م. اشىمبايەۆ ۇلتتىق قور تۋرالى: تابىسىمىزدان ەكى ەسە كوپ اقشا جۇمساپ وتىرمىز

استانا. KAZINFORM - سەنات ءتوراعاسى ماۋلەن اشىمبايەۆ «تالداۋ مەكتەبىنىڭ» ءۇشىنشى بۋىنى ازىرلەگەن قازاقستاننىڭ ورنىقتى دامۋىنا ارنالعان ساراپتامالىق جيناقتىڭ تانىستىرىلىمىندا ۇلتتىق قور اقشاسىن ۇزدىكسىز پايدالانۋدىڭ ەكونوميكاعا اسەرى تۋرالى پىكىر ءبىلدىردى.

«ءبىز تابىسىمىزدان ەكى ەسە كوپ اقشا جۇمسايمىز. قوسىمشا قاراجات قايدان كەلەدى؟ ۇلتتىق قوردان جانە بورىشتاردان. وسى شىعىنداردىڭ اسەرىنەن ينفلياتسيا مەن باعانى اسقىندىرىپ جاتىرمىز. سايكەسىنشە، ۇلتتىق بانك تە پايىزدىق مولشەرلەمەنى كوتەرىپ وتىر. بۇل ەلدەگى كاسىپكەرلىكتى شەكتەپ، ەكونوميكانىڭ دامۋىن تەجەيدى»، - دەدى سەنات سپيكەرى.

ماۋلەن اشىمبايەۆ ۇلتتىق قورعا تۇسكەن دوللاردىڭ ءبىر بولىگىن اي سايىن تەڭگە باعامىن تۇراقتاندىرۋ ءۇشىن ساتۋعا تۋرا كەلىپ وتىرعانىن دا ەسكە سالدى.

«پروبلەمانىڭ ەكىنشى بولىگى بار. ونىڭ سالدارى تىپتەن سالماقتى بولۋى مۇمكىن. بيۋجەتكە ترانسفەرت ءبولۋ ءۇشىن ىشكى ۆاليۋتا نارىعىنا ۇلتتىق قوردان دوللار ساتۋ كەرەك. تاعى دا سۇرانىس پەن ۇسىنىس زاڭى ىسكە قوسىلادى. وسىلايشا تەڭگەنىڭ باعاسىن قولدان ءوسىرىپ وتىرمىز. بۇل جامان ەمەس شىعار. ءبىراق ونىڭ تيىمدىلىگى قانداي؟ ارتىق باعالانعان تەڭگە دەگەن - قىمبات ەكسپورت، ارزان يمپورت. ياعني، ءبىزدىڭ تاۋار وندىرۋشىلەر قىتاي مەن رەسەيدىڭ، تۇركيانىڭ وندىرۋشىلەرىنە قاراعاندا ءتيىمسىز جاعدايدا قالادى دەگەن ءسوز. باعادان ۇتىلىپ جاتقاندىقتان ىشكى ءوندىرىس پەن ونەركاسىپ وسپەيدى»، - دەدى سەنات ءتوراعاسى.