ەلىمىزدە ەسكى ءۇيى بۇزىلاتىن تۇرعىندارعا جاڭا پاتەر بەرىلەدى
استانا. KAZINFORM - قازاقستاندا ەسكى ۇيلەردى جاڭارتۋ باعدارلاماسى اياسىندا تۇرعىنداردىڭ مۇددەسىن قورعاۋعا ارنالعان جاڭا كەپىلدىك تەتىگى ىسكە قوسىلدى. بۇل تۋرالى «قازاقستان تۇرعىن ءۇي كومپانياسى» ا ق باسقارما ءتوراعاسى التاي كۇزدىبايەۆ استانادا وتكەن ساراپشىلىق تالقىلاۋدا ايتتى.
بۇگىن ەلوردادا «جالپىحالىقتىق اۋقىمدى قۇرىلىس - 2027: قازاقستان ەكونوميكاسى ءۇشىن جاڭا مۇمكىندىكتەر» تاقىرىبىندا ساراپشىلىق تالقىلاۋ ءوتىپ جاتىر. جيىندا تۇرعىن ءۇي قۇرىلىسىنىڭ قازىرگى جاعدايى، ەسكىرگەن باسپانالاردى جاڭارتۋ جانە قۇرىلىس سالاسىنا ينۆەستيتسيا تارتۋ ماسەلەلەرى قارالدى.
التاي كۇزدىبايەۆتىڭ ايتۋىنشا، بۇگىندە قازاقستانداعى تۇرعىن ءۇي قورىنىڭ %46 ى 50 جىلدان استام ۋاقىت بۇرىن سالىنعان. بۇل عيماراتتاردىڭ تەحنيكالىق جاعدايىمەن قاتار، ەنەرگيا تيىمدىلىگى دە وزەكتى ماسەلەگە اينالىپ وتىر.
- قازىر ونەركاسىپ جانە قۇرىلىس مينيسترلىگى مەن جەرگىلىكتى اتقارۋشى ورگاندار تۇرعىن ءۇيدى جاڭارتۋ باعدارلامالارىن جۇزەگە اسىرىپ جاتىر. بۇعان كوكشەتاۋ مەن الماتى قالالارىن مىسال رەتىندە كەلتىرۋگە بولادى. استانا مەن ەلىمىزدىڭ باسقا قالالارىندا دا وسىنداي جۇمىستار اتقارىلۋدا، - دەدى التاي كۇزدىبايەۆ.
كومپانيا باسشىسىنىڭ سوزىنشە، بيىلدان باستاپ تۇرعىن ۇيلەردى جاڭارتۋ جوبالارىنا كەپىلدىك بەرۋ تەتىگى ىسكە قوسىلعان. ونىڭ باستى ماقساتى - ەسكى ۇيلەردىڭ ورنىنا جاڭا تۇرعىن ءۇي سالىنعان كەزدە مەنشىك يەلەرىنىڭ قۇقىقتارىن قورعاۋ.
- ءبىز تۇرعىن ءۇي قۇرىلىسىنىڭ ءبىرىڭعاي وپەراتورى رەتىندە بيىلدان باستاپ رەنوۆاتسيا جوبالارىنا كەپىلدىك بەرۋ تەتىگىن ىسكە قوستىق. بۇل ەسكى ۇيلەردىڭ يەلەرىنىڭ دە مۇددەسىن قورعاۋعا مۇمكىندىك بەرەدى. قۇرىلىس كومپانيالارى ەسكى اۋدانداردى جاڭارتۋعا كىرىسكەن كەزدە تۇرعىندارعا قۇرىلىس اياقتالعانعا دەيىن جالدامالى باسپانا بەرىلۋىنە كەپىلدىك قاراستىرىلادى. سونىمەن قاتار «بولمەگە بولمە» جانە تەڭ قۇندىلىق قاعيداتتارى بويىنشا تۇرعىن بۇرىنعى ءۇيىنىڭ ورنىنان سالىنعان جاڭا عيماراتتان ءتيىستى پاتەرىن الۋعا كەپىلدىك الادى، - دەپ ءتۇسىندىردى ول.
وسىلايشا، رەنوۆاتسيا باعدارلاماسى اياسىندا ەسكى ءۇيى سۇرىلەتىن تۇرعىندارعا قۇرىلىس كەزەڭىندە ۋاقىتشا باسپانا بەرۋ جانە جاڭا ۇيدەن بۇرىنعى پاتەرىنە تەڭ كەلەتىن باسپانا ۇسىنۋ كوزدەلگەن.
ايتا كەتەيىك، ساراپشىلىق تالقىلاۋدا تۇرعىن ءۇي قۇرىلىسىنىڭ كولەمىن ارتتىرۋمەن قاتار، ينجەنەرلىك جەلىلەردى، كولىك جانە الەۋمەتتىك ينفراقۇرىلىمدى دامىتۋ ماسەلەلەرى دە كوتەرىلدى.
ەسكە سالايىق، بۇعان دەيىن قازاقستاندا تۇرعىن ۇيگە مۇقتاج ازاماتتاردى قولداۋ تەتىكتەرى جەتىلدىرىلىپ جاتقانىن حابارلاعانبىز.
اۆتور
نازەركە سۇيىندىك
