ەلىمىزدەگى جۇمىس بەرۋشىلەر كوبىنە قانداي مامانداردى ىزدەيدى

ق ر ەڭبەك جانە حالىقتى الەۋمەتتىك قورعاۋ مينيسترلىگى باسپا ءسوز قىزمەتىنىڭ حابارلاۋىنشا، جۇمىس بەرۋشىلەر كوبىنە مەدبيكەلەردى، اۆتوكولىك جۇرگىزۋشىلەرىن، تاربيەشىلەردى، ماتەماتيكا مۇعالىمدەرىن، بۋحالتەرلەردى جانە اسپازداردى ىزدەگەن.

بوس جۇمىس ورىندارىنىڭ باسىم بولىگى ورتا دەڭگەيدەگى بىلىكتىلىگى بار ماماندارعا ارنالعان. ولاردىڭ ۇلەسى - 42,1 پايىز. جوعارى بىلىكتى ماماندارعا ارنالعان جۇمىس ورىندارى 32,7 پايىزدى، ال ارنايى بىلىكتىلىكتى قاجەت ەتپەيتىن جۇمىستار 25,2 پايىزدى قۇرايدى.

سونداي-اق جوعارى بىلىكتى مامانداردىڭ ىشىندە الەۋمەتتىك پەداگوگتەر مەن مەكتەپ پسيحولوگتارىنا دا سۇرانىس بار.

ايتا كەتەيىك، enbek.kz ەلەكتروندى ەڭبەك بيرجاسى جۇمىس ىزدەۋشىلەرگە تۇيىندەمەسىن ورنالاستىرىپ، وزىنە لايىقتى جۇمىس تابۋعا مۇمكىندىك بەرەدى. ال جۇمىس بەرۋشىلەر پلاتفورما ارقىلى بوس جۇمىس ورىندارىن ۇسىنىپ، قويىلاتىن كاسىبي تالاپتارعا سايكەس كەلەتىن مامانداردى ىرىكتەي الادى.

- ەلەكتروندى ەڭبەك بيرجاسى جۇمىس ىزدەۋ مەن قىزمەتكەرلەردى ىرىكتەۋ ۇدەرىستەرىن ءبىر سيفرلىق پلاتفورمادا بىرىكتىرەدى. پايدالانۋشىلار ءوز تالاپتارىنا سايكەس ىزدەۋ پارامەترلەرىن بەلگىلەپ، ەلىمىزدىڭ ءتۇرلى وڭىرلەرىندەگى ەڭبەك نارىعىنداعى ۇسىنىستارمەن تانىسا الادى. جۇمىس مۇمكىندىكتەرىن قاراستىرۋ جانە تۇيىندەمە ورنالاستىرۋ ءۇشىن Enbek.kz پلاتفورماسىن پايدالانۋعا بولادى، - دەلىنگەن حابارلامادا.