90-جىلدارداعى الماعايىپ كەزەڭدە مينيسترلەر كابينەتىنىڭ ءتوراعا ورىنباسارى بولا ءجۇرىپ، ەڭ قيىن دا كۇردەلى سالالاردى ابىرويمەن باسقاردى. تۋريزم، دەنە شىنىقتىرۋ جانە سپورت ءمينيسترى، ورتالىق سايلاۋ كوميسسياسىنىڭ ءتوراعاسى بولدى.

ءبىرىنشى جانە ەكىنشى سايلانىمداعى ءماجىلىس دەپۋتاتى، قارجى جانە بيۋجەت كوميتەتىنىڭ ءتوراعاسى قىزمەتىن اتقاردى.

سوڭعى جاڭالىقتار