ماڭعىستاۋلىقتار قىرعىز ەلىنىڭ ازاماتتارىن ەلىنە شىعارىپ سالدى
اقتاۋ. KAZINFORM - اقتاۋ ماڭىنداعى ۇشاق اپاتىنان زارداپ شەككەن قىرعىزستاندىق ءۇش ازامات ەلىنە بارادى.
ماڭعىستاۋ وبلىسى اكىمى باسپا ءسوز قىزمەتىنىڭ مالىمەتىنشە، بۇگىن، 29 - جەلتوقسان كۇنى اقتاۋ ماڭىنداعى ۇشاق اپاتىنان زارداپ شەككەن قىرعىزستاندىق ءۇش ازامات - تيلەك وسمونوۆ، ەرلان دجۋنۋشۋاليەۆ جانە كۇنى كەشە جانساقتاۋ بولىمىنەن شىققان رينات اسانوۆ اقتاۋعا كەلگەن جاقىن تۋىستارىمەن بىرگە ءوز ەلدەرىنە جول تارتتى.
ولارعا ماڭعىستاۋ وبلىستىق اۋرۋحاناسىندا ءتيىستى مەديتسينالىق كومەك كورسەتىلدى. بۇگىندە ءۇش ازاماتتىڭ دا جاعدايى تۇراقتى. زارداپ شەككەندەردى اۋەجايدان شىعارىپ سالۋعا ماڭعىستاۋ وبلىسى اكىمىنىڭ ورىنباسارى اببات ورىسبايەۆ قاتىستى.
قازىرگى ۋاقىتتا ماڭعىستاۋ وبلىستىق كوپبەيىندى اۋرۋحاناسىنىڭ جانساقتاۋ بولىمىندە ۇشاق اپاتىنان زارداپ شەككەن ءۇش ازەربايجاندىق ازامات ەم قابىلداپ جاتىر.
ايتا كەتەيىك، اپات سەبەبىن انىقتاۋ ماقساتىندا اقتاۋدا ۇكىمەتتىك كوميسسيا جۇمىسىن جالعاستىرىپ جاتىر.
ەسكە سالا كەتەيىك، 25 - جەلتوقساندا اقتاۋ ماڭىندا Azerbaijan Airlines ۇشاعى اپاتقا ۇشىرادى.
ۇشاق بورتىندا 67 ادام، ونىڭ ىشىندە بەس ەكيپاج مۇشەسى بولعان. وقيعا سالدارىنان 38 جولاۋشى قازا تاپتى. وكىنىشكە قاراي، مەرت بولعان جانداردىڭ اراسىندا 6 قازاقستان ازاماتى بار.
