ماڭعىستاۋداعى ءبىر مەكتەپتە 40 ەر مۇعالىم قىزمەت ەتەدى

 ماڭعىستاۋ وبلىسى ءتۇپقاراعان اۋدانىنا قاراستى اقشۇقىر اۋىلىنداعى مەكتەپ-ليتسەيدە 40 ەر مۇعالىم قىزمەت ەتەدى. 

мектеп
Фото:ҚазАқпарат

بىلتىر ءبىلىم ورداسىندا 36 ەر مۇعالىم بولسا، بيىل ولاردىڭ قاتارى 40 قا جەتكەن، دەپ حابارلايدى قازاقپارات ءتىلشىسى.

اقشۇقىر مەكتەپ-ليتسەيى 2014 -جىلى 14-قاراشادا وڭىردەگى ءۇش اۋىسىمدى وقىتۋ ماسەلەسىن جويۋ ماقساتىندا اشىلعان. بۇگىنگى تاڭدا 1700 وقۋشى ءبىلىم الادى. مەكتەپ-ليتسەيدە 137 مۇعالىم قىزمەت ەتەدى.

ءبىلىم ورداسى اشىلعاندا وندا 7 ەر مۇعالىم بولعان جانە ولاردىڭ كوبى دەنە تاربيەسىنەن ساباق بەرگەن. 9 جىلدا اعايلاردىڭ قاتارى 40 قا جەتكەن.

ولاردىڭ الدى ءوز ءىسىنىڭ مايتالمانى، كەيىنگىسى - تەورياسى مەن پراكتيكاسىن ۇشتاستىرىپ، ىزدەنىس جولىندا جۇرگەن جاس بۋىن. ەر مۇعالىمدەر قازاق ءتىلى، تاريح، گەوگرافيا، اعىلشىن ءتىلى، مۋزىكا، كوركەم ەڭبەك، دەنە شىنىقتىرۋ، ماتەماتيكا، فيزيكا، ينفورماتيكا پاندەرىنەن ساباق بەرەدى.

«ءبىزدىڭ مەكتەپ-ليتسەيدىڭ كادرلىق قۇرامى جاعىنان رەسپۋبليكالىق مەكتەپتەردەن ەداۋىر ايىرماشىلىعى بار. ويتكەنى ۇجىمدا 40 ەر مۇعالىم قىزمەت ەتەدى. ولاردىڭ ەكەۋى - شەبەر- پەداگوگ، ۇشەۋى - زەرتتەۋشى پەداگوگ، بەسەۋى - ساراپشى پەداگوگ، سەگىزى - مودەراتور- پەداگوگ قىزمەت ساپىندا. ەر مۇعالىمدەردىڭ جەتەۋى - ءوز تۇلەگىمىز ءارى وقۋ ۇزدىكتەرى»، - دەدى مەكتەپ ديرەكتورى قالامقاس تىلەۋبايەۆا.

20 جىلعا جۋىق ەڭبەك ءوتىلى بار تاريح ءپانىنىڭ مۇعالىمى باۋىرجان ايمانوۆ وسى ءبىلىم وشاعىندا 6 جىلدان بەرى قىزمەت ەتەدى. ول تاريح پانىنەن «ۇزدىك پەداگوگ-2021» كونكۋرسىنىڭ جەڭىمپازى، بىرنەشە رەت پاندىك وليمپيادانىڭ رەسپۋبليكالىق كەزەڭىنىڭ جەڭىمپازدارىن دايىنداعان.

قازىر ساياسي قۋعىن-سۇرگىن قۇرباندارىن اقتاۋ كوميسسياسىنىڭ قۇرامىندا مۇراعات اقتارىپ، ۇلتتىڭ جوعىن تۇگەندەپ جۇرگەن ۇستاز. باۋىرجان وقۋ ورداسىندا ەر مۇعالىمدەردىڭ كوپ بولۋى تاربيە پروتسەسىندە وڭ ىقپالىن تيگىزەتىنىن ايتادى.

