ەلىمىزدە قانشا پەداگوگ جۇمىس ىستەيدى

قازىرگى تاڭدا ەلىمىزدىڭ مەكتەپتەرىندە 420 مىڭعا جۋىق پەداگوگ قىزمەت ەتەدى. مەكتەپكە دەيىنگى ۇيىمداردا 104 مىڭنان استام مامان، ال تەحنيكالىق جانە كاسىپتىك ءبىلىم بەرۋ ۇيىمدارىندا 42 مىڭعا جۋىق پەداگوگ جۇمىس ىستەيدى.

ءبىلىم بەرۋ ۇيىمدارىنىڭ بارلىق دەڭگەيىندە ايەل مامانداردىڭ ۇلەسى باسىم.

پەداگوگتەر اراسىندا ەڭبەك ءوتىلى جوعارى ماماندار دا از ەمەس. مەكتەپتەردە 53 مىڭنان استام پەداگوگتىڭ ەڭبەك ءوتىلى 30 جىلدان اسادى. ال 73 مىڭنان استام مۇعالىم ءبىلىم بەرۋ سالاسىندا 20 جىلدان 30 جىلعا دەيىن ەڭبەك ەتىپ كەلەدى.

مەكتەپكە دەيىنگى ۇيىمداردا 5 مىڭنان استام، تەحنيكالىق جانە كاسىپتىك ءبىلىم بەرۋ ۇيىمدارىندا 4 مىڭنان استام پەداگوگتىڭ ەڭبەك ءوتىلى 30 جىلدان جوعارى.

بۇل دەرەكتەر ءبىلىم بەرۋ سالاسىندا تاجىريبەلى مامانداردىڭ ەلەۋلى ۇلەسى بار ەكەنىن كورسەتەدى.

ەسكە سالايىق، بۇعان دەيىن ەل مەكتەپتەرىندە 5000-نان استام مۇعالىم جەتىسپەيتىنىن حابارلاعان ەدىك.