ماجارستان قازاقستانمەن ەنەرگەتيكالىق ىنتىماقتاستىقتى كەڭەيتۋدى كوزدەيدى - پەتەر سيارتو
استانا. KAZINFORM - ماجارستاننىڭ سىرتقى ىستەر ءمينيسترى پەتەر سييارتو Silk Way تەلەارناسىنا بەرگەن ەكسكليۋزيۆتى سۇحباتىندا تۇركى مەملەكەتتەرى ۇيىمى (ت م ۇ) اياسىنداعى ءوز ەلىنىڭ باسىم باعىتتارى تۋرالى ايتىپ، قازاقستانمەن ەنەرگەتيكالىق ىنتىماقتاستىق سالاسىنداعى پروگرەستى جوعارى باعالادى.
Silk Way تەلەارناسىنىڭ ءتىلشىسى اينۇر يمانعالي ۆەنگريانىڭ تۇركى مەملەكەتتەرى ۇيىمىنا باقىلاۋشى مارتەبەسىنە يە بولا وتىرىپ، ۇيىمنىڭ ەكونوميكالىق كۇن تارتىبىندەگى بولاشاق رولىنە قاتىستى سۇراق قويدى. سونىمەن قاتار ءتىلشى قازاقستان مەن ماجارستان اراسىنداعى جوعارى دەڭگەيدەگى سوڭعى كەزدەسۋلەر مەن بىرلەسكەن ەنەرگەتيكالىق جوبالار اياسىنداعى ىنتىماقتاستىق تۋرالى سۇرادى.
مينيستر جاۋابىندا ماجارستاننىڭ قازاقستانمەن ستراتەگيالىق ارىپتەستىگى العىس ايتىپ، قۇرمەت تانىتتى.
- ءبىز سىزدەردىڭ پرەزيدەنتتى ەرەكشە قۇرمەتتەيمىز جانە ەكىجاقتى قاتىناستى تۇراقتى تۇردە جاقسارتۋ جولىنداعى كۇش-جىگەرىن جوعارى باعالايمىز. كوپ جىلدىق دايىندىق پەن جۇزدەگەن ميلليون دوللار كولەمىندەگى ينۆەستيتسيادان كەيىن، بۇگىندە بۇرعىلاۋ ۇڭعىمالارى ىسكە قوسىلىپ، «روجكوۆسكوە» كەن ورنىندا گاز ءوندىرۋ جۇرگىزىلىپ جاتقانى - تاريحي وقيعا دەپ ەسەپتەيمىن، - دەدى ول.
پەتەر سييارتونىڭ ايتۋىنشا، ءقازىر قوسىمشا ينۆەستيتسيا تارتۋعا مۇمكىندىك بەرەتىن جاڭا باعىتتار قاراستىرىلىپ جاتىر.
- ءبىز ەنەرگەتيكا سالاسى بويىنشا تىعىز ستراتەگيالىق ارىپتەستىككە دايىنبىز. تۇركى مەملەكەتتەرى ۇيىمىنا مۇشە مەملەكەتتەرگە ماجارستانعا باقىلاۋشى رەتىندە بىرلەسكەن جۇمىسقا قاتىسۋعا مۇمكىندىك بەرگەندەرى ءۇشىن العىس بىلدىرەمىز. ءبىز ۇيىمنىڭ تابىستى قىزمەتىنە ۇلەسىمىزدى قوستىق جانە بولاشاقتا دا وسى باعىتتا جۇمىس ىستەي بەرەمىز، - دەپ تولىقتىردى مينيستر.
بۇعان دەيىن Kazinform اگەنتتىگى پەتەر سييارتونىڭ قازاقستانعا جاساعان ساپارى بارىسىندا جازىپ الىنعان ەكسكليۋزيۆتى سۇحباتىن جاريالاعان بولاتىن.
بۇگىن پرەزيدەنت قاسىم-جومارت توقايەۆ تۇركى مەملەكەتتەرى ۇيىمىنىڭ بەيرەسمي سامميتىنە قاتىستى.
ايتا كەتەيىك، تۇركى مەملەكەتتەرى ۇيىمىنىڭ بەيرەسمي سامميتىندە ءبىرقاتار قۇجات قابىلداندى.