«ءبىلىم سالاسىنداعى رەفورمالار، مۇعالىمدەرگە دەگەن قۇرمەت، ۇستازدارعا قوعامداعى وڭ كوزقاراس، پەداگوگ مارتەبەسى زاڭىنىڭ قابىلدانۋى، مۇعالىمدەرگە جاسالىپ جاتقان الەۋمەتتىك قولداۋلار، جالاقىنىڭ كوبەيۋى - وسىنىڭ بارلىعى قازىرگى تاڭدا ءبىلىم سالاسىندا ەر مۇعالىمدەردىڭ كوبەيۋىنە ءوزىنىڭ اسەرىن تيگىزىپ جاتىر دەپ ويلايمىن. وقۋشىلارعا ەر مۇعالىمدەردىڭ نەگىزگى پاننەن ساباق بەرۋى دە ۇل بالالاردىڭ مۇعالىمدىككە كەلۋىنە بەتبۇرىس جاساپ وتىر»، - دەدى تاريح ءپانىنىڭ مۇعالىمى، پەداگوگ-شەبەر باۋىرجان ايمانوۆ.

ال 21 جاستاعى اسىلزات ءمادي ۇلى - مەكتەپ- ليتسەيگە بيىل جۇمىسقا ورنلاسقان جاس مامان. ول وقۋشىلارعا قازاق ءتىلى مەن ادەبيەتى پانىنەن ساباق بەرەدى.

«ۇستاز دەگەن ۇلعاتتى ەسىمدى ارقالاۋ - ۇلكەن جاۋاپكەرشىلىك. ءبىز قازاق جاستارىنىڭ ادەبيەتكە كوبىرەك نازار سالىپ، بەت بۇرعانىن قالايمىز. ءوز ماماندىعىمىزدى تاڭداپ، وسىنداعى الدىڭعى بۋىن اعالارىمىزدىڭ ارتىن قۋىپ، وسى ءبىلىم ورداسىنان ەڭبەك جولىمىزدى باستاپ جاتىرمىز"، - دەدى اسىلزات ءمادي ۇلى.

مەكتەپ باسشىسى ەر مۇعالىمدەردىڭ كوپتىگى وقۋشىلاردىڭ پاتريوت، ۇلتجاندى بولۋىنا ىقپال ەتەتىن ايتادى.

«قازىر قوعامداعى كەلەڭسىز جاعدايلاردىڭ الدىن الۋ ءۇشىن مەكتەپتە ەر-ازاماتتاردىڭ ۇستازدىق ەتۋى ماڭىزدى. ەر ۇستازداردىڭ مەكتەپكە كوپتەپ كەلۋى «ديپلوممەن اۋىلعا» باعدارلاماسىمەن بەرىلگەن جەڭىلدىكتەردىڭ دە ارقاسى ەكەنىن ايتا كەتۋ كەرەك. ال ءبىزدىڭ مەكتەپ-ليتسەيگە جۇمىسقا كەلۋىن ايتاتىن بولساق، جالپى ءوزىمىز مىقتى مامانداردى زەرتتەپ، زەردەلەي وتىرىپ، سول باعدارلاما ارقىلى مەكتەپكە شاقىردىق. سوڭعى ۋاقىتتا مەكتەپ تۇلەكتەرىنىڭ وزدەرى دە جوعارى وقۋ ورىندارىن ءبىتىرىپ، ءوزىمىزدىڭ قاتارىمىزدى كوبەيتىپ جاتىر»، - دەدى ول.

ايتا كەتسەك، وتكەن وقۋ جىلىندا وسى مەكتەپ-ليتسەيدىڭ 11-سىنىپ وقۋشىلارى تۇگەلدەي ۇ ب ت-دان جوعارى ۇپاي جيناپ، مەكتەپ تاريحىندا تۇڭعىش رەت بارلىعى مەملەكەتتىك گرانتقا يە بولعان. ال بۇل جەردە نەگىزگى پاندەردەن ەر مۇعالىمدەردىڭ ساباق بەرەتىنىن دە ەسكەرۋ كەرەك.

سوڭعى جاڭالىقتار