ەلىمىزدىڭ ءىرى قالالارىندا قوقىس وڭدەۋ زاۋىتتارىن سالۋ جوسپارلانىپ وتىر

وندا الماتى قالاسىندا قالدىقتاردى ەنەرگەتيكالىق كادەگە جاراتۋ زاۋىتىن سالۋ جونىندەگى جوبانى جۇزەگە اسىرۋ بارىسى تالقىلاندى. بۇعان دەيىن ەكولوگيا جانە تابيعي رەسۋرستار مينيسترلىگى مەن Hunan Junxin Environmental Protection Co.، Ltd كومپانياسى اراسىندا قول قويىلعان ينۆەستيتسيالىق كەلىسىمگە سايكەس وسى جىلدىڭ مامىر ايىندا 145 ميلليارد تەڭگەلىك ينۆەستيتسيالىق جوبا جۇزەگە اسىرىلا باستاعان بولاتىن.

Hunan Junxin Environmental Protection Co.، Ltd ديرەكتورلار كەڭەسىنىڭ ءتوراعاسى داي داوگو جوبا بويىنشا قۇرىلىس-مونتاجداۋ جۇمىستارىن باستاۋعا دايىندىق ءجۇرىپ جاتقانىن حابارلادى.

قۋاتى تاۋلىگىنە 2 مىڭ تونناعا دەيىنگى قالدىقتاردى قايتا وڭدەۋگە جەتەتىن كاسىپورىن 60 م ۆ ت-قا دەيىن ەلەكتر ەنەرگياسىن وندىرە الادى، كومىر قىشقىل (CO2) گازىنىڭ قالدىقتارىن جىلىنا 200 مىڭ تونناعا دەيىن قىسقارتىپ، جىل سايىن قوقىس پوليگونى اۋماعىنىڭ شامامەن 800 مىڭ تەكشە مەتر كولەمىن بوساتا الادى. قۇرىلىس كەزەڭىندە كەمىندە 700 جۇمىس ورنىن جانە ىسكە قوسىلعاننان كەيىن 120 تۇراقتى جۇمىس ورنىن قۇرۋ كوزدەلگەن.

ولجاس بەكتەنوۆ مەملەكەت باسشىسى قاسىم-جومارت توقايەۆ ەكولوگيالىق جاۋاپكەرشىلىك پەن ەكولوگيالىق مادەنيەتتى قالىپتاستىرۋعا ەرەكشە نازار اۋداراتىنىن اتاپ ءوتتى. جاڭا كونستيتۋتسيادا قورشاعان ورتانى قورعاۋ مەملەكەتتىك ساياسات پەن ازاماتتىق جاۋاپكەرشىلىكتىڭ نەگىزگى قاعيداتتارىنىڭ ءبىرى رەتىندە بەكىتىلگەن. جوعارى دەڭگەيدە قول جەتكىزىلگەن ۋاعدالاستىقتار ساۋدا-ەكونوميكالىق ىنتىماقتاستىقتى ودان ءارى دامىتۋعا قولايلى جاعداي جاسايتىنى اتاپ ءوتىلدى.

سونىمەن قاتار كەزدەسۋ بارىسىندا قازاقستاننىڭ باسقا دا وڭىرلەرىندە وسىنداي جوبالاردى جۇزەگە اسىرۋ ارقىلى قالدىقتاردى كادەگە جاراتۋ سالاسىنداعى ىنتىماقتاستىقتى كەڭەيتۋ پەرسپەكتيۆالارى تالقىلاندى.

كەزدەسۋ قورىتىندىسى بويىنشا پرەمەر- مينيستر ەكولوگيا جانە تابيعي رەسۋرستار مينيسترلىگىنە جانە باسقا دا جاۋاپتى مەملەكەتتىك ورگاندارعا كومپانيامەن شۇعىل تۇردە ىنتىماقتاستىقتىڭ بارلىق اسپەكتىلەرىن زەردەلەۋدى جانە ءبىر اي ىشىندە قازاقستاننىڭ ءبىرقاتار ءىرى قالاسىندا قالدىقتاردى كادەگە جاراتۋ جونىندەگى زاۋىتتار سالۋ تۋرالى كەلىسىمگە قول قويۋعا دايىنداۋدى تاپسىردى.

بۇعان دەيىن حابارلانعانداي، ۇكىمەت قاراعاندى، اتىراۋ، اقتوبە، پاۆلودار جانە باسقا دا قالالاردا قالدىقتاردى كادەگە جاراتۋ زاۋىتتارىن سالۋ ماسەلەسىن پىسىقتاۋدا.

ال الماتىدا قالدىقتاردى ەنەرگەتيكالىق كادەگە جاراتۋ جوباسى قولعا الىندى.