مادەني-تاريحي قۇندى بۇيىمدار شەكارادان قالاي وتكىزىلەدى

استانا. KAZINFORM - قۇندى نەمەسە سيرەك كەزدەسەتىن زاتتار مەن بۇيىمداردى شەكارادان الىپ ءوتۋ تالاپتارى جانە وعان تولەنەتىن كەدەن قۇنى تۋرالى قارجى مينيسترلىگى مەملەكەتتىك كىرىستەر كوميتەتىنىڭ ماماندارى ءتۇسىندىرىپ ءوتتى.

«مادەني-تاريحي قۇندى بۇيىمداردى شەكارادان الىپ شىعۋ نەمەسە الىپ كىرۋ ءۇشىن مەملەكەتتىك قۇزىرلى ورگانداردان قورىتىندى تالاپ ەتىلەدى. ول بۇيىمدى شەكارادان اسىرۋعا نەمەسە اكەلۋگە بەرىلگەن رۇقسات. كەدەن ورگاندارى مادەني قۇندى بۇيىمداردى انىقتاعان جاعدايدا سول قۇجاتقا سۇيەنەدى»، - دەدى مەملەكەتتىك كىرىستەر كوميتەتى ساۋدالىق ەمەس اينالىم باسقارماسىنىڭ باس ساراپشىسى قۋات قالداشيەۆ ۆەدومستۆودا وتكەن بريفينگىدە.

اتالعان كوميتەتتىڭ تاريفتىك رەتتەۋ جانە قۇن باسقارماسىنىڭ باسشىسىنىڭ ورىنباسارى قۇرالاي اساۋبايەۆانىڭ ايتۋىنشا، مادەني-تاريحي قۇندى بۇيىمداردى شەكارادان الىپ وتۋگە قاتىستى قۇندى كەدەندىك ورگان ايقىندايدى.

اتاپ ايتقاندا، ەۋرازيالىق ەكونوميكالىق وداقتىڭ كەدەندىك اۋماعىنا اكەلىنەتىن تاۋارلاردىڭ كەدەندىك قۇنى 2017 -جىلعى 13-جەلتوقساندا قازاقستان رەسپۋبليكاسىنىڭ زاڭىمەن راتيفيكاتسيالانعان ەۋرازيالىق ەكونوميكالىق وداقتىڭ كەدەن كودەكسى تۋرالى حالىقارالىق شارتقا (ە ا ە و ك ك) سايكەس.

«تاۋارلاردىڭ كەدەندىك قۇنى، كەدەندىك ترانزيت، كەدەن قويماسى كەدەندىك ءراسىمى، جويۋ كەدەندىك ءراسىمى، مەملەكەت پايداسىنا باس تارتۋدىڭ كەدەندىك ءراسىمى نەمەسە ارنايى كەدەندىك ءراسىم كەدەندىك راسىمىنە ورنالاستىرىلعان كەزدە ايقىندالمايدى. وداقتىڭ كەدەندىك اۋماعىنان اكەتىلەتىن تاۋارلاردىڭ كەدەندىك قۇنى ەلىمىزدىڭ كەدەندىك كودەكسىنە سايكەس ايقىندالادى. تاۋارلاردىڭ كەدەندىك قۇنى جانە ونى ايقىنداۋعا قاتىستى مالىمەتتەر انىق، ساندىق تۇردە ايقىندالعان جانە قۇجاتپەن راستالعان اقپاراتقا نەگىزدەلۋگە ءتيىس»، - دەيدى مامان.

اۆتور
داۋلەت ىزتىلەۋ