ماڭعىستاۋدا 460 بالا تاماقتان ۋلاندى: ءبىر اي ىشىندە بۇكىل مەكتەپتەردىڭ اسحاناسى تەكسەرىلەدى
استانا. KAZINFORM - پرەمەر-مينيستر ولجاس بەكتەنوۆ مۇنايلى اۋدانىنىنىڭ بەسشوقى اۋىلىندا بالالاردىڭ ۋلانۋىنا بايلانىستى دەنساۋلىق ساقتاۋ، وقۋ-اعارتۋ مينيسترلەرىن، ماڭعىستاۋ وبلىسى اكىمىنىڭ ەسەبىن تىڭدادى.
بۇگىنگى تاڭدا 460 بالا دارىگەرلەردىڭ باقىلاۋىندا، ونىڭ 83 ى اۋرۋحاناعا جاتقىزىلدى، 2 بالا جانساقتاۋ بولىمىندە. زارداپ شەككەندەردىڭ بارلىعى، ونىڭ ىشىندە جانساقتاۋ بولىمىندەگى بالالاردىڭ جاعدايى ءبىرقالىپتى.
دەنساۋلىعىنىڭ جاقسارۋىنا بايلانىستى رەانيماتسيادا جاتقان ەكى بالا جالپى بولىمشەگە اۋىستىرىلدى.
قازىرگى ۋاقىتتا اۋرۋحاناعا ۋلانۋ بەلگىلەرىمەن تۇسكەن بالالاردىڭ بارلىعىنا تولىق كولەمدە قاجەتتى مەديتسينالىق كومەك، سونىڭ ىشىندە پسيحولوگيالىق كومەك كورسەتىلۋدە. وقيعا ورنىندا ق ر وقۋ-اعارتۋ مينيسترلىگى بالا قۇقىقتارىن قورعاۋ كوميتەتىنىڭ وكىلدەرى جۇمىس ىستەپ جاتىر.
زارداپ شەككەندەرگە جانە ولاردىڭ وتباسىلارىنا قولداۋ شارالارىن كورسەتۋ بويىنشا جۇمىستار جۇرگىزىلۋدە. تاۋلىك بويى شتاب جۇمىس ىستەيدى.
اۋرۋ وشاعىن وقشاۋلاۋ جانە جويۋ شارالارىن كۇشەيتۋ ءۇشىن وڭىرگە «قوعامدىق دەنساۋلىق ساقتاۋ ۇلتتىق ورتالىعى» ش ج ق ر م ك «سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعى» فيليالىنىڭ ماماندارى جىبەرىلدى.
ۇكىمەت باسشىسىنىڭ تاپسىرماسى بويىنشا ءبىر اي ىشىندە رەسپۋبليكاداعى بارلىق مەكتەپتەردىڭ اسحانالارىندا سانيتاريالىق-ەپيدەميولوگيالىق تالاپتاردىڭ ساقتالۋىنا مونيتورينگ جۇرگىزىلەدى.
ول مەكتەپتەگى تاماقتانۋدىڭ قاۋىپسىزدىگىن قامتاماسىز ەتۋ جانە مۇنداي جاعدايلاردىڭ قايتالانۋىنا جول بەرمەۋ شارالارىن كۇشەيتۋگە باعىتتالعان.
№8-مەكتەپتە تەرگەۋ جۇمىستارى جۇرگىزىلىپ جاتىر. كىنالىلەر جاۋاپقا تارتىلادى.
ەسكە سالايىق، 7-قىركۇيەك كۇنى مۇنايلى اۋدانىنىڭ ەمحاناسىنا استان ۋلانعان 141 بالا كومەككە جۇگىنگەن بولاتىن.
ۋلانعان وقۋشىلاردىڭ ىشىندە 67 بالا اۋرۋحاناعا جاتقىزىلدى.
كەيىننەن اس ىشكەن سوڭ جاعدايى ناشارلاعان وقۋشىلاردىڭ سانى 222-گە جەتتى.
