ماڭعىستاۋدا جالعان اقپارات تاراتقان تۇرعىن جاۋاپكەرشىلىككە تارتىلدى
اقتاۋ. KAZINFORM - اتىراۋ وبلىسىنداعى توتەنشە جاعدايعا بايلانىستى جالعان اقپارات تاراتقان جاڭاوزەندىك جاۋاپكەرشىلىككە تارتىلدى.
ەلىمىزدىڭ ءبىرقاتار وڭىرىندە سۋ تاسقىنى سالدارىنان وتە كۇردەلى جاعداي ورىن الۋدا. وسىعان وراي «جاڭاوزەندە جول جابىلدى» دەپ الاڭداۋشىلىق سيپاتتا جالعان اقپاراتتى الەۋمەتتىك جەلى ارقىلى تاراتىپ جىبەرگەن.
ماڭعىستاۋ وبلىستىق قوعامدىق كوممۋنيكاتسيا ورتالىعىنىڭ حابارلاۋىنشا، جاڭاوزەن پوليتسەيلەرى كۇدىكتىنى بىردەن انىقتادى. ق ر اكىمشىلىك قۇقىق بۇزۋشىلىق تۋرالى كودەكسىنىڭ 456-بابىنىڭ 3-بولىگىنە ساي اكىمشىلىك جاۋاپكەرشىلىككە تارتىپ وتىر.
«قانداي دا ءبىر جالعان اقپارات تاراتقاندار ق ر ق ك 274-بابى بويىنشا قىلمىستىق جاۋاپكەرشىلىككە تارتىلاتىنىن ەسكەرتەمىز. ازاماتتاردان تەك رەسمي اقپارات كوزدەرىنە سەنۋدى سۇرايمىز»، - دەيدى جاڭاوزەن پوليتسياسى.
ەستەرىڭىزگە سالا كەتەيىك، سۋ تاسقىنى سالدارىنان اتىراۋ وبلىسىنان ماڭعىستاۋعا قازىرگى ۋاقىتتا 16 مىڭنان استام ادام ەۆاكۋاتسيالاندى.
سونىمەن قوسا، تاڭەرتەڭ قۇلسارىدان بەينەۋگە بارار جولدا سۋ تاسقىنىنان ەۆاكۋاتسيالانعان جۇكتى كەلىنشەك ءسابيلى بولدى.
اۆتور
جانكەلدى قارجان
