ەلىمىزدە بيىل باستاۋىش سىنىپتاردا باعالاۋدىڭ جاڭا تاسىلدەرى ەنگىزىلەدى
استانا. قازاقپارات - 2026-جىلعى 1-قىركۇيەكتەن باستاپ 2-4-سىنىپ وقۋشىلارىنىڭ ءبىلىمىن باعالاۋدىڭ جاڭارتىلعان تاسىلدەرى ەنگىزىلەدى. بۇل رەتتە كريتەريالدى باعالاۋ جۇيەسى ساقتالادى، ال 1-سىنىپتاردا باعالاۋ ءتارتىبى وزگەرىسسىز قالادى.
بۇل تۋرالى ق ر وقۋ-اعارتۋ ءبىرىنشى ۆيتسە-ءمينيسترى شىنار اقپاروۆا ورتالىق كوممۋنيكاتسيالار قىزمەتىنىڭ الاڭىندا مالىمدەدى.
ونىڭ ايتۋىنشا، بۇعان دەيىن وقۋشىلاردىڭ وقۋ جەتىستىكتەرى فورماتيۆتىك جانە جيىنتىق باعالاۋ ارقىلى انىقتالعان. جيىنتىق باعالاۋ ءبولىم بويىنشا جانە توقسان بويىنشا باعالاۋدى قامتىعان. جاڭا تاسىلدە فورماتيۆتىك باعالاۋ ساقتالىپ، ونىڭ توقساندىق قورىتىندى باعاداعى ۇلەسى ارتادى. بۇعان دەيىن ونىڭ ۇلەسى %25 بولسا، ەندى %50 عا دەيىن كوبەيەدى.
- بۇعان دەيىن توقساندىق باعانى شىعارۋ كەزىندە وقۋشىنىڭ كۇندەلىكتى ساباقتا العان فورماتيۆتىك باعالارى جالپى ناتيجەنىڭ 25 پايىزىن قۇرايتىن. ەندى بۇل كورسەتكىش 50 پايىزعا دەيىن ارتادى. ياعني توقساندىق باعانىڭ جارتىسى وقۋشىنىڭ توقسان بويىنداعى كۇندەلىكتى ساباقتاعى وقۋ ناتيجەسى نەگىزىندە قالىپتاسادى، - دەدى شىنار اقپاروۆا.
ۆيتسە-ءمينيستردىڭ ايتۋىنشا، بۇل وزگەرىس وقۋشىنىڭ ساباقتاعى تۇراقتى ەڭبەگىن، تاپسىرمالاردى ورىنداۋىن جانە وقۋ ماقساتتارىن مەڭگەرۋ دەڭگەيىن قورىتىندى باعالاۋدا كوبىرەك ەسكەرۋگە مۇمكىندىك بەرەدى. سونىمەن قاتار وقۋ بولىمدەرىن مەڭگەرۋ ناتيجەسىن انىقتاۋ ءۇشىن ارالىق باعالاۋ ەنگىزىلەدى. جاڭا تارتىپكە سايكەس، پەداگوگ توقسان ىشىندە ءار ءپان بويىنشا ءار وقۋشىنى وتكىزىلگەن ساباقتاردىڭ كەمىندە 30 پايىزىندا باعالاۋى ءتيىس.
- مىسالى، توقساندا ءپان بويىنشا 30 ساباق وتكىزىلسە، ءار وقۋشى كەمىندە 9 ساباقتا فورماتيۆتىك بال الۋى ءتيىس. بۇل - باعالاۋدىڭ ەڭ تومەنگى جيىلىگى. پەداگوگ وقۋشىنى ودان دا جيى باعالاي الادى، - دەدى ول.
ءبىرىنشى ۆيتسە-مينيستر بۇل تالاپ وقۋشىنىڭ بىلىمىندەگى ىلگەرىلەۋدى جۇيەلى باقىلاۋعا جانە ونىڭ كۇندەلىكتى ەڭبەگىن باعالاۋعا مۇمكىندىك بەرەتىنىن اتاپ ءوتتى.
ايتا كەتەيىك، جاڭا وقۋ جىلىندا 380 مىڭنان استام بالا ءبىرىنشى سىنىپقا بارادى.
