ەلىمىزدە ءماسليحات سايلاۋى وتەتىن كۇن بەلگىلەندى

- جاقىندا عانا قازاقستان رەسپۋبليكاسىنىڭ قۇرىلتايىنىڭ دەپۋتاتتارىن سايلاۋ وتكىزىلدى. ەندى ءماسليحاتتار دەپۋتاتتارىنىڭ كەزەكتەن تىس سايلاۋىن ۇيىمداستىرۋ جانە وتكىزۋ بويىنشا جاڭا سايلاۋ ناۋقانىنا كىرىسەمىز. قازاقستان رەسپۋبليكاسى پرەزيدەنتىنىڭ بارلىق دەڭگەيدەگى ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ تۋرالى جارلىعىنا سايكەس سايلاۋ ناۋقانىن ۇيىمداستىرۋعا جانە وتكىزۋگە باعىتتالعان ءتيىستى جۇمىستار باستالادى، - دەدى ورتالىق سايلاۋ كوميسسياسى ءتوراعاسى نۇرلان ءابىدروۆ.

سايلاۋ تۋرالى كونستيتۋتسيالىق زاڭنىڭ 101-بابىنىڭ ءۇشىنشى تارماعىنا سايكەس، ورتالىق سايلاۋ كوميسسياسى وكىلەتتىكتەرى مەرزىمىنەن بۇرىن توقتاتىلعان ءماسليحاتتار دەپۋتاتتارىنىڭ كەزەكتەن تىس سايلاۋىن وكىلەتتىكتەردىڭ مەرزىمى توقتاتىلعان كۇننەن باستاپ ەكى ايدان كەشىكتىرمەي وتكىزۋى قاجەت.

- ق ر سايلاۋ تۋرالى زاڭنىڭ 12-بابىنىڭ 14-تارماقشاسىنا، 101-بابىنىڭ 3-تارماعىنا، 103-بابىنىڭ 7-تارماعىنا، 104-بابىنىڭ 8-تارماعىنا سايكەس جانە پرەزيدەنتتىڭ بارلىق دەڭگەيدەگى ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ تۋرالى جارلىعىنىڭ نەگىزىندە ورتالىق سايلاۋ كوميسسياسى قازاقستان رەسپۋبليكاسىندا ءماسليحاتتار دەپۋتاتتارىنىڭ كەزەكتەن تىس سايلاۋىن 2026-جىلعى 29-قاراشاعا تاعايىنداۋ تۋرالى قاۋلى جوباسىن ۇسىنادى، - دەدى و س ك ءتوراعاسىنىڭ ورىنباسارى مۇحتار ەرمان.

سايلاۋ كوميسسياسى ءتيىستى قاۋلىنى قابىلدادى. ءماسليحاتتار ءتيىستى اكىمشىلىك-اۋماقتىق ءبولىنىسىنىڭ حالقى جالپىعا بىردەي، تەڭ، تىكەلەي سايلاۋ قۇقىعى نەگىزىندە جاسىرىن داۋىس بەرۋ ارقىلى 5 جىل مەرزىمگە سايلانادى.

الداعى سايلاۋ شەڭبەرىندە 228 ءماسليحاتتا 3447 دەپۋتاتتى سايلاۋ جوسپارلانۋدا. اتاپ ايتقاندا: 668 ماندات وبلىستىق، 626 ماندات قالالىق، 2053 ماندات اۋداندىق ماندات بار.

ەسكە سالا كەتسەك، كەشە مەملەكەت باسشىسى بارلىق دەڭگەيدەگى ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ تۋرالى جارلىققا قول قويدى.

سونداي-اق قۇرىلتاي جانىنان ماسليحاتتارمەن ءوزارا ءىس-قيمىل جونىندەگى كەڭەس قۇرىلادى.