ماحاچكالانىڭ اۋە كەڭىستىگى جابىلعان بويدا AZAL ۇشاعى كەرى ورالدى
استانا. KAZINFORM — بۇل تۋرالى AZAL ىشكى جانە سىرتقى كوممۋنيكاتسيالار ءبولىمىنىڭ باسشىسى فاريد گۋسەينوۆ مالىمدەدى.
— باكۋ — مينەرالنىە ۆودى باعىتى بويىنشا J2-8717 رەيسىن ورىندايتىن Azerbaijan Airlines (AZAL (AZAL) اۋە كەمەسىنىڭ كاپيتانى، ۇشقاننان كەيىن باكۋ اۋە كەڭىستىگىنەن شىقپاي جاتىپ، ماحاچكالا اۋە كەڭىستىگىن جابۋ تۋرالى NOTAM (ۇشۋ تۋرالى حابارلاما) العاننان كەيىن بىردەن ورالۋعا شەشىم قابىلدادى. ۇشاق گەيدار الييەۆ حالىقارالىق اۋەجايىنا جەرگىلىكتى ۋاقىت بويىنشا 10:13 تە امان-ەسەن قوندى، دەپ حابارلادى كومپانيا وكىلى.
ايتا كەتەيىك، 25-جەلتوقساندا باكۋدەن گروزنىيعا بەت العان ازەربايجان Arilines كومپانياسىنىڭ Embraer ۇشاعى قازاقستاننىڭ اقتاۋ قالاسىنا جاقىن جەردە اپاتقا ۇشىراعان بولاتىن. ۇشاق بورتىندا 62 جولاۋشى، ونىڭ ىشىندە ازەربايجاننىڭ 37، رەسەيدىڭ 16، قازاقستاننىڭ 6 جانە قىرعىزستاننىڭ 3 ازاماتى، سونداي-اق بەس ەكيپاج مۇشەسى بولعان. وقيعا سالدارىنان 38 جولاۋشى قازا تاۋىپ، 29 ادام، ونىڭ ىشىندە ءۇش بالا امان قالدى.
ءبىز بۇعان دەيىن اقتاۋ ماڭىندا ۇشاق اپاتى بولعانىن جازعان بولاتىنبىز.
سونداي-اق Azerbaijan Airlines ۇشاق اپاتىنان زارداپ شەككەندەرگە 20 مىڭ مانات (5 ميلليون تەڭگەدەن استام) تولەيتىنى، ال قازا بولعانداردىڭ ءارقايسىسىنىڭ وتباسىنا 40 مىڭ مانات (11 ميلليون تەڭگەدەن استام) كولەمىندە وتەماقى بەرىلەتىنى حابارلاندى.
ازەربايجان پرەزيدەنتى يلحام الييەۆتىڭ جارلىعىمەن 2024-جىلدىڭ 26-جەلتوقسانى ازەربايجاندا ۇشاق اپاتىندا قازا تاپقانداردى ەسكە الۋ ءۇشىن ازا تۇتۋ كۇنى بولىپ جاريالاندى.
اقتاۋ، قۇرىق جانە باۋتينو پورتتارىندا 2024-جىلعى 25-جەلتوقساندا بولعان اۋە اپاتىندا قازا تاپقانداردى ەسكە الۋ جانە قايعىرۋ بەلگىسى رەتىندە كاسپي تەڭىزىنىڭ سۋىنا ازا تۇتۋ گۇل شوقتارى قويىلدى.
