ماڭعىستاۋدا تەڭىز جاعالاۋىنان 279 يتبالىقتىڭ ولەكسەسى تابىلدى
اقتاۋ. KAZINFORM - تەڭىز سۇتقورەكتىلەرى ءتۇپقاراعان اۋدانىنا قاراستى ۇردىك ءمۇيىسى مەن باۋتين جاعالاۋى ارالىعىنان انىقتالعان. وبلىستىق بالىق ينسپەكسياسى باسقارماسى ءتۇپقاراعان بالىق ينسپەكسيا ءبولىمىنىڭ باسشىسى قونارباي بازاربايەۆتىڭ ايتۋىنشا، ولگەن يتبالىقتاردىڭ ۇشاسى ءساۋىر ايىنان بەرى جاعاعا شىعىپ جاتىر.
- كۇنباتىستان، سولتۇستىك-باتىستان سوققان جەلدەن كەيىن جاعاعا شىعىپ جاتىر. بۇگىندە 279 داناسى انىقتالدى. وتكەن اپتادا 117 يتبالىقتىڭ ولەكسەسى تابىلىپ، جاعالاۋ تازارتىلىپ ەدى. كەشە دەمالىس كۇندەرى تاعى 59 ىن تىركەدىك. ينسپەكسيا مەن جەرگىلىكتى اتقارۋشى ورگان وكىلدەرى ۇشالاردى جيناپ، ارنايى پوليگونعا اپارىپ جاتىر، - دەيدى ءبولىم باسشىسى.
جەرگىلىكتى ماماندار تەڭىز جانۋارلارىنىڭ نەدەن قىرىلعانىن بىلمەيدى. ءبىراق، بىرنەشەۋى براكونەرلىك اۋعا ورالىپ شىعىپتى.
- يتبالىقتار وتە ءشىرىپ كەتكەن جاعدايدا شىعىپ جاتىر. سىناما الۋ ەمەس. وكىنىشكە وراي، ايتا كەتەتىن دە دەرەك بار، دەنەسىندە اۋ قۇرالدارىمەن بىرگە تابىلىپ جاتقاندار دا بار. سوڭعى جاعدايدا 13 داناسى انىقتالدى. يتبالىقتاردىڭ ءولۋ سەبەبىن انىقتاۋمەن ەكولوگيا جانە گيدروبيولوگيا ينستيتۋتىنىڭ ماماندارى اينالىسادى. ءبىراق ولار بىرنەشە جىلدان بەرى ناقتى مىنە، مىناداي جاعدايدان دەپ ەشقانداي تۇجىرىمعا كەلە الماي وتىر، - دەيدى ءتۇپقاراعان بالىق ينسپەكسيا ءبولىمىنىڭ باسشىسى قونارباي بازاربايەۆ.
ەسكە سالايىق، بىلتىر كاسپيي تەڭىزىنىڭ ءتۇپقاراعان اۋماعىنان 2212 يتبالىقتىڭ ۇشاسى تابىلدى.
بۇعان دەيىن، بالىق شارۋاشىلىعى كوميتەتى كاسپيدىڭ جاعالاۋىنان 117 يتبالىقتىڭ ولەكسەسى تابىلعانىن حابارلاعان بولاتىن.
