ەلىمىزدە جۇمىسقا ورنالاستىرۋدىڭ جاڭا ءتاسىلى ەنگىزىلىپ جاتىر

سيفرلىق جۇمىسپەن قامتۋ قىزمەتى اياسىندا مانساپ ورتالىقتارى ازاماتتارعا ءبىر رەتتىك كەڭەس بەرۋمەن شەكتەلمەي، ولاردى جۇمىسقا ورنالاسقانعا دەيىن جۇيەلى تۇردە سۇيەمەلدەيدى.

ق ر ەڭبەك جانە حالىقتى الەۋمەتتىك قورعاۋ مينيسترلىگى باسپا ءسوز قىزمەتىنىڭ حابارلاۋىنشا، جاڭا ءتاسىلدىڭ نەگىزگى ەرەكشەلىگى - جۇمىسپەن قامتۋعا مۇقتاج ازاماتتاردى مانساپ ورتالىقتارىنا وزدەرى جۇگىنگەنگە دەيىن انىقتاۋ. ول ءۇشىن مەملەكەتتىك اقپاراتتىق جۇيەلەردەگى مالىمەتتەر نەگىزىندە جۇمىس ىزدەۋى مۇمكىن ادامدار ايقىندالىپ، ولارعا كومەك ۇسىنىلادى.

ازاماتتار جۇمىسقا ورنالاسۋعا جاردەمدەسەتىن قىزمەتتەردى Enbek.kz ەلەكتروندىق ەڭبەك بيرجاسى ارقىلى پايدالانا الادى. ولاردىڭ كەلىسىمىمەن ءبىلىمى، ەڭبەك ءوتىلى مەن كاسىبي داعدىلارى تۋرالى مالىمەتتەر قامتىلعان تسيفرلىق تۇيىندەمە اۆتوماتتى تۇردە جاسالادى.

جاساندى ينتەللەكت ازاماتتىڭ بىلىكتىلىگىنە ساي بوس جۇمىس ورىندارىن ىرىكتەپ، جەكە ۇسىنىمدار ازىرلەيدى. ال ج ي-كومەكشى ۇيالى تەلەفون ارقىلى ديالوگ فورماتىندا جۇمىس ىستەيدى. ازامات ودان ەڭبەك جاعدايلارىن ناقتىلاپ، ءوز تالاپتارى مەن قالاۋىن جەتكىزە الادى. سونداي-اق بوس جۇمىس ورىندارى، وقىتۋ مۇمكىندىكتەرى جانە مەملەكەتتىك جۇمىسپەن قامتۋ شارالارى تۋرالى جەكە ۇسىنىستار الادى.

جاڭا قىزمەت تەك سيفرلىق قۇرالدار ارقىلى جۇمىس ىزدەۋمەن شەكتەلمەيدى. بۇل رەتتە مانساپ ورتالىقتارىنىڭ ماماندارى ازاماتتارعا جۇمىسقا ورنالاسۋدىڭ ءار كەزەڭىندە قولداۋ كورسەتەدى.

- ماماندار جۇمىس ىزدەۋشىلەرگە تۇيىندەمە ازىرلەۋگە، بوس جۇمىس ورىندارىنا ءوتىنىم بەرۋگە جانە جۇمىس بەرۋشىلەرمەن بايلانىس ورناتۋعا كومەكتەسەدى. ەگەر ازامات جۇمىسقا ورنالاسا الماسا، ونىڭ سەبەپتەرىن انىقتاپ، الداعى ارەكەتتەردى بىرگە جوسپارلايدى. قاجەت بولعان جاعدايدا بوس جۇمىس ورىندارىن ىزدەۋ جالعاسادى، تۇيىندەمە جەتىلدىرىلەدى نەمەسە كەلەسى سۇحباتتاسۋعا دايىندىق جۇرگىزىلەدى. وسى جۇمىستى جۇيەلى ۇيىمداستىرۋ ءۇشىن مينيسترلىك ازاماتتاردى ماماندارعا بەكىتۋگە، كونسۋلتاتسيالار تاريحىن جۇرگىزۋگە، الداعى ءىس- شارالاردى جوسپارلاۋعا جانە سۇيەمەلدەۋ ناتيجەلەرىن باقىلاۋعا مۇمكىندىك بەرەتىن سيفرلىق قۇرالداردى ەنگىزىپ جاتىر،- دەلىنگەن حابارلامادا.

سيفرلىق جۇمىسپەن قامتۋ قىزمەتى جوباسى 2026-جىلعى شىلدەدەن باستاپ پاۆلودار جانە ماڭعىستاۋ وبلىستارىندا ىسكە اسىرىلۋدا. وسى ۋاقىت ىشىندە 59,2 مىڭ ازاماتقا جۇمىسقا ورنالاسۋعا جاردەمدەسۋ شارالارى ۇيىمداستىرىلىپ، 7,5 مىڭ ادام جۇمىسقا ورنالاستى.

2026-جىلدىڭ سوڭىنا دەيىن قىزمەتتى ەلىمىزدىڭ بارلىق وڭىرىنە كەزەڭ- كەزەڭىمەن ەنگىزۋ جوسپارلانعان.

جاڭا ءتاسىل ازاماتتارعا جەكەلەگەن قىزمەتتەر كورسەتۋدەن ولاردى جۇمىسقا ورنالاسقانعا دەيىن كەشەندى سۇيەمەلدەۋگە كوشۋگە مۇمكىندىك بەرەدى. بۇل رەتتە سيفرلىق تەحنولوگيالار مەن مانساپ ورتالىقتارى ماماندارىنىڭ جۇمىسى ءوزارا ۇشتاسادى.

وسىعان دەيىن ەلىمىزدە جۇمىسپەن قامتىلعاندار سانى 73 مىڭ ادامعا ارتقانى تۋرالى جازدىق.