ماڭعىستاۋدا 4 ەلدى-مەكەندە ينتەرنەت جوق

اقتاۋ. KAZINFORM - ايماقتا 59 اۋىلدىق ەلدى مەكەن بار. ونىڭ ىشىندە حالىق سانى 250 ادامنان اساتىن 48 اۋىل، 250 ادامنان كەم 11 اۋىل بار.

بۇگىنگى تاڭدا 55 ەلدى-مەكەن ينتەرنەتپەن قامتاماسىز ەتىلگەن.

- تەك حالقىنىڭ سانى 250 ادامنان از، شالعايدا ورنالاسقان 4 ەلدى-مەكەن ءموبيلدى ينتەرنەتپەن قامتىلماعان. ولار ماڭعىستاۋ اۋدانىنىڭ جارما، سازدى جانە باسقۇدىق اۋىلدارى مەن قاراقيا اۋدانىنىڭ اققۇدىق اۋىلى، - دەپ حابارلايدى وبلىستىق ىشكى ساياسات باسقارماسى.

اتالعان 4 اۋىلدىق ەلدى-مەكەندى «قولجەتىمدى ينتەرنەت» ۇلتتىق جوباسى اياسىندا تالشىقتى- وپتيكالىق بايلانىس جەلىلەرىن سالۋ ارقىلى ينتەرنەتپەن قامتاماسىز ەتۋ جوسپارلانعان.
ۇلتتىق جوبا اياسىندا 6 اۋىلدىق ەلدى-مەكەندى ءموبيلدى ينتەرنەتپەن قامتۋعا مۇمكىندىك بار. ولار ماڭعىستاۋ اۋدانىنىڭ جارما، سازدى، باسقۇدىق جانە تيگەن اۋىلدارى، قاراقيا اۋدانىنىڭ اققۇدىق اۋىلى، بەينەۋ اۋدانىنىڭ نوعايتى اۋىلى. ۇسىنىستار قازاقستان رەسپۋبليكاسىنىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنە جولدانعان.

- سونىمەن قاتار، بيىل وبلىستاعى اققۇدىق، بوستان جانە بەكى اۋىلدىق ەلدى- مەكەندەرىندە ورنالاسقان 3 مەكتەپ تالشىقتى وپتيكالىق بايلانىس جەلىسىنىڭ قۇرىلىسىنا دەيىن، «Starlink» سپۋتنيكتىك ينتەرنەتىمەن قامتاماسىز ەتىلدى، - دەلىنگەن حابارلامادا.

جالپى وبلىستا 2027-جىلعا دەيىن رەسپۋبليكالىق جانە وبلىستىق ماڭىزداعى اۆتوجولداردى ساپالى ۇيالى بايلانىسپەن جانە ينتەرنەتپەن قامتۋ كوزدەلگەن.