ماجارستاندا پارلامەنت عيماراتى سۋ استىندا قالدى

استانا. KAZINFORM - ماجارستان استاناسى بۋداپەشتتە دۋناي وزەنى ارناسىنان اسىپ، قالا ورتالىعىنداعى جاعالاۋلاردى سۋ باستى. بۇل تۋرالى ريا نوۆوستي حابارلادى.

باسىلىمنىڭ مالىمەتىنشە، اپتا باسىنان بەرى ەلدىڭ شىعىس جازىعىنداعى تومەنگى جاعالاۋلار كولىك قوزعالىسى ءۇشىن جابىلعان. قازىر سۋ دەڭگەيى ءبىر مەترگە جۋىق كوتەرىلگەن. جاعالاۋ ايماعىنىڭ ءبىرقاتار بولىكتەرىمەن بىرگە ماجارستان پارلامەنتى عيماراتىنىڭ الدىن سۋ باسقان، ورىندىقتار، باعانالار مەن باعدارشامداردىڭ جارتىسى سۋ استىندا قالدى.

جەلتوقسان، ماۋسىم ايلارىندا سۋ باسقان «دۋنايداعى باتەڭكەلەر» ەسكەرتكىشى ءالى دە تەرەڭ سۋ استىندا جاتىر. جاعالاي ەگىلگەن اعاشتار اللەياسى ارالعا اينالدى.

بۋداپەشتتەگى تومەنگى جاعالاۋلاردىڭ بيىكتىگى شامامەن التى مەتر ەكەنى اتاپ ءوتىلدى. 21-قىركۇيەكتە دۋنايداعى سۋدىڭ ماكسيمالدى دەڭگەيى شامامەن 8,5 مەترگە جەتەدى دەپ جوسپارلانعان. قالا ورتالىعىنداعى وزەننىڭ ادەتتەگى دەڭگەيى 3,5 مەتر.

18-قىركۇيەكتە ماجارستان پرەمەر- ءمينيسترى ۆيكتور وربان ەلدىڭ سۋ تاسقىنىنىڭ ەڭ اۋىر كەزەڭىنە جەتكەنىن، ول شامامەن ءبىر اپتادان كەيىن اياقتالۋى ءتيىس ەكەنىن مالىمدەدى.