ەلىمىزدە ۇشاقتار كوبىنەسە قانداي قۇستارمەن سوقتىعىسادى

ۆەدومستۆونىڭ مالىمەتىنشە، اتالعان قۇستار ەلىمىزدىڭ بارلىق اۋماعىندا كەڭىنەن تارالعان. ولار تاماق، سۋ جانە تىنىعاتىن جەر ىزدەپ، اۋەجايلارعا جاقىن اۋماقتاردا جيى كەزدەسەدى.

- قۇستارمەن سوقتىعىسۋ جيىلىگى ولاردىڭ سانىنا، جىل مەزگىلىنە جانە اۋەايلاقتاردىڭ قۇستار شوعىرلاناتىن ورىندارعا قانشالىقتى جاقىن ورنالاسقانىنا بايلانىستى. اسىرەسە كوكتەمگى جانە كۇزگى كوشى- قون كەزەڭدەرىندە قۇستاردىڭ سانى مەن قوزعالىس قارقىندىلىعى ارتۋى مۇمكىن. سونىمەن قاتار جازدا، بالاپاندار پايدا بولعان كەزدە دە سوقتىعىسۋ قاۋپى جوعارىلايدى، - دەلىنگەن جاۋاپتا.

ماسەلەن، نۇرسۇلتان نازاربايەۆ حالىقارالىق اۋەجايىنىڭ مالىمەتىنشە، اۋەايلاق اۋماعىندا جانە ونىڭ ماڭىندا كول شاعالاسى، كۇمىس شاعالا، قارا جانە سۇر قارعا، كوك كەپتەر، سۇر قۇتان، كۇيكەنتاي، ساز قۇلادىنى، ساۋىسقان، قارلىعاش پەن تورعاي كەزدەسەدى.

اۋەجاي ماماندارىنىڭ تۇسىندىرۋىنشە، ءىرى دەنەلى جانە توپتالىپ ۇشاتىن قۇستار اۋە كەمەلەرىنە كوبىرەك قاۋىپ توندىرەدى. قاۋىپ دەڭگەيىن باعالاعاندا قۇستاردىڭ كولەمى عانا ەمەس، ولاردىڭ سانى مەن ۇشاقتار قوزعالاتىن ايماقتارعا جاقىندىعى دا ەسكەرىلەدى.

ال اۆياتسيالىق اكىمشىلىك مۇنداي ءقاۋىپ تاۋلىكتىڭ قۇستار بەلسەندى بولاتىن جەكەلەگەن ۋاقىتتارىندا دا بايقالۋى مۇمكىن ەكەنىن اتاپ ءوتتى. سوندىقتان ءار اۋەجايدا جەرگىلىكتى تابيعي جاعداي مەن قۇستاردىڭ قوزعالىس ەرەكشەلىكتەرى ەسكەرىلەدى.