ەلىمىزدە عىلىمعا بولىنەتىن قارجى جەتى جىلدا 3,6 ەسە ءوستى

72,2 ميلليارد تەڭگەدەن 261,5 ميلليارد تەڭگەگە جەتىپ، شامامەن 190 ميلليارد تەڭگەگە وسكەن.

بۇل كورسەتكىش ەلىمىزدە عىلىمي زەرتتەۋلەرگە جۇمسالاتىن قاراجاتتىڭ ايتارلىقتاي ارتقانىن كورسەتىپ وتىر. ەندىگى باستى مىندەت - عىلىمعا سالىنعان قارجىنىڭ قايتارىمىن ارتتىرىپ، زەرتتەۋ ناتيجەلەرىن ەكونوميكادا ناقتى قولدانۋعا بولاتىن تەحنولوگيالار مەن شەشىمدەرگە اينالدىرۋ.

مۇنداي ءوسىم سوڭعى بەس جىلداعى كورسەتكىشتەردەن دە بايقالادى. ماسەلەن، 2020-جىلى عىلىمي زەرتتەۋلەر مەن تاجىريبەلىك-كونسترۋكتورلىق جۇمىستارعا 89 ميلليارد تەڭگە جۇمسالسا، 2025-جىلى بۇل كورسەتكىش 261,5 ميلليارد تەڭگەگە جەتكەن. وسىلايشا، بەس جىل ىشىندە بۇل كورسەتكىش 2,9 ەسە ءوسىپ وتىر.

عىلىمدى دامىتۋ ءۇشىن تۇراقتى قارجىلاندىرۋدىڭ ماڭىزى زور. ويتكەنى زاماناۋي زەرتتەۋلەر جۇرگىزۋ ءۇشىن زەرتحانالار، قاجەتتى قۇرال-جابدىقتار، اقپاراتتىق رەسۋرستار مەن بىلىكتى ماماندار كەرەك. سونىمەن قاتار عىلىمي ۇجىمداردىڭ جۇمىسىن قولداپ، جاس زەرتتەۋشىلەردى دايارلاۋعا دا قوماقتى قاراجات قاجەت.

عىلىمي زەرتتەۋلەرگە جۇمسالاتىن قارجىنىڭ ارتۋى جاڭا تەحنولوگيالاردى ازىرلەۋگە جانە اۋقىمدى جوبالاردى جۇزەگە اسىرۋعا مۇمكىندىك بەرەدى. دەگەنمەن قارجى كولەمىنىڭ ءوسۋىن عىلىمنىڭ باستى جەتىستىگى دەپ قاراستىرۋعا بولمايدى. ەڭ ماڭىزدىسى - وسى قاراجاتتىڭ قانشالىقتى ءتيىمدى جۇمسالىپ، قانداي ناقتى ناتيجە بەرگەنى.

سوندىقتان الداعى ۋاقىتتا عىلىمعا بولىنەتىن قارجىنى كوبەيتۋمەن قاتار، ونىڭ تيىمدىلىگىن ارتتىرۋعا دا باسىمدىق بەرىلۋى ءتيىس. بۇل رەتتە عىلىمي جوبالاردىڭ ساپاسى، زەرتتەۋ ناتيجەلەرىنە سۇرانىس، ولاردى تاجىريبەدە قولدانۋ مۇمكىندىگى جانە عىلىم مەن ءوندىرىس اراسىنداعى بايلانىستى نىعايتۋ ەرەكشە ماڭىزعا يە.

بۇل باعىتتا جوعارى وقۋ ورىندارىنىڭ دا ءرولى زور. بۇگىندە ۋنيۆەرسيتەتتەر تەك ءبىلىم بەرۋمەن شەكتەلمەي، عىلىمي زەرتتەۋلەر جۇرگىزەتىن، جاڭا تەحنولوگيالار ازىرلەيتىن جانە تىڭ يدەيالاردى جۇزەگە اسىراتىن ورتالىقتارعا اينالۋى قاجەت.

عىلىمعا جۇمسالاتىن قارجىنىڭ كوبەيۋى وسى ماقساتقا جەتۋگە جول اشادى. ۋنيۆەرسيتەتتەر مەن عىلىمي ۇيىمداردىڭ زەرتتەۋ مۇمكىندىكتەرى كەڭەيگەن سايىن جاس مامانداردىڭ ناقتى جوبالارعا قاتىسۋىنا، تاجىريبە جيناقتاۋىنا جانە ءوز عىلىمي ىزدەنىستەرىن دامىتۋىنا جاعداي جاسالادى. بۇل ءوز كەزەگىندە جاڭا بۋىن زەرتتەۋشىلەردىڭ قالىپتاسۋىنا ىقپال ەتەدى.

مەملەكەت ءۇشىن عىلىمعا سالىنعان قارجى - بولاشاققا جاسالعان ينۆەستيتسيا. ونىڭ ناتيجەسى بىردەن بايقالماۋى مۇمكىن. دەگەنمەن تەحنولوگيالىق دامۋدىڭ، ەڭبەك ونىمدىلىگىن ارتتىرۋدىڭ، جاڭا ءوندىرىس ورىندارىن اشۋدىڭ جانە شەتەلدىك تەحنولوگيالارعا تاۋەلدىلىكتى ازايتۋدىڭ نەگىزىندە عىلىمي زەرتتەۋلەر جاتىر.

وسىلايشا، سوڭعى جەتى جىلدا عىلىمي زەرتتەۋلەر مەن تاجىريبەلىك- كونسترۋكتورلىق جۇمىستارعا جۇمسالاتىن ىشكى شىعىننىڭ 72,2 ميلليارد تەڭگەدەن 261,5 ميلليارد تەڭگەگە دەيىن ءوسۋى قازاقستاندا عىلىمدى قارجىلاندىرۋ مۇمكىندىگىنىڭ ەداۋىر كەڭەيگەنىن كورسەتەدى.

ەندىگى مىندەت - وسى مۇمكىندىكتى ءتيىمدى پايدالانىپ، عىلىمي زەرتتەۋلەردىڭ ناقتى ناتيجەسىن ەكونوميكا يگىلىگىنە جاراتۋ. ويتكەنى عىلىمعا سالىنعان ينۆەستيتسيانىڭ شىنايى قايتارىمى بولىنگەن قارجىنىڭ كولەمىمەن ەمەس، ونىڭ ەل دامۋىنا قوسقان ۇلەسىمەن ولشەنەدى.

بۇعان دەيىن قازاق عالىمدارى ازىرلەگەن 30 عىلىمي جوبا شەتەلدىك نارىققا شىققانى حابارلاندى.