ماڭعىستاۋلىقتار ۇشاق اپاتىنان زارداپ شەككەن سوڭعى ناۋقاستاردى ەلىنە شىعارىپ سالدى
اقتاۋ. قازاقپارات - 30-جەلتوقسان كۇنى ماڭعىستاۋ وبلىسىنىڭ باسشىلارى، دارىگەرلەر مەن قۇتقارۋشىلار ۇشاق اپاتىنان زارداپ شەگىپ، جانساقتاۋ بولىمىندە 6 كۇن ەمدەلگەن ءۇش ءازىربايجاندىق ازاماتتى ارنايى بورتپەن ەلىنە شىعارىپ سالدى.
ماڭعىستاۋ وبلىسى اكىمىنىڭ باسپا ءسوز قىزمەتىنىڭ حابارلاۋىنشا، 25-جەلتوقساننان بەرى وبلىستىق كوپبەيىندى ەمحاناسىنىڭ جانساقتاۋ بولىمىندە جاتقان لەيلا وماروۆا، مۋسليمات سيرادجوۆا مەن حافيزات حالايەۆانى بۇگىن، ياعني 30-جەلتوقسان كۇنى ءازىربايجاننان ارنايى كەلگەن ۇشاقتارمەن ەلىنە الىپ كەتتى. ۇشەۋىنىڭ دە جاعدايى ناشارلاعان جوق، 1 ناۋقاس مەحانيكالىق ۆەنتيلياتسيادان، ۆازوپرەسسوردان جانە دارىلىك سەداتسيادان شىعارىلدى. ال ەكەۋىندە ۆازوپرەسسورلاردىڭ دوزاسى مينيمالدى دوزالارعا دەيىن تومەندەتىلگەن. دارىگەرلەر ولاردىڭ ءومىرىن ساقتاپ قالۋ ءۇشىن بارىن سالدى.
«بۇگىندە ماڭعىستاۋ وبلىستىق كوپبەيىندى ەمحاناسىندا ۇشاق اپاتىنان زارداپ شەككەن ناۋقاستار جوق. ماڭعىستاۋلىق دارىگەرلەر اۋە اپاتىنان جاراقات العان 29 ازاماتتىڭ تۇگەل امان-ەسەن ەلىنە جەتكەنىنە ءدان ريزا»، - دەلىنگەن حابارلامادا.
ەسكە سالايىق، 25-جەلتوقساندا اقتاۋ ماڭىندا Azerbaijan Airlines ۇشاعى اپاتقا ۇشىرادى.
ۇشاق بورتىندا 67 ادام، ونىڭ ىشىندە بەس ەكيپاج مۇشەسى بولعان. وقيعا سالدارىنان 38 جولاۋشى قازا تاپتى. وكىنىشكە قاراي، مەرت بولعان جانداردىڭ اراسىندا 6 قازاقستان ازاماتى بار.
مەملەكەت باسشىسى قاسىم-جومارت توقايەۆ ازەربايجان پرەزيدەنتى يلحام اليەۆكە كوڭىل ايتتى.
وسىعان دەيىن ماڭعىستاۋ وبلىستىق كوپبەيىندى اۋرۋحاناسىندا 6 پاتسيەنت، ونىڭ تورتەۋى رەانيماتسيا بولىمشەسىندە، ەكەۋى تراۆماتولوگيادا ەمدەلىپ جاتقانىن حابارلادىق.
