ماڭعىستاۋدا اسىل تۇقىمدى 40 ەشكىنى قاڭعىباس يتتەر قىرىپ كەتتى
اقتاۋ. KAZINFORM -كاسىپكەر تۇلىكتەردى نەسيەگە العان. باتىر اۋىلىنىڭ تۇرعىنى، بىرنەشە جىلدان بەرى اسىل تۇقىمدى ەشكى شارۋاشىلىعىن دوڭگەلەتىپ وتىرعان كاسىپكەر ءبىر تۇندە قىرۋار شىعىنعا ۇشىرادى.
قۇنى قىمبات، 40 قا جۋىق ەشكىسىن قاڭعىباس يتتەر تاماقتاپ كەتكەن.
- ءبارىن تەك موينىنان تىستەپ، قىرىپ كەتە بەرگەن. ەشقايسىسىن جەمەگەن. ىشىندە ءبىر ەشكىمنىڭ قارنىن جارعان. قالعانىنىڭ ءبارىنىڭ تەك موينىنان تىستەپ كەتكەن. وسى ەشكىلەردى «نۇر كاپيتال» باعدارلاماسىمەن، 15 ەشكىنى 400 مىڭنان 6 ميلليون تەڭگەگە الدىرعانمىن. ءالى 7 اي تولەيتىن قارىزىم بار، - دەيدى شارۋاشىلىق يەسى قۇمار نۇرپەيىسوۆا.
مال يەسى وقيعا بولعان كۇندى قورقىنىشپەن ەسكە الادى. 29-شىلدە كۇنى تاڭعى ساعات 6 شاماسىندا قوراعا كەلسە، قىرىق ەشكىنىڭ قىرىلىپ قالعانىن كورەدى. قۇمار نۇرپەيىسوۆا 5 بۇرالقى ءيتتىڭ اۋىل ىشىنە قاراي قاشقانىن بايقاپ، سوڭىنان قۋعان. ءبىراق جەتە الماعان.
قىرىلعان ەشكىلەردىڭ ىشىندە اسىل تۇقىمدى جانۋارلار اراسىنداعى كورمەدە جۇلدەلى بولعان تولدەر دە بار ەكەن. قۇنى قىمبات ەشكىنىڭ، نارىقتاعى باعاسى 400 مىڭ تەڭگەدەن باستالادى. دەمەك، 40 باس ەشكى شامامەن - 15 ميلليون تەڭگە تۇرادى. ەشكىلەر كۇنىنە كەم دەگەندە 50-60 ليتر ءسۇت بەرەتىن. شىعىنعا ۇشىراعان كاسىپكەر ەندى نە ىستەرىن بىلمەي وتىر. ويتكەنى شارۋاشىلىقتى قولعا العان كەزدە نەسيە العان.
- وسى شارۋاشىلىقپەن اينالىسىپ جاتقانىما 10 جىل بولدى. بۇكىل اقتاۋدى، مۇنايلىنى، اۋىرىپ جاتقان كىسىلەردى، كىشكەنتاي بالالاردى، تۇگەل قامتاماسىز ەتىپ وتىردىق. قۇرت، ىرىمشىك، ۇلكەن كىسىلەرگە قايماعىن تاسىپ وتىرعانمىن. ءبىر وتباسىنىڭ 9 ادامىن اسىراپ وتىرعان ەشكىلەر ەدى. ەندى ماعان تىم بولماعاندا جارتىسىنىڭ قۇنىن وتەۋگە بولسا دا كومەكتەسسە، تاعى ەشكى الىپ، كاسىپتى جالعاستىرار ەدىم، - دەيدى كاسىپكەر.
مۇنايلى اۋداندىق كاسىپكەرلىك جانە اۋىل شارۋاشىلىق ءبولىمى باسشىسىنىڭ ورىنباسارى بەكبولات قاباتبايەۆتىڭ ايتۋىنشا، شىعىنعا ۇشىراعان كاسىپكەردىڭ «ءبىر اۋىل- ءبىر ءونىم» جوباسىنا قاتىسىپ، 5 ميلليون تەڭگە گرانت ۇتۋىنا مۇمكىندىگى بار ەكەن.
- اۋىل شارۋاشىلىق ءبولىمى تاراپىنان جانە باتىر اۋىلدىق وكرۋگى ماماندارى جانە ۆەتەرينارلىق ستانتسيا ءبولىمى تاراپىنان اكت جاساقتالىپ، ءتيىستى باسقارمالارعا حات جولداندى. قازىرگى تاڭدا ناتيجەسىن كۇتۋدەمىز. اتالعان كاسىپكەرلىكتى، شارۋا قوجالىقتى قولداۋ ماقساتىندا وبلىسىمىزدا «ءبىر اۋىل- ءبىر ءونىم» باعدارلاماسى اياسىندا بەرىلەتىن 5 ميلليون گرانتقا، ياعني جەرگىلىكتى تاۋار وندىرۋشىلەرگە ارنالعان كاسىپكەردى قولداۋ ماقساتىندا، سول جوباعا قاتىسۋعا ىقپال جاساپ جاتىرمىز، - دەيدى بەكبولات قاباتبايەۆ.
